प्रदेश १ का हालसम्म ४८ जना डिस्चार्ज, ११९ आइसोलेसनमा

कान्तिपुर संवाददाता

विराटनगर — कोरोना संक्रमण पुष्टि भएपछि आइसोलेसनमा बसेकामध्ये प्रदेश १ का ४८ जना निको भएर डिस्चार्ज भएका छन् । संक्रमितमध्ये अब १ सय १९ जना आइसोलेसनमा उपचाररत छन् । प्रदेश १ का १४ मध्ये ९ वटा जिल्लामा संक्रमण पुष्टि भइसकेको छ ।

ती जिल्लामा गरी १ सय ६७ जनामा संक्रमण पुष्टि भएको प्रदेश सरकारले जनाएको छ ।

पछिल्लोपटक धरानस्थित बीपी कोइराला स्वास्थ्य विज्ञान प्रतिष्ठानबाट मंगलबार १८ जना डिस्चार्ज भएका हुन् । यसअघि विराटनगरस्थित कोभिड–१९ उपचार केन्द्रबाट विभिन्न मितिमा गरी ३० जना डिस्चार्ज भइसकेको प्रदेश १ सामाजिक विकास मन्त्रालयले जनाएको छ ।

बीपी प्रतिष्ठानबाट डिस्चार्ज हुनेमा झापाका १७ जना छन् । सुनसरीकी एक महिला पनि डिस्चार्ज गरिएकी हुन् । पछिल्लो पटक गरिएको स्वाब नमुना परीक्षणमा कोरोना संक्रमण नदेखिएपछि उनीहरुलाई डिस्चार्ज गरिएको प्रतिष्ठानले जनाएको छ ।

प्रदेश १ मा संक्रमण पुष्टि भएकाको संख्या १ सय ६७ छ । संक्रमितमध्ये अब ८० जना बीपी कोइराला स्वास्थ्य विज्ञान प्रतिष्ठान धरान र ३९ जना विराटनगरस्थित कोभिड–१९ उपचार केन्द्रमा चिकित्सकको रेखदेखमा राखिएको प्रदेश सरकारले जनाएको छ ।

प्रदेश १ का १४ मध्ये ९ जिल्लामा संक्रमण पुष्टि भइसकेको छ । झापा, उदयपुर, धनकुटा, मोरङ, सुनसरी, भोजपुर, खोटाङ, संखुवासभा र सोलुखुम्बुमा संक्रमण पुष्टि भएको हो । संक्रमितमध्ये अधिकांश भारतबाट आएका व्यक्तिहरु छन् । भारतबाट आएकाहरुमा संक्रमण पुष्टि हुनेक्रम बढेसँगै नाकाबाट ल्याएर क्वारेन्टाइनमा राख्ने र जाँच गर्ने गर्न थालिएको सामाजिक विकास मन्त्रालयले जनाएको छ ।

प्रकाशित : जेष्ठ २०, २०७७ १६:०३
प्रतिक्रिया
पठाउनुहोस्

रौतहटमा थप ७४ जनामा कोरोना 

शिव पुरी

रौतहट — रौतहटमा मंगलबार थप ७४ जनामा कोरोना पुष्टि भएको छ । भारतबाट आएर क्वारेन्टाइनमा बसेकाहरुमा संक्रमण देखिएको हो । रौतहटका प्रमुख जिल्ला अधिकारी बासुदेव घिमिरेका अनुसार गौर नगरपालीकामा १३, दुर्गाभगवती गाउँपालिकामा १४, राजपुर नगरपालिकामा २१, गढिमाई नगरपालिकामा १, परोहामा ४, राजदेवीमा १८, यमुनामाइमा ३ जनामा संक्रमण देखिएको हो । 

योसमेत जिल्लामा संक्रमितको संख्या ३ सय ७ पुगेको छ । तीनजना निको भएर घर फर्केका छन् ।

काठमाडौंको टेकुस्थित जनस्वास्थ्य प्रयोगशालमा गरिएको परीक्षणमा ३६ र धुलिखेलमा गरएिको परीक्षण्मा ३८ जनामा संक्रमण पुष्टि भएको प्रजिअ घिमिरले जनाए ।

संक्रमितहरु भारतको दिल्ली, मुम्बई, केरला, हरियाणालगायतका स्थानमा काम गर्न गएका थिए । पछिल्लो समय भारतमा लकडाउन खुकुलो भएपछि उनीहरु नेपाल फर्किएका हुन् । अहिले भारतबाट फर्केका झण्डै ८ हजारजना जिल्लाका क्वारेन्टाइनमा छन् ।

‘संक्रमण देखिएकाहरु सबैको स्वास्थ्य अवस्था समान्य छ । संक्रमितलाई आइसोलेसनमा राख्ने तयारी हुँदैछ,’ प्रजिअ घिमिरले भने ।

प्रकाशित : जेष्ठ २०, २०७७ १६:०२
पूरा पढ्नुहोस्
प्रतिक्रिया
पठाउनुहोस्
×