कोरोना त्रास भुल्दै भुल्केवासी- प्रदेश १ - कान्तिपुर समाचार

कोरोना त्रास भुल्दै भुल्केवासी

भुल्केवासी भनेपछि बोल्दै नबोल्ने र पैसासमेत नचल्ने अवस्था थियो । बस्ती सिल गरिए पनि अहिले कडाइ छैन । अवस्था सामान्य बन्दै छ ।
डिल्लीराम खतिवडा

उदयपुर — नजिकै घर छन् । तर छिमेकीको भेटघाट नभएको एक महिनाभन्दा बढी भयो । आँगनभन्दा पर जान पाइँदैन । करिब ५० मिटर वरपरबाट अलि चर्को स्वरमा बातचित हुन्छ । गाउँमा सुरक्षाकर्मीको घेरामा छ । गाउँ नै सिल भएका कारण छिमेकीकामा आवतजावत गर्ने बाटोसमेत बन्द छ । 

प्रदेश १ मा पहिलोपटक कोरोना संक्रमण देखिएको उदयपुरको त्रियुगा नगरपालिका–३ भुल्केको अवस्था हो यो ।

‘कस्तो समय आयो, एउटा छिमेकीले अर्कोको घरसम्म जान नपाउने,’ प्रभावित बस्तीसँगै जोडिएको अर्को बस्तीका वासु खतिवडाले भने, ‘छिमेकी बिरामी हुँदा फलफूल लिएर भेट्न जाने र औषधि उपचारका लागि अस्पताल पुर्‍याउन नसकिने रहेछ ।’ ५६ परिवार रहेको बस्तीका केही संक्रमित भई उपचाररत छन् ।

निको भएर आए पनि घर आउन पाएका छैनन् । उनीहरू गाउँभन्दा झन्डै अढाई किलोमिटर टाढा मोतीगढाको क्वारेन्टाइनमा छन् ।

वैशाख ५ गते भुल्केस्थित नूरी मस्जिदमा बस्दै आएका १२ जना जमातीमा पहिलोपल्ट कोरोना संक्रमण देखियो । त्यसयता खाद्यान्न लगायतको अभाव र बढ्दो त्रासले जनजीवन कष्टपूर्ण बन्न पुगेको थियो । तर अहिले क्रमशः सामान्य हुँदै गएको छ । ‘एक्कासि ठूलो संख्यामा कोरोना संक्रमण देखियो,’ स्थानीय अनिश मियाँले भने, ‘त्यसयता सर्वसाधारणमा मनोवैज्ञानिक त्रास कायमै छ ।’ तर विस्तारै विश्वव्यापारी रूपमा फैलिएको महामारीबाट पाठ सिक्दै त्रासभन्दा गुजाराका लागि गरिने दैनिकी, खेतीपाती, व्यापार व्यवसायमा चिन्ता बढेको स्थानीयले बताए ।

मुस्लिम बस्ती भुल्केमा कोरोनासँगै जोडेर जाति, धर्म र समुदायमा पनि खेल्न खोजिएको स्थानीय यदु ढकालले बताए । ‘जात र धर्मलाई जोडेर गाउँमा कोरोना संक्रमण भित्रियोसम्म भनियो,’ उनले भने, ‘तर अहिले त्यो स्थिति पनि हटिसक्यो ।’ सामाजिक सद्भाव कायम गर्न सबै क्षेत्र समुदायले आ–आफ्नो ठाउँबाट भूमिका निर्वाह गरेकाले स्थिति सामान्य हुँदै गएको उनको भनाइ छ ।

भुल्के गाउँ गाईघाट बजारमा हरियो तरकारी आपूर्ति गर्ने मुख्य स्थान हो । सुरुमा भुल्केमा उत्पादन गरिएको तरकारी र दूध नै गाईघाट बजार बिक्री हुन छोडेको थियो । भुल्केवासी भनेपछि बोल्दै नबोल्ने र पैसासमेत नचल्ने अवस्था आएको थियो । तर अहिले त्यो स्थिति नरहेको स्थानीय साविर मियाँले बताए ।

कोरोना संक्रमण फैलिन नदिन स्थानीय प्रशासनले सुरक्षा भने कडा पारेको प्रमुख जिल्ला अधिकारी दीपककुमार पहाडी बताउँछन् । ‘संक्रमितहरू निको हुँदै गएका छन्, नयाँ पोजिटिभ देखिएका छैनन्,’ उनले भने, ‘बस्ती सिल गरिए पनि पहिलेको जस्तो कडाइ भने गरिएको छैन ।’ अब क्रमशः सिल पनि हट्दै जाने र जनजीवनसमेत सामान्य उन्मुख रहेको उनले बताए ।

जिल्ला स्वास्थ्य प्रमुख मोहनप्रसाद सुवेदीले गाउँ सिल गरेकाले भुल्केभन्दा बाहिर संक्रमण नपुगेको जनाए । ‘भुल्के र त्यहाँबाट बाहिर क्वारेन्टाइनमा बस्दै आएकाहरूको तेस्रो पटकको पीसीआर परीक्षणका लागि स्वाब संकलन गरिएको छ,’ उनले भने । पछिल्लो पीसीआर नेगेटिभ आएमा भुल्के कोरोनामुक्त हुने उनको भनाइ छ ।

संक्रमित बस्तीमा सरकारी र गैरसरकारी क्षेत्रबाट अएको राहतले पनि विपन्न सर्वसाधारणलाई सहज बनाएको स्थानीयले बताए ।

संक्रमित क्षेत्र भुल्केमा ५२ मुस्लिम समुदायसहित ३ सय १५ घरपरिवारको बसोबास रहेको छ । जिल्लामा अहिलेसम्म ५ सय ९६ महिलासहित १ हजार ६ सय ४९ जनाको पीसीआर परीक्षण गरिएको छ । त्यसमध्ये ९३ जनाको रिपोर्ट आउन बाँकी छ । रिपोर्ट आएकामध्ये ६ महिलासहित ३३ जनामा कोरोना संक्रमण देखिएको थियो । संक्रमित मध्येबाट पनि २३ जना कोभिड–१९ अस्पताल विराटनगरमा उपचारपछि निको भएर फर्किएको स्वास्थ्य प्रमुख सुवेदीले बताए ।

प्रकाशित : जेष्ठ ११, २०७७ २०:३८
प्रतिक्रिया
पठाउनुहोस्

गण्डकी प्रदेशको वर्षे अधिवेशन सुरु

कोभिड–१९ महामारीले प्रदेश सरकारको महत्त्व बुझाइदिएको छ: मुख्यमन्त्री गुरुङ
प्रतीक्षा काफ्ले

गण्डकी — गण्डकी प्रदेशसभाको वर्षे अधिवेशन सुरु भएको छ । कोरोना भाइरसका कारण लामो समयसम्म सुचारु हुन नसकेको प्रदेशसभा बैठक आइतबारदेखि सुरु भएको हो ।

विगतमा जस्तै यसपटक प्रदेशसभा बैठक प्रदेशसभाको भवनमा हुन सकेन । सामाजिक दूरी कायम गर्दै बैठक न्युरोडस्थित सभागृहको हलमा सञ्चालन गरिएको हो ।

प्रदेशसभा बैठकलाई सम्बोधन गर्दै गण्डकी प्रदेशका मुख्यमन्त्री पृथ्वीसुब्बा गुरुङले विश्वभर महामारीको रूपमा फैलिएको कोरोना भाइरस संक्रमण रोकथाम तथा नियन्त्रणमा तीन तहकै सरकारको समन्वय रहेको दाबी गरे । संघीयतामा प्रदेश सरकार चाहिँदैन भनेर विरोध भए पनि संकटका बेला प्रदेश सरकारको भूमिका महत्त्वपूर्ण रहेको उनले बताए ।

उनले विश्व संकटमा पर्दा नेपालमा पनि प्रभाव परेको बताउँदै संघीय सरकार एक्लैले यो संकटको सामना गर्न नसक्ने जिकिर गरे । ‘हामीसँग अझै पनि केन्द्रीय मानसिकता छ,’ उनले भने,‘प्रदेश सरकारको काम नदेख्नेलाई अहिले कोभिड–१९ ले सरकारको महत्त्व बुझाइदिएको छ । के संघ एक्लै कोरोनाविरुद्ध लड्न सक्थ्यो त ? कोरोना भाइरसविरुद्ध लड्नका लागि प्रदेश सरकारले ठूलो भूमिका निभाएको छ ।’

उनले कोरोना भाइरस परीक्षणका लागि किट तथा अन्य सामग्री उपलब्ध गराउन नसक्ने संघीय सरकारले संकटविरुद्ध एक्लै लड्न सक्थ्यो भनेर भन्न नसकिने बताए । प्रदेशमा उपलब्ध स्वास्थ्य सेवा र संस्थाका बारेमा कोरोनाका कारण नजिकबाट बुझ्ने अवसर मिलेको बताउँदै उनले यस क्षेत्रमा ठूलो सुधार गर्नुपर्ने औंल्याए ।

उनका अनुसार हाल निर्माणाधीन संरचना संक्रमणको त्रास हटेपछि भविष्यमा पनि प्रयोगमा ल्याउन सकिने गरी निर्माण गर्न लागिएको छ । दीर्घकालीन रूपमा टिकाउ हुने गरी प्रदेश सरकारले जिल्ला अस्पतालहरूको स्तरोन्नति, प्रत्येक अस्पतालमा आइसोलेसन बेड, आईसीयूलगायतको व्यवस्था अनिवार्य गर्न लगाइएको उनको भनाइ छ ।

राहत कोषमा १८ करोड

प्रदेश सरकारले कोरोना भाइरसविरुद्ध लड्न १५ करोडको राहत कोष स्थापना गरेकामा हालसम्म ३ करोड ६ लाख रुपैयाँ थप सहयोग मिलेको छ । कोरोना भाइरसका कारण अर्थतन्त्र घट्दो रहेको बताउँदै मुख्यमन्त्री गुरुङले गण्डकीमा दैनिक ३८ करोड घाटा रहेको र विप्रेषण पनि ३८ करोड नै घाटामा रहेको जनाए ।

लडकाउन भइरहे अर्थतन्त्र शून्यमा जान्छ भनेर विकास निर्माणका कार्य, उद्योग कलकारखाना सुचारु गरिएको उनको भनाइ छ । अर्थतन्त्रमा भएको नोक्सानलाई नीति तथा कार्यक्रममा राखेर आगामी वर्षको बजेट ल्याइने उनले बताए । मुख्यमन्त्री गुरुङले संघीय सरकारले नयाँ नक्सा जारी गरेको कदम स्वागतयोग्य भएको धारणा राखे ।

प्रमुख प्रतिपक्ष दल नेपाली कांग्रेसका नेता कृष्णचन्द्र नेपालीले कोरोना भाइरसले सबै नेपालीलाई हातेमालो गरेर अघि बढ्न सकिन्छ भन्ने सन्देश दिएको बताए । लकडाउन बाध्यता रहेको र श्रमिक समस्यामा रहेकाले पहिला उनीहरूको उद्धार गर्नुपर्ने बताउँदै नेपालीले भने, ‘जनता रहे विकास फेरि पनि गर्न सकिन्छ ।’ उनले प्रदेशका नाका त्रिवेणी, राम्दी र आबुँखैरेनीमा अझै पनि कडाइ गर्नुपर्ने सुझाए ।

प्रकाशित : जेष्ठ ११, २०७७ २०:३१
पूरा पढ्नुहोस्
प्रतिक्रिया
पठाउनुहोस्
×