उर्लाबारीमा दादुरा फैलियो

देवनारायण साह

मोरङ — कोरोना भाइरसको महामारी फैलिएकै बेला उर्लाबारी नगरपालिका-३ मा दादुरा फैलिएको छ । स्थानीय ९ परिवारका ८ जनामा दादुरा संक्रमण पुष्टि भएको हो ।

विश्व स्वास्थ्य संगठनको फिल्ड अधिकृत डा. सरु देवकोटाको नेतृत्वमा प्रदेश १ का सामाजिक विकास मन्त्रालयका स्वास्थ्यकर्मीहरुको टोली ९ जनाको रगतको नमुना शुक्रबार संकलन गरेर लगेको थियो । उनीहरुमध्ये ८ जनामा दादुरा संक्रमणको पुष्टी भएको हो ।

रगत परीक्षणमा दादुरा पुष्टि भएको प्रतिवेदन विश्व स्वास्थ्य संगठनले आइतबार पठाएको उर्लाबारी नगरपालिकाका स्वास्थ्य संयोजक तोयानाथ घिमिरेले बताए ।

‘सात वर्षदेखि २५ वर्ष उमेरका सातै जनामा दादुरा पुष्टि भएकाले उच्च सतर्कता अपनाएका छौं,’ उनले भने, ‘दादुराको संक्रमण देखिएका आठै जनालाई हालसम्ममा दुई पटक भिटामिन ए खुवाइसकेका छौं ।’ उनीहरुको स्वास्थ्य अवस्था सुधारोन्मुख र सामान्य रहेको घिमिरेले बताए ।

‘आठ जनाको स्वास्थ्य अवस्था सामान्य रहेकाले उनीहरुकै घरमा प्रत्यक्ष निगरानीमा राखिएको छ,’ उनले भने, ‘सरकारले सञ्चालन गर्दै आएको दादुराको खोप हालसम्म उनीहरुले लगाएका छैनन् ।’

स्वास्थ्य कार्यालय मोरङका खोप अधिकृत रामनन्दन यादवले कुनैपनि ठाउँमा एक महिनामा ५ वटा रोगका बिरामी फेला परेपछि महामारी भएको मापदण्ड अनुसार यहाँ एकै पटक सात जनामा दादुरा फेला परेकाले महामारी फैलिएको बताए । अर्का एकजना संक्रमित वडा नम्बर १ का हुन् ।

जिल्ला स्वास्थ्य कार्यालय मोरङका प्रमुख ज्ञानबहादुर बस्नेतले दादुरा सरुवा रोग भएको र समयमा उपचार नगरिए बिरामीको ज्यान जान सक्ने भएकाले अनुगमन गरेर उच्च सतर्कता अपनाइएको बताए ।

‘दादुरा फैलिएकाले अब कसरी अघि बढ्ने बारे प्रदेश र संघीय सरकारलाई जानकारी गराईसकेका छौं,’ उनले भने, ‘उर्लाबारीमा अन्य परिवार र व्यक्तिमा दादुरा सर्न नदिनका लागि आवश्यक सावधानीका उपाय अपनाइएको छ ।’

दादुरा उन्मुलनका लागि सरकारले मोरङमा हालै नवौं पटक खोप अभियान सञ्चालन गरेको थियो ।

प्रकाशित : वैशाख २१, २०७७ १८:०५
ADVERTISEMENT
प्रतिक्रिया
पठाउनुहोस्

लकडाउन खुकुलो बनाउनेबारे मन्त्रिपरिषद् बैठकमा छलफल

बिनु सुवेदी

काठमाडौँ — आइतबार बसेको मन्त्रिपरिपद् बैठकमा जारी लकडाउनलाई खुकुलो बनाउनेबारे छलफल भएको छ । संसदको बजेट अधिवेशन बोलाउनेबारे छलफल गर्न डाकिएको भए पनि बैठकमा लकडाउनलाई निरन्तरता दिने कि खुकुलो बनाउँदै लैजाने भन्नेबारे छलफल भएको एक मन्त्रीले बताए । 

उनका अनुसार बैठकमा संक्रमण देखिएका र नदेखिएका क्षेत्रलाई वर्गीकरण गरि त्यसैअनुरुप रणनीति बनाउनु पर्ने कुरा उठेको थियो । वैशाख २५ गते सरकारले देशभर जारी गरेको लकडाउन ४५ दिन पुग्छ । छिमेकी भारतले दुई साताका लागि लकडाउन थप गरिसकेको छ । नेपालमा कोरोना संक्रमण देखिने क्रम जारी गरेकाले लकडाउनबारे सरकारले कुनै निर्णय लिइसकेको छैन । आइतबारको बैठकले उच्चस्तरीय समन्वय समिति अन्तर्गत रहेको मुख्यसचिव नेतृत्वको कार्यदल र गृह मन्त्रालयलाई आवश्यक गृहकार्य गरी सुझाव पेश गर्न निर्देशन दिएको छ ।

'विभिन्न क्षेत्रबाट लकडाउनलाई यसै रुपमा लम्ब्याउनु हुँदैन भन्ने कुरा आइरहेको छ । यसैले संक्रमण देखिएका, परीक्षण हुन बाँकी र धेरै परीक्षण भएका तर संक्रमण नदेखिएकालाई रेड, एलो र ग्रीन जोनमा वर्गीकरण गरी फरक क्षेत्रका लागि फरक रणनीति बनाउने कुरा उठेको हो,' ती मन्त्रीले भने । उनका अनुसार ग्रीन जोनमा परेका क्षेत्रमा लकडाउन केही खुकुलो बनाउनेबारे गृहकार्य थालिएको छ ।

यो मोडालिटीमा जाँदा पनि अन्तराष्ट्रीय तथा आन्तरिक उडान, लामो दूरीका सवारी साधान खोलिने छैनन् । यस्तै, स्कुल, कलेज, सिनेमा घर तथा सपिङ मलजस्ता धेरै भीडभाड हुने क्षेत्र र सार्वजनिक सवारीका साधन पनि खोलिने छैनन् । सीमा नाकामा थप कडाइ गरिनेछ ।

ग्रीन जोनमा पर्ने क्षेत्रमा सामाजिक दूरी कायम गरेर गर्न सकिने कामहरु, उद्योग कलकारखाना र कार्यलयहरुलाई खोल्दै लानु पर्ने राय केही मन्त्रीहरुले राख्दै आएका छन् । उनका अनुसार केही खुकुलो बनाउन सकिने क्षेत्रमा हिमाली र उच्च पहाडी जिल्लाहरुका साथै राजधानी काठमाडौं तथा पोखराजस्ता सहरहरु पनि पर्छन् ।

प्रकाशित : वैशाख २१, २०७७ १७:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×