प्रदेश १ मा संक्रमितको संख्या १ सय ५८ पुग्यो

सबैभन्दा बढी झापाका १०७ मा संक्रमण
माधव घिमिरे

विराटनगर — प्रदेश १ मा संक्रमितको संख्या १ सय ५८ पुगेको छ । शुक्रबार झापाका थप २८ जनामा संक्रमण पुष्टि भएको हो । प्रदेश १ मा १४ जिल्लामध्ये ८ जिल्लामा संक्रमण देखिएको छ ।

धरानस्थित बीपी कोइराला स्वास्थ्य विज्ञान प्रतिष्ठान र विराटनगरको कोसी अस्पतालको प्रयोगशालामा गरिएको परीक्षणका क्रममा झापाको केचनाकवलका २७ र भद्रपुरका एकजनामा संक्रमण पुष्टि भएको प्रदेश सरकारले जनाएको छ । यसअघि बिहीबार झापा कचनाकवलकै २५ जनामा संक्रमण पुष्टि भएको थियो ।

प्रदेश १ को सबैभन्दा बढी संक्रमण झापामा देखिएको छ । त्यहा“ शुक्रबार सा“झसम्म संक्रमितको संख्या १ सय ७ पुगेको छ । उदयपुरमा ३३, धनकुटामा ७, मोरङमा ५, सुनसरीमा ३ र भोजपुर, खोटाङ र सोलुखुम्बुमा एक–एक जनामा संक्रमण पुष्टि भएको सामाजिक विकास मन्त्रालयले जनाएको छ ।

संक्रमितमध्ये ३० जना उपचारपछि निको भएर डिस्चार्ज गरिएका छन् । उपचारमा ६ महिलनासहित १ सय १ जना रहेको प्रदेश १ मुख्यमन्त्री तथा मन्त्रिपरिषदको कार्यालयले जनाएको छ । डिस्चार्ज भएकामा उदयपुरका ३३ मभ्ये २७ जना, झापाका दुईजना र भोजपुरका एकजना छन् ।

झापाको केचनाकवलमै मात्र शुक्रबार थपिएकासहित संक्रमण हुनेको संख्या सय पुगेको छ । उक्त स्थानमा रहेका २५ जनामा बिहीबार संक्रमण पुष्टि भएको थियो । भारतबाट आएर क्वारेन्टाइनमा बसेकाहरुमा संक्रमण देखिएपछि उक्त स्थानबाट अढाइ सयभन्दा बढी व्यक्तिको स्वाब नमुना संकलन गरी परीक्षणका लागि प्रयोगशाला पठाइएको छ । अरुको रिपोर्ट आउन बाँकी छ ।

भारतबाट आएका समूहमध्ये सुरुमा एक युवकका संक्रमण पुष्टि भएको थियो । त्यसपछि थप व्यक्तिहरुको नमुना संकलन गरी परीक्षणको काम भइरहेको प्रदेश सरकारले जनाएको छ । उक्त स्थानमा देखिएका अधिकांश संक्रमित भारतबाट आएकाहरु छन् ।

प्रकाशित : जेष्ठ १६, २०७७ २०:५०
प्रतिक्रिया
पठाउनुहोस्

सैनिक हवाई महानिर्देशनालयका पूर्व महानिर्देशक श्रेष्ठले अनियमितता गरेको ठहर 

श्रेष्ठसँग ५८ लाख ९५ हजार ५ सय ९० असुलउपर गर्ने 
जगदीश्वर पाण्डे

काठमाडौँ — सैनिक हवाई महानिर्देशनालयका पूर्व महानिर्देशक उपरथी (अवकाश प्राप्त) सुधीर श्रेष्ठले आर्थिक अनियमितता गरेको सैनिक अदालतले ठहर गरेको छ । 

समरी जनरल सैनिक अदालतले तत्कालीन सैनिक हवाई महानिर्देशक पाइलट श्रेष्ठ महानिर्देशक रहेको अवधिमा ओहदाअनुसार कानुनत पालना गर्नु पर्ने प्रकृया र दायित्व पूरा नगरि अनियमितता गरेको फैसला गरेको हो ।

सैनिक ऐन बमोजिम श्रेष्ठसँग ५८ लाख ९५ हजार ५ सय ९० असुलउपर गर्ने र नसिहत दिने निर्णयसमेत सैनिक अदालतले गरेको छ । श्रेठलाई सैनिक हवाई महानिर्देशनालय, गौचरमा कार्यरत रहँदा सम्पत्ति र अनुशासन तथा आचरण सम्बन्धी कसूर गरेको अभियोगमा सैनिक ऐन–२०६३ अनुसार कारबाही गरिएको हो । सेनाका अनुसार श्रेष्ठले रकमको कुनै हिसाब किताब नराखी आर्थिक अनियमितता गरेको देखिएको हो ।

सोही मुद्दामा आठजना अधिकृतहरुले आफूलाई प्राप्त जिम्मेवारीलाई प्रभावकारी रुपमा सम्पादन नगरेको ठहर गरि सचेत गराउने गरि फैसला पनि भएको छ । एकजना अधिकृत र नौजना अन्य दर्ताका सैनिकहरुलाई भने सैनिक अदाललले सफाई दिएको छ ।

सैनिक हवाई महानिर्देशनालयमा विभिन्न किसिमका कमि कमजोरी भएको भन्ने सम्बन्धमा सत्यतथ्य छानबिन गर्न रथी शरद गिरीको अध्यक्षतामा गठित कोर्ट अफ इन्क्वायरी बोर्ड २०७६ साल चैत ४ गते गठन गरिएको थियो । उक्त बोर्डको रायसहितको प्रतिवेदनको आधारमा उक्त महानिर्देशनालयका तत्कालिन महानिर्देशक पाइलट उपरथी श्रेष्ठसहित १९ जनामाथि सम्पत्ति र अनुशासन तथा आचरण सम्बन्धी कसूर गरेको मुद्दा पुर्पक्ष गर्न रथीको अध्यक्षतामा गठित समरी जनरल सैनिक अदालतले जेठ १४ मा फैसला सुनाएको थियो । सो फैसला शुक्रबार सम्बन्धितहरुलाई सुनाईको सेनाले जनाएको छ ।

महानिर्देशक रहँदा कानुनत पालना गर्नुपर्ने प्रकृया र दायित्व पूरा नगरि सैनिक ऐनविरुद्ध काम गरेको अदालतको ठहर छ ।

प्रकाशित : जेष्ठ १६, २०७७ २०:४७
पूरा पढ्नुहोस्
प्रतिक्रिया
पठाउनुहोस्
×