इटहरीमा थालियो र्‍यापिड टेस्ट, २१ जनामा सबैको रिपोर्ट नेगेटिभ- प्रदेश १ - कान्तिपुर समाचार

इटहरीमा थालियो र्‍यापिड टेस्ट, २१ जनामा सबैको रिपोर्ट नेगेटिभ

प्रदीप मेन्याङ्बो

सुनसरी — सुनसरीको इटहरी उपमहानगरपालिकास्थित इटहरी अस्पतालमा मंगलबारदेखि कोरोना भाइरस (कोभिड–१९) को र्‍यापिड डायग्नोस्टिक टेस्ट (आरडीटी टेस्ट) सुरु गरिएको छ।

इटहरी अस्पतालका इमरजेन्सी इन्चार्ज रामकुमार धमलाका अनुसार पहिलो चरणमा विदेशबाट इटहरी आएका व्यक्तिहरुको आरडीटी टेस्ट गरिँदै छ। आज दिनभरमा करिब एक सय जनाको परीक्षण गरिने उनले बताए। मध्याह्नसम्म २१ जनाको परीक्षण गरिएको थियो। उनीहरु सबैको रिपोर्ट नेगेटिभ देखिएको धमलाले बताए।

उनका अनुसार यो विधिबाट परीक्षण गर्दा नमुनामा संक्रमण प्रतिरोधी एन्टिबडी छ कि छैन भनेर जाँच गरिन्छ। ‘हाम्रो शरीरमा कुनै भाइरस प्रवेश गरेपछि शरीरले त्यस्ता संक्रमणसँग लड्न प्रतिरोधी संयन्त्र एन्टिबडी निर्माण गर्छ।

एन्टिबडीले जिते बिमारी भइँदैन। तर भाइसरले जिते लक्षण देखिन थालेर बिरामी परिन्छ,' उनले भने। आरडीटी परीक्षणमा पोजिटिभ देखाए मोलिकुलर पीसीआर (पोलिमर चेन रिएक्सन) विधिबाट पुन: नमुना जाँच गरिने र त्यसपछि व्यक्तिमा भाइरसको संक्रमण भए/नभएको पत्ता लाग्ने धमलाले बताए।

पीसीआर जाँच आवश्यक परेमा त्यस्ता नमुनालाई धरानको बीपी कोइराला स्वास्थ्य विज्ञान प्रतिष्ठान वा विराटनगरको कोसी अस्पतालमा पठाउने धमलाले बताए।

प्रकाशित : वैशाख २, २०७७ १६:४५
प्रतिक्रिया
पठाउनुहोस्

तातोपानी नाकामा २० चालकलाई मात्रै पास

जनप्रतिनिधि छिर्न नपाउने
अनिश तिवारी

सिन्धुपाल्चोक — कोरोना भाइरसको रोकथाम गर्ने तयारीसहित खोलिएको चीन जोड्ने तातोपानी नाकामा सामग्री ढुवानीका लागि २० जना चालकलाई मात्रै सवारी पास दिइने भएको छ । चिनियाँ अधिकारी र नेपालतर्फबाट प्रमुख जिल्ला अधिकारी सहभागी रहेको बैठकले चालकलाई मात्रै पास दिने निर्णय गरेको हो । 

तातोपानी सुख्खा बन्दरगाह भन्सार कार्यालयका प्रमुख भन्सार अधिकृत लालबहादुर खत्रीका अनुसार सवारी पास, नाकाको सुरक्षासम्बन्धी निर्णयसहित दुवै पक्षबाट नाका सुचारु गरिने भएको छ । चीनबाट नेपाल जोड्ने भोटेकोसी गाउँपालिका–२, तातोपानीस्थित मितेरी पुल पारी रहेको चिनियाँ यार्डस्थलसम्म मात्रै सवारी चालक पुग्न पाउनेछन् । त्यहाँ चिनियाँ सरकारी प्रक्रिया सहित ‘स्प्रे’, स्वास्थ्य परीक्षण सकिएपछि २० जना चालकको सवारी पास र यात्रा पुस्तिका बनाइने खत्रीले जनाए ।

‘त्यहाँको सबै डिटेल ल्याएर सम्पूर्ण ‘रेकर्ड’ राखेर पास बनाइएको छ, कसरी अगाडी बढ्ने भन्नेबारे कुरा हुदैछ, ’ उनले भने । तातोपानी नाका सुरक्षा संवेदनशिलतालाई लिएर अगाडी बढ्न प्रशासन, अध्यागमन, बन्दरगाह, सरकारी अधिकारीदेखि सुरक्षाकर्मीसम्म नाकासम्बन्धी सूचना आदानप्रदान हुने उनले सुनाए ।

गत बुधबार बेलुकी चीनबाट आवश्यक परीक्षण सकेर १९ बक्सा माक्स र १० बक्सा सेनिटाइजर नेपाल भित्रिएको थियो । सीमाक्षेत्रमा सुरुवाती हेल्थ डेस्क र भन्सार परिक्षण सकेर राजधानी लगेर नाका खुलाइएको प्रमुख जिल्ला अधिकारी उमेशकुमार ढकालले बताए । ‘चीन र नेपालतर्फ स्वास्थ्य परिक्षणदेखि कन्टेनर चालकजस्ता संवेदनशिल विषयमा कडाइ हुनेछ, ’ उनले भने ।

जनप्रतिनिधिलाई छिर्न दिइएन्

चीनको न्यालकमा प्रमुख जिल्ला अधिकारी फिङ ल्यवी, नाका अधिकारी पुबु किरेन, न्यालम कस्टमका चिफ अफिसर छिङ गङ, न्यालम भन्सारका प्रमुख अधिकृत सेन च्वानेगाइङ्गसहित ७ प्रहरी अधिकारीले नेपालका प्रशासन र प्रहरीका प्रतिनिधिसँग छलफल गरेको थियो ।

नेपालतर्फका प्रमुख जिल्ला अधिकारी उमेशकुमार ढकाल, भन्सार अधिकृतदेखि सुरक्षाकर्मी सामेल भएपनि जनप्रतिनिधिलाई भने खबरसमेत नगरिएको भोटेकोशी गाउँपालिकाका प्रमुख राजकुमार पौडेलले बताए । ‘तातोपानी नाका सुचारु हुने प्रक्रियामा स्थानीय सरकारलाई पुरा वेवास्ता गरिएको छ, यसमा हाम्रो भुमिका कति महत्वपूर्ण भन्नेबारे किन सोचिदैन् ? जनप्रतिनिधि सहभागी हुने नमिल्ने कस्तो गोप्य छलफल हो ?,’उनले प्रश्न गरे ।

नाकाबारे खबर पनि नभएपछि आफु छलफलमा सहभागी हुन नगएको सुनाउँदै चासो राख्न गएका केही वडाध्यक्ष र वडासदस्यलाई बैठक हलमा छिर्नसमेत दिइएको थिएन् । त्यसबाट जनप्रतिनिधि रुष्ट बनेका छन् ।

प्रकाशित : वैशाख २, २०७७ १६:३२
पूरा पढ्नुहोस्
प्रतिक्रिया
पठाउनुहोस्
×