‘होचो’ कचनकवलमा कोरोना कहर 

चार दिनमा ३३ संक्रमित
पर्वत पोर्तेल

काँकडभिट्टा — नेपालकै ‘होचो’ स्थानमा छ कचनकवल गाउँपालिका । कोरोनाले विश्व महाव्याथीको रुप धारण गर्नुअघि कचनकवलमा आन्तरिक तथा बाह्य पर्यटक भित्र्याउने विभिन्न योजना बुनिँदै थियो । जब कोरोनाको संक्रमणसँगै देशमा लकडाउन भयो, सरकारले पर्यटन भ्रमण वर्ष स्थगन गर्‍यो ।

सँगै तुहियो कचनकवलको पर्यटक भित्र्याउने योजना ।

समुद्री सतहदेखि ५८ मिटर उचाईमा रहेको मुलुककै होचो भूभाग देशको चिनिएको पर्यटकीय गन्तव्य पनि हो । तर, यतिबेला कोरोनाको कहरले कचनकवल आक्रान्त छ ।

भारत विहारको किसनगञ्ज जिल्लासँग साँधसीमा जोडिन्छ । मधेसी र मुस्लिम बाहुल्य यो गाउँपालिकामा गत सोमबारदेखि संक्रमितहरुको संख्या लगालग थपिएको थपिएै छ । जसको मुख्य जड भारतसँगको खुला सीमा नै हो ।

गत सोमबार जिल्लामा तेस्रो संक्रमितको सूचीमा परे यहाँका २३ वर्षीय युवक । उनी गत शुक्रबार मुम्वईबाट आएका थिए । लुकिछुपी छिर्न लाग्दा सुरक्षाकर्मीले देखेर उनीसहित ११ जनाको टोलीलाई क्वारेन्टाइनमा राखिएको थियो । अहिले एघारै जना संक्रमित भए ।

गत वैशाख १२ मा जिल्लामा पहिलो संक्रमण दमकबाट सुरु भएको थियो । त्यसपछि बाह्रदसी गाउँपालिकामा संक्रमित थपिए । पहिलो र दोस्रो संक्रमित भेटिएको महिना दिन नबित्दै कचनकवलमा संक्रमण देखियो । सोमबारदेखि बिहीबारसम्म कचकवलमा मात्रै ३३ जनामा संक्रमण पुष्टि भइसकेको छ ।

कचनकवल गाउँपालिकाका अध्यक्ष अन्जार आलमले भने, ‘कोरोना संक्रमण देखिएसँगै स्थानीयवासी त्रस्त छन् ।’ उनका अनुसार भारतबाट आएका नेपालीलाई प्रवेश नगराइएको भए सायद संक्रमण हुने थिएन । आलमले भने, ‘नेपाली दाजुभाइ अलपत्र देखेर माया जाग्यो, ल्याइयो, त्यसपछि धमाधम संक्रमण देखिन थाल्यो ।’ उनका अनुसार भारतबाट नल्याउन्जेल कचनकवल कोरोनामुक्त थियो ।

लगालग संक्रमण पुष्टि भएपछि गाउँपालिकालाई पाँच दिनका लागि सिल गरिएको छ । जसका कारण सिंगो गाउँपालिका चकमन्न छ । स्थानीयबासी घरभित्रै छन् । सीमा नाकामा थप कडाई गरिएको छ । भारतबाट आउनेहरुको चाप उस्तै छ । उनीहरुलाई भारततिरै रोकेर राखिएको छ । ‘भारतबाट आएकालाई तत्काल प्रवेश गराउने पक्षमा हामी छैनौं’, आलमले भने, ‘गाउँपालिकालाई सोत्तर पार्न हामी चाहँदैनौं ।’

कचनकवल क्षेत्रमा संक्रमित पुष्टि भएसँगै नजिकबाट अध्ययन गरिरेका जिल्ला स्वास्थ्य कार्यालय झापाका महामारी फोकल पर्सन अध्यक्ष जीवन चम्लागाईँले क्वारेन्टाइनमा रहेकाहरुमा मात्रै संक्रमण देखिएकाले समुदायसम्म संक्रमण बढ्ने सम्भावना न्यून भएको जनाए । ‘संक्रमितहरु घर पस्न नपाउदै क्वारेन्टाइन पुर्‍याएर राम्रो गरियो’, उनले थपे, ‘नत्र समुदायमै संक्रमण फैलिन सक्ने खतरा थियो ।’

संक्रमित थपिएसँगै गाउँपालिकाले भारतबाट आएकाहरुलाई राख्न थप दुई वटा क्वारेन्टाइन बनाएको छ । जानकी आधारभूत विद्यालय र महेन्द्ररत्न माविमा क्वारेन्टाइन बनाएर भारतबाट आएकालाई राखिएको छ । पहिला पथरिया मावि र लक्ष्मीप्रसाद देवकोटा माविमा मात्रै क्वारेन्टाइन थियो । क्वारेन्टाइनमा हाल २ सय १२ जना छन् । सबै भारतवाट आएकाहरु मात्रै छन् ।

यस क्षेत्रका प्रदेश सांसद वसन्त बानियाँ दिनहुँ संक्रमितको संख्या बढ्दै जाँदा स्थानीयवासीमा त्रास उत्पन्न भएको बताउँछन् । ‘सर्वसाधारणमा अब के होला भन्ने जिज्ञासा व्याप्त छ,’ उनी भन्छन्, ‘तर, सबै संक्रमितहरु क्वारेन्टाइनबाट बाहिर नगएकाले समुदायमा फैलने जोखिम भने देखिदैन ।’

प्रकाशित : जेष्ठ ९, २०७७ १२:२३
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मध्यराति आलमको घर छापा मार्न गएका प्रहरी गाउँलेको घेराबन्दीमा

बम विस्फोटका घाइते र मृतकलाई इँटाभट्टामा जलाइएको भनिएको घटनामा फरार आलमका भाइ महताबलाई पक्रन गएको प्रहरीले उनलाई फेला पार्न भने सकेन ।
शिव पुरी

रौतहट — बम विस्फोट घटनालाई लिएर नक्खु कारागारमा पुर्पक्ष थुनामा रहेका पूर्वमन्त्री एवम कांग्रेस नेता मोहम्मद आफताब आलमको रौतहटस्थित घरमा प्रहरीले बिहीबार मध्यराति छापा मारेको छ ।

आफताबका भाइ महताब आलमको खोजीमा छापा मारेको प्रहरीले उनलाई फेला पार्न भने सकेन । बरु उल्टै सयौं स्थानीयले घेरा हालेपछि कयौं राउन्ड हवाई फायर गर्नुपर्‍यो ।

प्रहरीका अनुसार महताब घर आएको सूचना पाएपछि बारा र प्रदेश प्रहरी जनकपुरको संयुक्त टोलीले छापा मारेको हो । घरमा तीन–चारवटा सम्म गेट थिए । ती सबै फोडेर भित्र पस्न प्रहरीलाई समय लागेको थियो । तर, गाउँलेले प्रहरीले सर्च गरेको भन्ने नै थाहा पाएनन् ।

उनीहरूले तोडफोड भएको सुनेपछि नजिकको मदरसाबाट माइकिङ गरी गाउँलेलाई जम्मा हुन उर्दी गरियो । त्यस क्रममा झन्डै ५ सयको हाराहारीमा गाउँलेले घेराबन्दी गरेको एक सुरक्षा अधिकृतले बताए । ‘आलमका भाइ महताब आएको भन्ने सूचना पाएपछि नियन्त्रणमा लिन गएका हौं,’ उनले भने, ‘राति गाउँलेले घेरा हालेपछि १२ राउन्ड हवाई फायर गरेर बाहिरियौं ।’ प्रहरीका अनुसार घरमा पूर्वमन्त्री आलमका परिवार सदस्य मात्र सुतेका थिए । आलमका ३ नातेदारको घरमा पनि छापा मारिएको थियो । तर, प्रदेश प्रहरीले छापा मार्न लागेको कुरा जिल्ला प्रहरीप्रमुखलाई नै जानकारी गराइएको थिएन ।

प्रहरीको यो शैलीले आलमका परिवार त्रासमा परेको राजपुरका मेयर सेख सकिलले बताए । ‘यो त डकैती शैली भयो । अन्यायको पराकाष्ठा नाघेर प्रहरीले जे मन लाग्यो त्यही गर्न पाउँछ ?,’ उनले भने, ‘कम्तीमा हामीसित समन्वय गरेको भए सहयोग गर्थ्यौं । यस्तो हर्कतको घोर भर्त्सना गर्छौं ।’ सकिलको घर आलमको घरनजिकै छ । त्यहाँ मुस्लिम समुदायको घना बस्ती छ ।

जिल्ला प्रहरीका डीएसपी भरत श्रेष्ठले अहिले स्थिति सामान्य भइसकेको बताए । ‘राति तनाब भए पनि अहिले सामान्य छ,’ उनले भने, ‘स्थिति तनाबग्रस्त बनेपछि जिल्लाबाट पनि टोली पठाएका थियौं ।’

पहिलो संविधानसभा निर्वाचनको अघिल्लो दिन २०६४ चैत २७ गते राजपुर, फरहदवास्थित पूर्वमन्त्री सेख इद्रिसको गोठमा बम विस्फोट भएको थियो । पूर्वमन्त्री आलममाथि उक्त घटनाका मृतक र घाइतेलाई चिम्नीभट्टीमा हालेको आरोप छ । उक्त घटनाका मृतकमध्ये सरुअठाका त्रिलोकप्रताप सिंह र ओसी अख्तरका परिवारले आलम र उनका भाइलगायतविरुद्ध किटानी जाहेरी दिएका थिए । आलमलाई २०७६ असोज २६ गते पक्राउ गरिएको थियो । उनका भाइ महताब फरारको सूचीमा छन् ।

सम्बन्धित समाचार

आलमलाई पुर्पक्षका लागि थुनामा राख्न आदेश

२० वर्षअघिको त्यो घटना : ज्युँदै मान्छे झुन्ड्याउँथे आलम

आलम पक्राउ प्रकरण : उतिबेलै गरिएको थियो सर्वस्वसहित जन्मकैद मागदाबी

प्रकाशित : जेष्ठ ९, २०७७ ११:५५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×