संक्रमित बढेसँगै कचनकवलमा क्वारेन्टाइन थपिए
काँकडभिट्टा — चार दिनभित्र झापामा २५ जना नयाँ संक्रमित थपिएका छन् । बिहीबार १५ नयाँ संक्रमित भेटिएका हुन् । उनीहरू सबै भारतको विहारसँग सीमा जोडिएको कचनकवल गाउँपालिकाका हुन् ।
भारतबाट लुकीछुपी प्रवेश गर्न खोज्दा सुरक्षाकर्मीले पक्राउ गरेका उनीहरू सबै क्वारेन्टाइनमा थिए ।स्वास्थ्यकर्मीहरूले क्वारेन्टाइनमा बसेकाहरूमा मात्रै संक्रमण देखिएकाले समुदायमा फैलन सक्ने खतरा तुलनात्मक रूपमा कम रहेको जनाएका छन् । ‘भारतबाट आउनैबित्तिकै सोझै क्वारेन्टाइनमा लगेर राखिएकाले समुदायमा फैलने सम्भावना न्यून छ’, स्वास्थ्य कार्यालय झापाका महामारी फोकल पर्सन जीवन चम्लागाईंले भने, ‘घरसम्म पुगेका भए पनि त्यो जोखिम उच्च रहन्थ्यो ।
कचनकवल गाउँपालिका अध्यक्ष अन्जार आलमले संक्रमितहरू समुदायसम्म पुग्न नसकेका कारण जोखिम नरहेको बताए । उनका अनुसार लगालग संक्रमण पुष्टि भएपछि ५ दिनका लागि सिंगो गाउँपालिका सिल गरिएको छ । ‘सिंगो पालिका सुनसान छ, सर्वसाधारण सबै घरभित्रै छन्,’ आलमले भने । भारतबाट आउन चाहनेहरूलाई तत्काल प्रवेशमा कडाइ गरिएको उनले जानकारी दिए ।
आलमका अनुसार पालिकाले भारतबाट आएकाहरूलाई राख्न पथरिया मावि र लक्ष्मीप्रसाद देवकोटा माविमा दुइटा क्वारेन्टाइन बनाएको थियो । तर, संक्रमित थपिएसँगै दुईटा क्वारेन्टाइन थप गरिएको छ । जानकी आधारभूत विद्यालय र महेन्द्ररत्न माविलाई क्वारेन्टाइन बनाएर भारतबाट आएकालाई राखिएको छ । आलमका अनुसार क्वारेन्टाइनमा २ सय १२ जना छन् । ‘मापदण्डअनुसारै क्वारेन्टाइन बनाइएको छ’, उनले भने, ‘नियमित स्वास्थ्य परीक्षण आदि काम भइरहेको छ ।’ क्वारेन्टाइनमा राखिएका थप ६५ जनाको स्वाब परीक्षणका लागि पठाइएको छ ।
प्रकाशित : जेष्ठ ८, २०७७ १४:०९