भारतमा रहेका भोजपुरकालाई जिल्ला ल्याइने

एलिसा श्रेष्ठ

भोजपुर — भारतमा रहेका भोजपुरका मानिसहरुलाई  जिल्ला ल्याउनका लागि तयारी सुुरु गरिएको छ । रोजगारीलगायत विभिन्न सिलसिलामा भारतमा गइ लकडाउनका कारण अड्किएकाहरुलाई जिल्ला ल्याउन तयारी सुरु भएको जिल्ला प्रशासन कार्यालय भोजपुरले जनाएको छ ।  

पहिलो चरणमा नेपाल–भारतका विभिन्न नाकाहरुमा रोकिएर रहेका ४२ भोजपुरेलाई ल्याइने र उनीहरुलाई राख्नका लागि अरुण गाउँपालिका जरायोटारस्थित रानिटारमा अस्थाइ संरचना निर्माण सुरु गरिएको प्रमुख जिल्ला अधिकारी वसन्तराज पुरीले जानकारी दिए ।

प्रमुख जिल्ला अधिकारी पुरीका अनुसार नेपाली सेनाले निर्माण गरिरहेको उक्त संरचना मंगलबार सम्म तयार हुने र सीमामा अलपत्र परेका सबैलाई तत्काल ल्याइने छ । अहिलेसम्म सम्पर्कमा आएका भैरहवाको सुनौली नाकामा रहेका साल्पाशिलिछो गाउँपालिकाका ७ जना र षडानन्द नगरपालिकाका ६ जना, झापाको काँकडभिट्टा नाकामा रहेका पौवादुम्मा गाउँपालिका, अरुण गाउँपालिका, आमचोक गाउँपालिकालगायत गरी ४२ जनालाई ल्याइने बताइएको छ ।

प्रकाशित : जेष्ठ १३, २०७७ १०:२८
प्रतिक्रिया
पठाउनुहोस्

बढी मूल्यमा मल बिक्री गर्ने पसल सिल

एलिसा श्रेष्ठ

भोजपुर — बजार मूल्यभन्दा बढीमा मल बिक्री गर्ने अरुण गाउँपालिका-६ भोर्लाबोटेका भद्रमान भुजेलको किराना पसल सिल गरिएको छ । प्रतिबोरा ७ सय ८५ रुपैयाँ पर्ने युरिया मल २ हजारमा बिक्री गरेको खुलेपछि जिल्ला प्रशासन कार्यालयले पसल सिल गरेको हो ।

अनधिकृत खरिद गरेर महँगोमा किसानलाई बेचेको कुरा खुलेपछि बाँकी मल जफत गरिएको प्रमुख जिल्ला अधिकारी बसन्तराज पुरीले बताए । ‘उक्त मल कहाँबाट ल्याइएको भन्ने पत्ता लगाउन तीन जनाको छानबिन समिति गठन गरिएको छ,' उनले भने, 'समितिले ७ दिनभित्रमा प्रतिवेदन बुझाउनेछ ।’ छानबिन समितिमा सहायक प्रजिअ कृष्णप्रसाद बस्नेत, जिल्ला प्रहरी कार्यालयका इन्स्पेक्टर पाण्डव राजवंशी र कृषि ज्ञानकेन्द्र भोजपुरका कृषि प्रसार विभाग अधिकृत अनिश सुवेदी रहेका छन् ।

६० बोरा मलमध्ये २० बोरा बिक्री गरिसकेकाले बाँकी मल मात्र सिल गर्न सकिएको प्रहरी चौकी जरायोटारका इन्चार्ज भलबहादुर राईले बताए ।

हुलाकका कर्मचारीसमेत रहेका भुजेलले इन्जिनमा समस्या आएपछि रोकिएको ट्रकबाट प्रतिबोरा १८ सयले खरिद गरेर राखेको बताएका छन् । प्रतिबोरा २ हजारले बेचेको उनले स्विकारेका छन् ।

प्रकाशित : जेष्ठ ११, २०७७ १६:०२
पूरा पढ्नुहोस्
प्रतिक्रिया
पठाउनुहोस्
×