विराटनगरका पसल खुल्न थाले- प्रदेश १ - कान्तिपुर समाचार

विराटनगरका पसल खुल्न थाले

विनोद भण्डारी

विराटनगर — सरकारले चैत ११ गतेदेखि लकडाउन सुरु गरेसँगै बन्द भएका विराटनगरका पसल बिहीबार बिहानदेखि सञ्चालनमा आएका छन् ।लकडाउनको अवज्ञा हुने स्थिति आएपछि बाध्य भएर बजार खोल्नु परेको उद्योग संगठन मोरङका अध्यक्ष भीम घिमिरेले बताए । 

महानगरस्तरीय सीसीएमसी, महानगरपालिका, उद्योग संगठन, मोरङ व्यापार संघ र विराट व्यापार संघबीच दिउँसो १२ बजेसम्म बजार र दुई बजेसम्म बैंक खोल्ने सहमति भएको हो ।

शिक्षण संस्था, ब्युटी पार्लर, सिनेमा हल, होटल, पार्टी प्यालेस, शैलुन बाहेकका सबै पसल बिहीबारदेखि मध्यान्ह १२ बजेसम्म सामाजिक दूरी कायम गरी र स्वास्थ्य सुरक्षा सतर्कता अपनाएर खुला भएको अध्यक्ष घिमिरेले बताए ।

बुधबार जिल्ला प्रशासन कार्यालय मोरङमा कोभिड क्राइसिस म्यानेजमेन्ट कमिटीको बैठकमा केन्द्रीय कमिटीको निर्णय नआएसम्म औपचारिक निर्णय गर्न नसकिने प्रमुख जिल्ला अधिकारी मदन भुजेलले बताएका थिए । तर स्थानीय जनप्रतिनिधि र सरोकारवाला संघ संस्थाका प्रतिनिधिले लकडाउन नखोले आम जनताको दैनिकी नै प्रभावित भइसकेको र बजार खुला नगरे समस्या झनै विकराल हुने बताउदै खोल्नुपर्ने अडान राखेपछि अनौपचारिक रुपमा खोल्ने सहमति बनेको थियो ।

विराटनगर महानगरपालिकाका मेयर भीम पराजुललीले स्वास्थ्य सतर्कता अपनाएर खोल्ने सहमति भएको र त्यसको अनुगमन जिल्ला प्रहरी कार्यालय र महानगरले गर्ने सहमति बनेको बताएका थिए ।

विराट व्यापार संघका अध्यक्ष सुजन थापाले विराटनगर बजार बिहान ६ बजेदेखि मध्यान्ह १२ बजेसम्म खुलेको तर बजारमा चहलपहल भने न्यून रहेको बताए । बजार खुले पनि पहिलेको जस्तो चहलपहल हुने अवस्था नभएको थापाको भनाइ छ । ‘कोरोनाको डर ग्राहकलाई पनि छ । त्यसैले भीडभाडमा जान हुन्न दूरी कायम राख्नुपर्छ भन्ने जानेर नै बजारमा ग्राहकको भीड कम भएको छ,’ थापाले भने ।

प्रकाशित : जेष्ठ २३, २०७७ १३:४५
प्रतिक्रिया
पठाउनुहोस्

‘उद्योग चलाउने वातावरण भएन’

सरकारले उद्योग सञ्चालन गर्न निर्देशन दिए पनि प्रशासनबाट पर्याप्त सहयोग नपाइएको गुनासो
विनोद भण्डारी

विराटनगर — सरकारले कार्यविधि बनाएर उद्योग सञ्चालन गर्न भने पनि तीन तहको सरकार र स्थानीय प्रशासनबीच समन्वय हुन नसक्दा सम्बद्ध उद्योगी रुष्ट बनेका छन् । उनीहरूले उद्योगमैत्री कार्यविधि नभए आंशिक खुलेका उद्योगसमेत बन्द गर्ने चेतावनी दिएका छन् ।

सरकारको निर्णयपछि जिल्ला प्रशासन कार्यालय मोरङले बजार, सवारी र उद्योग सञ्चालनको समयसीमा सार्वजनिक गरेको छ । उक्त समयसीमालाई उद्योगीहरूले परिमार्जन हुनुपर्ने र उद्योग सञ्चालनका लागि स्पष्ट नीतिसहितको कार्यविधि आउनुपर्ने माग गरेका छन् । वडाध्यक्षदेखि प्रदेशसभा सदस्यसमेतमा उद्योगमैत्री दृष्टिकोण नभएका कारण उद्योगीहरूले दु:ख पाइरहेको उद्योग संगठन मोरङका अध्यक्ष भीम घिमिरेले आरोप लगाए ।

सरकारले बनाएको कार्यविधिमा १० जनाभन्दा बढी कामदारलाई उद्योगमा काम गराउन नपाइने, उद्योगबाट बैंक जाने, भन्सार जाने कर्मचारीलाई पासको व्यावस्था नभएको र उद्योगबाट निस्कने तयारी वस्तुका लागि बिहानदेखि बेलुकासम्मको समय दिनुपर्नेमा बेलुका ६ बजेबाट बिहान नौ बजेसम्म ढुवानी अनुमति दिइनु अव्यावहारिक रहेको उनले बताए । उद्योग सञ्चालन गर्न कम्तीमा ५० जना कामदार चाहिने तर त्यसका लागि कार्यविधि मौन रहेको घिमिरेको भनाइ छ ।

कार्यविधि उद्योग र व्यवसायीमैत्री नभएकाले तत्काल अर्काे कार्यविधि नआए उद्योग बन्द गर्नुको विकल्प नरहेको उनले बताए । उद्योग सञ्चालन भए पनि बजारको अभाव रहेको र सातामा एउटा एउटा आइटमका पसल खुले मात्र उद्योगका उत्पादन बिक्री हुने अवस्था आउने उनको भनाइ छ । सातामा एक दिन हार्डवेयर, दोस्रो दिन गार्मेन्ट, तेस्रो दिन जुत्ताचप्पल, चौथो दिन किरानालगायत पसल पालैपालो खुले बजारमा भीड कम हुने र उद्योगका उत्पादनले बजार पनि पाउने उनको भनाइ छ ।

सरकारले खाद्यान्न उद्योगका गाडी नरोक्ने भने पनि प्रहरीले बाटोबाटोमै गाडी रोक्ने र सीडीओको पास माग्ने गरेकाले प्रत्येक गाडीलाई भनसुनको भरमा छुटाउनुपर्ने बाध्यता आइपरेको घिमिरेले बताए । ‘सरकारको कार्यविधि नै कानुनसरह लागू हुनुपर्नेमा त्यस्तो हुन सकेको छैन,’ उनले भने ।

मोरङ व्यापार संघका अध्यक्ष प्रकाश मुन्दडाले पनि प्रशासनले जारी गरेको कार्यविधिप्रति असहमति जनाए । कुनै पनि ग्यारेज एवं पेट्रोल पम्प एक जनाले सञ्चालन गर्न नसक्ने तर कार्यविधिमा भने एक जानलाई मात्र अनुमति दिने नियम अव्यावहारिक रहेको उनको भनाइ छ ।

उद्योग सञ्चालनका लागि अनुमति दिएर मात्र नहुने र कच्चापदार्थ बाहेकका सहायक वस्तु उत्पादन गर्ने उद्योग पनि सञ्चालन अनुमति दिनुपर्ने उद्योगी प्रदीप मुरारकाले बताए । तेल उद्योग सञ्चालन गर्ने अनुमति दिएर प्याकिङ गर्ने टिना उद्योग र कार्टाेन उद्योग चल्न नदिए त्यसको अर्थ नहुने उनको भनाइ छ ।

सरकारले मजदुर आवतजावतका लागि पासको व्यवस्था गर्न नसकेको, कच्चापदार्थ र तयारी वस्तु ढुवानीका लागि सहज वातावरण बनाउन नसकेको, बैंकिङ र भन्सार कारोबारमा जानेलाई पास दिन प्रशासनले अस्वीकार गरेकाले उद्योग सञ्चालनमा समस्या आएको व्यापार संघका पूर्वअध्यक्ष पवनकुमार सारडाको गुनासो छ । सुनसरी मोरङ औद्योगिक करिडरमा जुट, धागो, चाउचाउ, तेल, चामल, दूध, साबुन, कुकिज, दाना उत्पादन गर्ने उद्योग सञ्चालनमा छन् । तिनले २० देखि ४० प्रतिशत मात्र उत्पादन गरिरहेको उनले बताए ।

सुनसरीको खनारमा रहेको रिलायन्स स्पिनिङ मिल्सका टाइम अधिकृत जीवन बुढाथोकीले उद्योगमा सञ्चित कच्चापदार्थ प्रयोग गरी उद्योगले वस्तु उत्पादन थालेको जानकारी दिए । एक सातादेखि सञ्चालनमा रहेको उद्योगमा कार्यरत कर्मचारीलाई उद्योग परिसरमा राख्ने व्यवस्था मिलाइएको उनले बताए । उद्योगमा अहिले १ सयभन्दा बढी मजदुर कार्यरत छन् । करिडर क्षेत्रका उद्योगहरूमा ५० हजार मजदुर र कर्मचारी कार्यरत छन् ।

करिडोरका जुट प्याकेजिङ, चाउचाउ, पेय पदार्थ उत्पादन गर्ने उद्योग सञ्चालनमा आएका छन् । त्यसबाहेक सिमेन्ट, स्टिल र वायर्स उद्योगले मेसिन परीक्षणको प्रक्रिया थालेका छन् ।

प्रकाशित : जेष्ठ ४, २०७७ ०७:३९
पूरा पढ्नुहोस्
प्रतिक्रिया
पठाउनुहोस्
×