जोगबनी नाकाबाट थप ९५ आए, २०८ बाहिरिए

माधव घिमिरे

विराटनगर — भारतका विभिन्न स्थानबाट आएका थप ९५ जना नेपाली जोबगनी नाकाबाट प्रवेश गराइएका छन् । मोरङ प्रहरीका अनुसार बिहीबार त्यति संख्यामा आएइकाहरुलाई प्रवेश गराइएको हो । यसैगरी नेपालमा रहेका २ सय ८ जनालाई उक्त नाका भएर भारततिर पठाइएको छ ।

यसअघि बुधबार ३ सय ४ जनालाई प्रवेश गराइएको थियो । जोगबनी नाकाबाट भित्रिएकामा उत्तरपूर्वी ताप्लेजुङदेखि पश्चिमको गोर्खासम्मका व्यक्तिहरु छन् । भित्रनेहरुमा ३५ जना बालबालिका रहेको मोरङ प्रहरीले जनाएको छ । भारतबाट आएकाहरुमा मोरङ, सुनसरी, उदयपुर, गोर्खा, सप्तरी, झापा, पाँचथर, ताप्लेजुङ, चितवन रुकुम र स्याङजाका समेत छन् ।

नेपाल प्रवेश गराइएकाहरु कतिपयलाई सीमानजिकका ‘होल्डिङ सेन्टर’ मा राखिएको छ । अन्यलाई उनीहरुको ठेगाना रहेको जिल्ला र स्थानीय तहमा पठाइएको प्रहरीले जनाएको छ ।

भारतबाट भित्रने क्रम बढेपछि मोरङका ४३ स्थानमा बनाइएका क्वारेन्टाइनमा बस्नेको संख्या पनि बढेको छ । भारतबाट आएकाहरु थपिएपछि क्वारेन्टाइनमा बस्नेको संख्या ७ सय ४० पुगेको छ । यसअघि क्वारेन्टाइमा बसिरहेकाको संख्या ९ सय ९८ थियो । तीमध्ये २ सय ५८ जनालाई सम्बन्धित स्थानीय तहमा पठाइएको प्रहरीले जनाएको छ ।

प्रदेश १ मा संक्रमितको संख्या १ सय २९ पुगेको छ । बिहीबार साँझ झापाको कचनकवलका थप २५ जनामा संक्रमण पुष्टि भएपछि संक्रमितको संख्या बढेको हो । बिहीबार पुष्टि भएका संक्रमित झापाको कचनाकवलका हुन् । प्रदेश १ मै सबैभन्दा बढी झापाको उक्त गाउँपालिकाका व्यक्तिहरु छन् । ती भारतको मुम्बईलगायत स्थानबाट घर फर्केका थिए ।

यसअघि प्रदेशका सातवटा जिल्लामा संक्रमण देखिएको थियो । पछिल्लो पटक सोलुखुम्बुमा एक जनामा संक्रमण पुष्टि भएपछि जिल्ला थपिएर ८ पुगेको छ । प्रदेश १ मा १४ जिल्ला छन् ।

प्रदेश १ मुख्यमन्त्री तथा मन्त्रिपरिषद् कार्यालयका अनुसार झापा ७७, उदयपुर ३३, धनकुटा ७, मोरङ ६, सुनसरी ३, खोटाङ, भोजपुर र सोलुखुम्बु १–१ जना संक्रमित पुष्टि भएका हुन् ।

संक्रमितहरु अधिकांश भारतबाट आएका व्यक्तिहरु हुन् । केही स्थानीयमा पनि संक्रमण देखिएको छ । उनीहरुमा कसरी संक्रमण भयो भन्नेबारे अध्ययन भइरहेको जनाइएको छ । उदयपुरका संक्रमित ३३ मध्ये २७ जना उपचारपछि डिस्चार्ज गरिएका छन् । यस्तै झापाका दुईजना र भोजपुरका एकजना पनि उपचारपछि डिस्चार्ज गरिएको प्रदेश सरकारले जनाएको छ ।

प्रकाशित : जेष्ठ १६, २०७७ १०:४८
प्रतिक्रिया
पठाउनुहोस्

सुर्खेतबाट ८ सय ८० स्वाब जुम्ला पठाइयो

कलेन्द्र सेजुवाल

वीरेन्द्रनगर — माथिल्लो कर्णालीका जिल्लाको स्वाब परीक्षण गर्दै आएको जुम्लास्थित कर्णाली स्वास्थ्य विज्ञान प्रतिष्ठानमा सुर्खेतबाट समेत थप स्वाब पठाउन थालिएको छ । प्रदेश स्वास्थ्य सेवा निर्देशनालयले बिहीबार ८ सय ८० स्वाब जुम्ला पठाएको जनाएको छ ।

निर्देशनालयका निर्देशक रीता भण्डारीका अनुसार पठाइएका स्वाब दैलेख र सुर्खेतका हुन् । २ सय ४५ स्वाब सुर्खेतबाट र थप स्वाब दैलेखको दुल्लु तथा महाबु क्षेत्रबाट पठाइएका उनले बताइन् । ‘सुर्खेत प्रदेश प्रवेश गर्ने प्रमुख नाका र प्रदेशको केन्द्र भएको हुनाले यताको मेसिनमा भार पनि बढी हुने गरेको छ,’ उनले भनिन्, ‘त्यसैले हामीले जुम्लासँग ‘लोडसेडिङ’ गर्ने योजना बनाएको छौं, फेरि त्यहाँको ‘क्याचमेन्ट एरिया’ सानो भएकोले पनि सहज भएको छ ।’ यसअघि जुम्लाले हुम्ला, जुम्ला, मुगु, डोल्पा (तल्लो क्षेत्र) र कालीकोटका स्वाब परीक्षण गर्दै आएको थियो ।

यसका साथै सुर्खेतको प्रयोगशालामा नयाँ ल्याइएको आरएनए एक्प्रेसन किट र मेसिनको म्याचिङमा क्यालिब्रेसन नमिन्दासमेत परीक्षण प्रभावित भएको छ । निर्देशक भण्डारीका अनुसार अहिले सुर्खेतस्थित प्रयोगशालामा करिब २ सय ४५ स्वाब प्रोसेसमा रहेका छन् भने बिहीबार राति थप केही स्वाब सल्यानबाट आएका छन् । मेसिन र किटबीच म्याचिङ भइहाले पनि स्वाब संख्या अधिक हुँदा जुम्ला पठाउनुपर्ने अवस्था आएको उनले बताइन् ।

प्रतिष्ठानका रजिष्ट्रार विश्वराज काफ्लेले सुर्खेतबाट पठाइएका स्वाब शुक्रबारै परीक्षण गरी रिपोर्ट दिने तयारी भएको बताए । उनका अनुसार वैशाख २२ देखि परीक्षण थालेको जुम्लास्थित प्रयोगशालाले बिहीबारसम्म ३ हजार १ सय २३ नमुना परीक्षण गरेको छ । जुम्लाले काठमाडौंपछि बढी संख्यामा स्वाब परीक्षण गर्दै आएको छ । प्रतिष्ठान आफैले आरटी–पीसीआर मेसिन र प्रयोगशाला सामग्री खरिद गरेर द्रुत रुपमा परीक्षण गरिरहेको उनले बताए ।

कर्णाली प्रदेशमा स्वास्थ्य पूर्वाधारको हिसाबले जुम्लाको अवस्था मजबुत रहेको छ । प्रतिष्ठानको शिक्षण अस्पतालमा कोरोना संक्रमितको लागि १ सय २० आइसोलेसन बेड रहेका छन् । सुर्खेतस्थित प्रदेश अस्पतालमा भने आइसोलेसन बेड संख्या ७० मात्र रहेको छ । जुम्लासहित छिमेकी जिल्लाका संक्रमितलाई पनि उपचार गर्ने गरी तयारी भइरहेको रजिष्ट्रार काफ्लेले बताए ।

प्रकाशित : जेष्ठ १६, २०७७ १०:४५
पूरा पढ्नुहोस्
प्रतिक्रिया
पठाउनुहोस्
×