कोभिड अस्पतालमा जडान भएन उपकरण, संक्रमितलाई अन्यत्र पठाइँदै

बीपी प्रतिष्ठानको कोभिड-१९ अस्पतालको उपकरण जडानमा टेन्डर प्रकियाले ढिलाइ भएको छ । हाल संक्रमितलाई यहाँ नराखेर विराटनगर पठाउने गरिएको छ ।
प्रदीप मेन्याङ्बो

सुनसरी — धरानस्थित बीपी कोइराला स्वास्थ्य विज्ञान प्रतिष्ठानको कोभिड–१९ अस्पतालमा अझै पनि महत्वपूर्ण उपकरण जडान हुन सकेका छैनन् । गत वैशाख १३ गते उक्त अस्पतालको अनौपचारिक उद्घाटन गरिएको थियो ।


करिब १२ करोड ५० लाख रुपैयाँ लागतमा स्थापना गरिएको अस्पतालमा भेन्टिलेटरसहितको १३ आइसीयू बेड, अल्ट्रासाउन्ड, अत्याधुनिक एक्स–रे, डेफिब्रिलेटर, संक्रमित बच्चाका लागि पेडियाट्रिक आईसीयू, डायलसिस, अप्रेसन थिएटर, हाई डिपेन्डेन्सी युनिट, प्रयोगशाला, गाइनो वार्ड लगायतका उपकरण राखिने भनिएको थियो । हालसम्म माग गरिएका कुनै उपकरण आएका छैनन् ।

प्रदेश १ का मुख्यमन्त्री शेरधन राईले अनौपचारिक उद्घाटन गरेको अस्पतालका लागि चाहिने उपकरण अझै जडान नभएपछि संक्रमितलाई उपचारका लागि यहाँ नराखेर विराटनगर पठाउने गरिएको छ । कतिपयलाई प्रतिष्ठानले आइसोलेसन वार्ड बनाएको पेइङ वार्डमा राखिएको छ ।

प्रतिष्ठानले संघीय सरकार र प्रदेश सरकारको करिब १२ करोड ५० लाख रुपैयाँको लागतमा कोभिड अस्पताल बनाएको बताए पनि हालसम्म आवश्यक उपकरण जडान नहुँदा संक्रमितको उपचारमा समस्या भएको प्रतिष्ठान स्रोतले जनाएको छ । प्रतिष्ठानका उपकुलपति प्राडा. ज्ञानेन्द्र गिरिले माग गरिएका उपकरणका लागि विधिवत् प्रक्रिया पुर्‍याएर पारदर्शी रुपमा टेन्डर गर्नुपर्ने भएकाले केही ढिलाइ भएको बताए । ‘प्रकिया सकिएको छ, यो साता उपकरण जडान हुन्छ,’ उनले भने, 'सरकारले यो अस्पताललाई संक्रमितका उपचारका लागि पहिलो नम्बरमा राखेको छ ।' उनले कतिपयले कुरा नबुझेर कोरोना संक्रमित बिरामी प्रतिष्ठानबाट अन्यत्र पठाएको गुनासो गरेको सुनेको बताए । ‘संक्रमित भए पनि सामान्य अवस्थाकालाई अन्यत्र पठाएको हो,' उनले भने, 'यहाँ कोरोनाका गम्भीर बिरामीलाई मात्र बढी प्राथमिकता दिएर राखिन्छ भन्ने बुझ्न जरुरी छ ।’

उनका अनुसार अहिले प्रतिष्ठानमा २ सय ६० बेडको कोरोना अस्पतालको क्षमता छ । संक्रमितको संख्या बढ्दै गए र गम्भीर बिरामी थपिए प्रतिष्ठानको एकेडेमिक हलमा ३ सय बेडमा विस्तार गर्न सकिने उनको भनाइ छ ।

सरकारले प्रतिष्ठानमा द्वन्द्वपीडितहरुको नि:शुल्क उपचारका लागि बनाएको पुनर्स्थापना केन्द्रको भवनलाई कोभिड–१९ अस्पताल बनाएको हो । उक्त भवन पहिले हाडजोर्नी विभागमातहत फिजियो थेरापीको इकाइ रहेको थियो ।

प्रकाशित : जेष्ठ १०, २०७७ १७:१०
ADVERTISEMENT
प्रतिक्रिया
पठाउनुहोस्

घोराहीको सडकमा अलपत्र वृद्धको उद्धार

दुर्गालाल केसी

दाङ — घोराही उपमहानगरपालिका १५ भृकुटीनगर टोलमा शुक्रबार बिहानदेखि अलपत्र अवस्थामा रहेका एक वृद्धको शनिबार अपरान्ह उद्धार गरिएको छ ।

घोराही उपमहानगरपालिकाका विपद् व्यवस्थापन समिति संयोजक तथा घोराही १४ का वडा अध्यक्ष शक्तिराम डाँगीको अगुवाइमा घोराही उपमहानगरका स्वास्थ्य अधिकृत विकेश रेग्मी र उज्यालो विहानी फाण्डेशनका स्वयंसेवकले उनको उद्धार गरेका हुन् ।

कोरोना संक्रमणको डरले उनलाई कसैले छुन मानेका थिएनन् । उज्यालो विहानी फाण्डेशनका स्वयंसेवकले पीपीई लगाएर उनलाई उठाई एम्बुलेन्समा राखेका थिए । अहिले उनलाई राप्ती स्वास्थ्य विज्ञान प्रतिष्ठान घोराहीमा राखेर उपचारको तयारी भइरहेको फाण्डेशनका अध्यक्ष गिररोदन महराले बताएका छन् ।

परीक्षणपछि निलसागर मानव सेवा आश्रम पिपरी देउखुरीमा लैजाने तयारी भएको छ । उनका आफन्त खोज्ने काम पनि भइरहेको महराले जानकारी दिए ।

उद्धारका लागि लामो समयदेखि प्रयास गरे पनि सुनुवाई नहुँदा लामो समयपछि मात्रै उद्धार भएको भृकुटीनगर टोलका युवा विवेक न्यौपानेले बताए । यसबारे कान्तिपुर अनलाइनमा समाचार प्रकाशित भएको थियो ।

यो पनि पढ्नुहोस् :

आफ्‍नाले छाडेपछि सडकमा

प्रकाशित : जेष्ठ १०, २०७७ १७:००
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×