बिक्री नहुँदा गोदाममै थन्कियो दूध- प्रदेश १ - कान्तिपुर समाचार

बिक्री नहुँदा गोदाममै थन्कियो दूध

विराटनगरस्थित दुग्ध वितरण आयोजनाले दुई महिनायता किसानको ६ करोड रुपैयाँ भुक्तानी दिन सकेको छैन
विनोद भण्डारी

विराटनगर — लकडाउनका कारण बिक्री ठप्प भएपछि दुग्ध विकास संस्थानको विराटनगरस्थित कार्यालयमा अर्बबराबरको पाउडर दूध र मख्खन थुप्रिएको छ । कार्यालयले दुई महिनादेखि किसानलाई दूधको भुक्तानीसमेत दिन सकेको छैन । भुक्तानी दिनुपर्ने रकम करिब ६ करोड पुगिसकेको छ ।


‘दूध र त्यसबाट बनेका सामान नै बिक्री नभएपछि संस्थानले दुई महिनादेखि किसानलाई भुक्तानी दिन सकेको छैन,’ दुग्ध वितरण आयोजना विराटनगरका प्रमुख गणेश यादवले भने ।

विराटनगरमा हेटौंडादेखि बुटवलसम्मको दूध आउने गरेको छ । दूधको संकलन बढे पनि बिक्री घटेपछि पाउडर र मख्खन बनाएर गोदाममा थन्क्याउनुपरेको यादवले बताए । संस्थानको गोदाममा अहिले ९ सय मेट्रिकटन पाउडर दूध र ७ मेट्रिकटन मख्खन छ ।

लकडाउनका कारण बिहे, व्रतबन्ध र अन्य धार्मिक कार्यक्रम नहुँदा पनि दूधको बिक्री घटेको हो । यादवका अनुसार लकडाउनका बेला किसान दुग्ध विकास संस्थानमै बढी निर्भर रहेकाले विराटनगर आयोजनाले मात्रै दैनिक ७० हजार लिटरसम्म दूध किन्नुपर्‍यो ।

आयोजनासँग १ सय ३० सहकारीमार्फत १९ हजार किसान आबद्ध छन् । प्रदेश १ मा दूधको उत्पादन बढेसँगै निजी डेरी पनि प्रशस्त खुलेका थिए । पाँचथर, इलाम, तेह्रथुम र धनकुटासम्मका किसानको दूध आयोजनाले नै खरिद गर्दै आएको थियो । निजी डेरीहरू खर्चका कारण टाढा दूध संकलन गर्न जाँदैनन् । तर, अहिले केही खुलेको विराटनगरको बजार तिनै निजी डेरी र आसपासका किसानबाट दूध ल्याई खुला रूपमा बेच्नेहरूले ओगटेका छन् ।

विराटनगर दुग्ध वितरण आयोजनाका गुण नियन्त्रक हरिदेव यादव खुला दूध बेच्नेहरूले बजार बिगारेको बताउँछन् । ‘खाद्य निर्देशिकाअनुसार अनुगमन नहुँदा बजारमा खुला दूध बिक्री भइरहेको छ,’ उनले भने, ‘त्यसबाट उपभोक्ता ठगिएका मात्र छैनन्, उनीहरूको स्वास्थ्यमाथि खेलबाड भइरहेको छ ।’ पाँच वर्षअघिसम्म विराटनगरमा आयोजनाले दैनिक २० हजार लिटर दूध बिक्री गर्ने गरेकोमा अहिले ४ हजार लिटरमा झरेको छ ।

प्रकाशित : असार १०, २०७७ १४:०६
प्रतिक्रिया
पठाउनुहोस्

नेविसंघ कार्यकर्ताले त्रिवि उपकुलपतिको कुर्सी जलाए

सुदीप कैनी

काठमाडौँ — प्रमुख प्रतिपक्षी दल कांग्रेसको भ्रातृ संगठन नेविसंघका कार्यकर्ताले बुधबार त्रिभुवन विश्वविद्यालयका उपकुलपति धर्मकान्त बाँस्कोटाको कुर्सी जलाएका छन् ।

विभिन्न माग लिएर उपकुलपति कार्यालय पुगेका विद्यार्थीलाई अपमान गर्न खोजेपछि आक्रोशित विद्यार्थीले उपकुलपतिको कुुर्सी कार्यकक्षबाहिर ल्याएर आगो लगाएको नेविसंघ त्रिवि इकाईका एक पदाधिकारीले बताए । त्रिविका प्रवक्ता सूर्य अधिकारीले नेविसंघको झण्डा बोकेर आएका केही युवाले कुर्सीमा आगजनी गरेको पुष्टि गरे ।

ती पदाधिकारीका अनुसार नेविसंघले रजिष्ट्रार, रेक्टरको कार्यकक्षमा समेत तालाबन्दी गरेका छन् । इकाईले केही दिनअघि अनलाइन कक्षा प्रभावकारी बनाउन, इन्टरनेटमा सहुलियत दिन र राजनीतिक भागबण्डाको आधारमा नियुक्ति नगर्न पदाधिकारीको ध्यानाकर्षण गराएको थियो । प्रधानमन्त्री केपी शर्मा ओलीको दबाबमा उपकुलपति बाँस्कोटाले चिकित्साशास्त्र अध्ययन संस्थान (आईओएम) मा डा. दिव्यासिंह शाहलाई डिन नियुक्त गरिएको भन्दै नेविसंघले असन्तुष्टि जनाएको थियो ।

नेविसंघ केन्द्रीय समितिले विश्वविद्यालयमा भइरहेका गतिविधिबारे ध्यानार्कषण गराउँदै बुधबार विज्ञप्ति जारी गरेको थियो । अध्यक्ष राजिव ढुङ्गानाले विज्ञप्ति जारी गरेको केही घण्टा नबित्दै उपकुलपतिको कुर्सीमा आगजनी गरिएको हो । नेविसंघले त्रिविमा सत्तारुढ नेकपाको सिफारिसको आधारमा पदाधिकारी, विभागीय प्रमुख र क्याम्पस प्रमुख नियुक्ति गरिएको आरोप लगाएको छ । वरिष्ठता र क्षमताको आधारमा विश्वविद्यालयमा पदाधिकारी नियुक्त गर्न माग गरिएको छ ।

९ महिनादेखि उपकुलपतिसहितका पदाधिकारी रिक्त संस्कृत, कृषि तथा वन विज्ञान र पोखरा विश्वविद्यालयमा पदाधिकारी नियुक्त गर्न नेविसंघले माग गरेको छ । आईओएमलगायत भागबण्डाको आधारमा गरिएको नियुक्ति खारेज गर्न माग गरिएको अध्यक्ष ढुङ्गानाले जानकारी दिए ।

प्रकाशित : असार १०, २०७७ १४:०२
पूरा पढ्नुहोस्
प्रतिक्रिया
पठाउनुहोस्
×