इटहरीका बजार बिहीबारदेखि खुल्ने- प्रदेश १ - कान्तिपुर समाचार

इटहरीका बजार बिहीबारदेखि खुल्ने

सुम्निमा चाम्लिङ

इटहरी — सुनसरीको इटहरी उपमहानगरपालिका क्षेत्रका बजार बिहीबारदेखि खुल्ने भएका छन् । स्वास्थ्य सुरक्षाका सावधानी अपनाएर बजार खोलिने भएको हो ।

बुधबार बसेको इटहरी उपमहानगरपालिका, उद्योग वाणिज्य संघ इटहरी साथै स्थानीय प्रशासनबीचको बैठकले बजार खोल्ने निर्णय गरेको हो ।

सामाजिक दूरी कायम गर्ने गरी बिहान ७ बजेदेखि १० बजेसम्म बजार खोल्न पाइने उपमहानगरले जनाएको छ । इटहरीमा निजी सवारीसाधनसमेत चलाउन पाइने भएको छ ।

सरकारले कोरोना संक्रमण फैलन नदिन लागू गरेको लकडाउनका कारण नगरमा अत्यावश्यक पसल र औषधि पसलहरु मात्र खुल्दै आएका छन् ।

शैक्षिक संस्था, होटल, मन्दिर, शैलुन, ब्युटीपार्लर, फिटनेस क्लब, सिनेमा हल लगायत बाक्लो जमघट हुने स्थानहरु भने खुल्ने छैनन् ।

प्रकाशित : जेष्ठ २१, २०७७ १४:१०
प्रतिक्रिया
पठाउनुहोस्

युवकको हत्या आरोपमा तीन जना पक्राउ

सुम्निमा चाम्लिङ

इटहरी — एक युवकको हत्या आरोपमा प्रहरीले तीजनालाई पक्राउ गरेको छ । इटहरी उपमहानगरपालिका २० का २८ वर्षीय राजन राईको हत्याको आरोपमा इलाका प्रहरी कार्यालयको टोलीले उनीहरुलाई पक्राउ गरेको हो ।

मोरङको कानेपोखरीका २० वर्षीय प्रज्‍ज्‍वल तामाङ, इटहरीका १९ वर्षीय अभिषेक केसी, र २३ वर्षीय अभिषेक पौडेल पक्राउ परेका हुन्।

प्रहरीका अनुसार गत जेठ १८ गते राति प्रज्‍ज्‍वल राई र राजन राईबीच सामान्य विवाद भएको थियो । त्यसपछि राजन आफनो घर फर्कने क्रममा बाटोमा ढुकेर बसेका ती युवकहरुले कुटपिट गरेका थिए ।

बाँसको लाठीले अन्धाधुन्द पिट्नुका साथै चक्कुले कोखा र छातीमा प्रहार गरको पाइएको प्रहरीले जनाएको छ ।

सिकिस्त घाइते भएका राजनलाई स्थानीयले उद्धार गरी उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पुर्‍याएका थिए ।उपचारका क्रममा उनको त्यहीँ मृत्यु भएको इलाका प्रहरी कार्यालय इटहरीले जनाएको छ ।

घटनाको अनुसन्धानका लागि इलाका प्रहरी र प्रदेश १ प्रहरी कार्यालयको टोली खटिएको जनाइएको छ ।

सम्बन्धित समाचार

इटहरीमा छुरा प्रहारबाट युवकको मृत्यु

प्रकाशित : जेष्ठ २०, २०७७ ११:२५
पूरा पढ्नुहोस्
प्रतिक्रिया
पठाउनुहोस्
×