मंगलबारसम्म जोगबनी नाकाबाट ११ सय ६६ भित्रिए, १३ सय ५७ बाहिरिए

कान्तिपुर संवाददाता

विराटनगर — गत बुधबारदेखि नाकामा अलपत्र परेकाहरुलाई भित्र्याउन सुरु गरेयता जोगबनी नाकाबाट १ हजार १ सय ६६ जना नेपाली भित्रिएका छन् । भारतका विभिन्‍न स्थानबाट आएकाहरुलाई प्रहरीले नेपाल प्रवेश गराएको हो ।

यसैगरी नेपालमा रहेका १ हजार ३ सय ५७ जनालाई जोगबनी नाका हुँदै भारततिर पठाइएको छ। संक्रमण फैलन रोक्न लागू गरिएको लकडाउनका कारण अप्ठ्यारोमा परेपछि भारतमा रहेका नेपाली आइरहेका छन् ।

सातायता जोगबनी नाकाबाट प्रवेश गर्ने नेपालीको संख्या १ हजार १ सय ६६ पुगेको छ । यसैगरी उक्त नाकाबाट मंगलबारसम्म १ हजार ३ सय ५७ जना भारतीय नागरिक भारतर्फ गएका छन् ।

विभिन्न नाका हुँदै लुकिछिपी प्रवेश गर्ने क्रम नरोकिएपछि गत बुधबारबाट दुबै देशका प्रहरीको समन्वयमा प्रवेश गराउन थालिएको थियो ।

मोरङका प्रहरी नायब उपरीक्षक मानबहादुर राईका अनुसार नाकामा आएर रोकिएकालाई भारतीय प्रहरीसँग समन्वयमा प्रवेश गराउने गरिएको छ । प्रदेश १ का झापाको काँकडभिट्टा, इलामको पशुपतिनगर, सुनसरीको भान्टाबारीलगायत नाकाहरुबाट पनि नेपाली भित्रने क्रम जारी छ ।

प्रकाशित : जेष्ठ २०, २०७७ २०:५६
प्रतिक्रिया
पठाउनुहोस्

प्यूठानमा पहिलो पटक देखियो कोरोना संक्रमण

गिरुप्रसाद भण्डारी

प्यूठान — प्यूठानमा पहिलो पटक कोरोना संक्रमण देखिएको छ । स्वर्गद्वारी नगरपालिका ४ भिगृस्थित अमर क्याम्पसको क्‍वारेन्टाइनमा बसेका ५९ वर्षीय पुरुषमा कोरोना पोजिटिभ देखिएको हो । उनी जेठ १३ गते भारतको चेन्‍नाइबाट आएका हुन् । उनलाई सामान्य ज्वारो आएकाले जेठ १७ गते स्वाब निकालेर पीसीआर परीक्षणका लागि राप्ती स्वास्थ्य विज्ञान प्रतिस्ठान दाङ पठाइएको थियो । 

अमर क्याम्पसका ३ जनाको स्वाब संकलन गरी पठाएकामध्ये १ जनाको मात्र कोरोना देखिएको जिल्ला स्वास्थ्य कार्यालय प्यूठानमा प्रमुख विशाल सुवेदीले जानकारी दिए । मंगलबार बेलुकाबाटै उनलाई नगरपालिकाले निर्माण गरेको आइसोलेसन कक्षमा राखिएको नगर प्रमुख नेत्रबहादुर रोकायाले बताए । रोकायाकाअनुसार संक्रमण देखिएका पुरुषको स्वास्थ्य अवस्था सामान्य छ ।

जिल्लमा विभिन्न क्वारेन्टाइनमा बसेका ३२७ जनाको पीसीआर रिपोर्ट आउन अझै बाँकी रहेको जिल्ला स्वास्थ्य कार्यालय प्यूठानले जनाएको छ ।

प्रकाशित : जेष्ठ २०, २०७७ २०:२९
पूरा पढ्नुहोस्
प्रतिक्रिया
पठाउनुहोस्
×