कुवेतबाट आएका ९३ महिला चतराको होल्डिङ सेन्टरमा
सुनसरी — सरकारले कुवेतबाट उद्धार गरी ल्याएका महिला कामदारमध्ये प्रदेश १ का ९३ जनालाई सुनसरीको बराहक्षेत्र नगरपालिकाको चतरास्थित होल्डिङ सेन्टरमा राखिएको छ । उनीहरू शुक्रबार सुनसरी आइपुगेका हुन् ।
सरकारले चतराको रामानन्दाचार्य सेवापीठले बनाएको १ सय २८ कोठे भवनलाई होल्डिङ सेन्टरका रूपमा प्रयोग गरेको छ । १ नम्बर प्रदेशस्तरीय होल्डिङ व्यवस्थापन उपसमितिका सदस्य रवि खनालका अनुसार कुवेतबाट आएका ती महिलालाई केही समय चतरामा राखिनेछ ।
कुवेतबाट आउनेमा प्रदेशका ११ जिल्लाका महिला छन् । सबैभन्दा बढी ३७ जना झापाका छन् । त्यस्तै मोरङका २१, सुनसरीका १८, इलामका चार, सोलुखुम्बु र पाँचथरका तीन–तीन, ताप्लेजुङ र तेह्रथुमका दुई–दुई तथा धनकुटा, भोजपुर र खोटाङका एक–एक जना छन् ।
होल्डिङ व्यवस्थापन समितिले उनीहरूलाई सम्बन्धित जिल्लासँग समन्वय गरेर घर पठाइने जनाएको छ । यसै गरी भारतबाट आएका ८८ जनालाई बराहक्षेत्रमा रहेका चारवटा क्वारेन्टाइनमा राखिएको छ । उनीहरूको पीसीआर जाँचको रिपोर्ट आउन बाँकी छ ।
प्रकाशित : जेष्ठ ३०, २०७७ १४:०२