प्रदेश १ का थप चार जना डिस्चार्ज
विराटनगर — प्रदेश १ का थप चार जना कोरोना संक्रमित बुधबार डिस्चार्ज भएका छन् । यो सँगै डिस्चार्ज हुनेको संख्या प्रदेश १ मा ३० पुगेको छ ।
विराटनगरस्थित कोभिड–१९ उपचार केन्द्रमा राखिएका तीन महिला र एक पुरुषलाई डिस्चार्ज गरिएको हो । उनीहरु उदयपुरका हुन् । पछिल्लो पटक गरिएको स्वाब नमुना परीक्षणमा उनीहरुमा संक्रमण नदेखिएपछि डिस्चार्ज गरिएको जनाइएको छ ।
कोभिड–१९ उपचार केन्द्रमा अब ३१ जना छन् । झापा, धनकुटा, सुनसरीलगायत जिल्लामा संक्रमित भएकाहरुलाई केन्द्रमा राखेर उपचार र हेरचाह भइरहेको प्रदेश १ सामाजिक विकास मन्त्रालयले जनाएको छ । सबैको स्वास्थ्य अवस्था सामान्य रहेको चिकित्सकले बताएका छन् ।
प्रदेश १ मा बुधबार थपिएका झापाका १७ जनासहित संक्रमितको संख्या १ सय ४ पुगेको छ । प्रदेशका १४ मध्ये ७ जिल्लामा संक्रमित फेला परेका छन् । सबैभन्दा बढी झापामा ५४ जना संक्रमित पुष्टि भइसकेका छन् । संक्रमितहरु अधिकांश भारतबाट आएका व्यक्तिहरु हुन् । प्रदेशका झापासहित उदयपुर, धनकुटा, मोरङ, सुनसरी, खोटाङ र भोजपुरमा संक्रमित भेटिएका हुन् ।
पूर्वका विभिन्न नाकाबाट भारतमा रहेका नेपालीहरुलाई भित्र्याउने क्रम सुरु गरिएको छ । मंगलबारमात्र झापा र मोरङका नाकाबाट करिब १३ सयजनालाई भित्र्याइएको छ ।
भारतका विभिन्न स्थानबाट सीमानजिक आएर बसेकाहरुलाई भित्र्याइएको प्रदेश सरकारले जनाएको छ । प्रारम्भिक स्वास्थ्य जाँचपछि उनीहरुलाई विभिन्न क्वारेन्टाइन र ‘होल्डिङ सेन्टर’ मा राखिएको छ ।
प्रकाशित : जेष्ठ १४, २०७७ १६:४३