जोगबनीबाट भित्रिने र बाहिरिने बराबरी- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

जोगबनीबाट भित्रिने र बाहिरिने बराबरी

सातायता जोगबनीबाट प्रवेश गर्ने नेपालीको संख्या १ हजार १ सय ८ छ भने १ हजार १ सय २७ भारतीय उता गएका छन् ।
माधव घिमिरे

विराटनगर — कोरोना संक्रमण रोक्न लागू गरिएको लकडाउनका कारण अप्ठ्यारोमा परेपछि भारतमा रहेका नेपाली आउने क्रम जारी छ । सीमा–नाकानजिक आएका उनीहरूलाई प्रहरीले नेपाल भित्र्याउने गरिरहेको छ ।

यसै गरी नेपालमा रहेका भारतीय नागरिकलाई पनि भारततर्फ पठाइएको छ । सातायता जोगबनी नाकाबाट नेपाल प्रवेश गर्ने र बाहिरिनेको संख्या लगभग बराबर देखिएको छ ।

एक साताको अवधिमा जोगबनी नाका भएर हजारभन्दा बढी नेपाली प्रवेश गरेका छन् । भारतीयहरू पनि हजारभन्दा बढी उता गएका छन् । दुवैतर्फका सुरक्षाकर्मीको समन्वयमा एक–अर्का देशका नागरिकलाई नाकाबाट प्रवेश गराएर उनीहरूको ठेगानामा पठाउने काम भइरहेको जनाइएको छ । नेपाल भित्रिएकाहरूलाई तत्काल ‘होल्डिङ सेन्टर’ मा राख्ने अनि जाँचपछि सम्बन्धित स्थानीय तहमा पठाउने गरिएको मोरङ प्रहरीले जनाएको छ ।

सातायता जोगबनी नाकाबाट प्रवेश गर्ने नेपालीको संख्या १ हजार १ सय ८ छ । यसै गरी उक्त नाकाबाट १ हजार १ सय २७ भारतीय गएका छन् । भारतका विभिन्न स्थानमा रहेका नेपाली फर्केर नाकानजिक आएकाले उनीहरूलाई उद्धार गरी भित्र्याइएको प्रहरीले जनाएको छ । यसै गरी नेपालका विभिन्न स्थानमा मजदुरी गरिरहेका तर लकडाउनका कारण कामविहीन बनेका भारतीय नागरिक पनि घर फर्किरहेका छन् ।

विभिन्न नाका हुँदै लुकिछिपी प्रवेश गर्ने क्रम नरोकिएपछि गत बुधबारबाट दुवै देशका प्रहरीको समन्वयमा प्रवेश गराउन थालिएको हो । प्रहरी नायब उपरीक्षक मानबहादुर राईका अनुसार नाकामा आएर रोकिएकालाई समन्वयमा प्रवेश गराउने गरिएको छ ।

यसै गरी प्रदेश १ का झापाको काँकडभिट्टा, इलामको पशुपतिनगर, सुनसरीको भान्टाबारीलगायत नाकाबाट पनि नेपाली भित्रने क्रम जारी छ । संक्रमण फैलिएसँगै चैत ११ मा नेपालमा लकडाउन लागू गरिएको थियो । लकडाउन सुरु हुनु अघिल्लो साता भारतबाट प्रदेश १ हुँदै नेपाल प्रवेश गर्नेको संख्या २ लाखभन्दा बढी रहेको प्रदेश १ प्रहरी कार्यालयले जनाएको छ ।

लकडाउन सुरु भएपछि पनि चैत ११, १२ र १३ गते भारतबाट हजार हाराहारीमा नेपाली आएको तथ्यांक छ । त्यसयता करिब दुई महिनाको अवधिमा लुकिछिपी विभिन्न नाकाबाट प्रवेश गर्ने क्रम बढेको थियो । तिनको यकिन तथ्यांक छैन ।

प्रकाशित : जेष्ठ २०, २०७७ ०८:४०
प्रतिक्रिया
पठाउनुहोस्

प्रदेश १ का ९ जिल्लामा संक्रमित पुष्टि

माधव घिमिरे

विराटनगर — प्रदेश १ मा संक्रमितको संख्या १ सय ६० पुगेको छ । १४ जिल्लामध्ये ९ वटामा संक्रमण पुष्टि भएको छ । शनिबार संखुवासभाका दुई र झापाका एकजनामा संक्रमण पुष्टि भएको हो ।

भारतबाट आएका उनीहरुको स्वाब नमुना धरानस्थित बीपी कोइराला स्वास्थ्य विज्ञान प्रतिष्ठानमा गरिएको थियो ।

प्रदेशका तीन स्थानमा परीक्षण गरिँदै आएको छ । धरानस्थित बीपी कोइराला स्वास्थ्य विज्ञान प्रतिष्ठानमा हालसम्म ३ हजार ३ सय १ जनाको परीक्षण गरिएको छ ।

यसैगरी, विराटनगरस्थित कोसी अस्पतालमा ९ सय ८ जनाको एवं प्रादेशिक प्रयोगशालामा १ सय १३ जनाको नमुना परीक्षण गरिएको प्रदेश सरकारले जनाएको छ । प्रदेश १ मा पुष्टि भएका संक्रमितमध्ये ३० जना उपचारपछि निको भएर डिस्चार्ज गरिएका छन् । आइसोलेसनमा बस्नेको संख्या १ सय ३० छ ।

प्रदेशभरका विभिन्न स्थानीय तहमा रहेका क्‍वारेन्टाइनमा बस्नेको संख्या ३ हजार ६ सय ६१ पुगेको छ । दिनहुँजसो जोगबनी लगायत नाका हुँदै भारतबाट मानिसहरु भित्रिरहेका छन् । भारतबाट आउनेक्रम शनिबार पनि जारी रह्यो । मोरङ प्रहरीका अनुसार जोगबनी नाकाबाट १ सय ७८ जनालाई प्रवेश गराइएको छ ।

यसैगरी १ सय ८२ जना भारतीयलाई जोगबनी नाका हुँदै भारततिर पठाइएको छ । प्रदेश १ मा संक्रमित भेटिएका जिल्लाहरुमा झापा, उदयपुर, धनकुटा, मोरङ, सुनसरी, संखुवासभा, भोजपुर, खोटाङ र सोलुखुम्बु हुन् ।

प्रकाशित : जेष्ठ १७, २०७७ २०:१७
पूरा पढ्नुहोस्
प्रतिक्रिया
पठाउनुहोस्
×