कोरोना संक्रमितको उपचारमा खटिँदा मृत्यु भए ५० लाख

कोरोना रोकथाम र उपचारमा संलग्नहरुको सुरक्षाको प्रत्याभूति गर्न प्रदेश १ सरकारले यस्तो निर्णय गरेको हो।
माधव घिमिरे

विराटनगर — कोरोना भाइरसबाट संक्रमित भएका बिरामीको उपचार सहभागी रहँदा कसैको मृत्यु भए प्रदेश १ सरकारले तिनका परिवारलाई ५० लाख रुपैयाँ सहयोग दिने घोषणा गरेको छ।

मन्त्रिपरिषद्‌को मंगलबारको बैठकले संक्रमितको उपचार र रेखदेखमा खटिने स्वास्थ्यकर्मी र कर्मचारी लगायतको मृत्यु भए उनीहरुको परिवारलाई सो रकम प्रदान गर्ने निर्णय गरेको हो।


यस्तो सहयोग कोरोना भाइरसको नियन्त्रण, रोकथाम, संक्रमितको उपचारजस्ता काममा सक्रिय रहने स्वास्थ्यकर्मी, सुरक्षाकर्मी, एम्बुलेन्स चालक, स्थानीय तहका कर्मचारी वा यस्तो काममा लाग्नेको मृत्यु भए तिनका परिवारलाई दिइनेछ।


सरकारका प्रवक्ता आन्तरिक मामिला तथा कानुनमन्त्री हिक्मतकुमार कार्कीका अनुसार कोरोना रोकथाम, उपचारमा संलग्नहरुको सुरक्षाको प्रत्याभूति गर्न सरकारले यो निर्णय गरेको हो।

कोरोना भाइरस नियन्त्रण, रोकथाम र उपचारमा प्रदेश सरकार वा मातहत निकाययले परिचालन गरेका स्वास्थ्य जनशक्तिलाई नेपाल सरकारले निर्धारण गरेअनुसार दोहोरो नपर्ने गरी प्रोत्साहन भत्ता दिने निर्णय पनि भएको कार्कीले बताए।


प्रदेश १ मा मंगलबार साँझसम्म कोही कोरोना संक्रमित भएको पाइएको छैन। धरानस्थित बीपी कोइराला स्वास्थ्य विज्ञान प्रतिष्ठानमा दिनहुँ स्वाब परीक्षण भइरहेको छ। हालसम्म प्रदेशका विभिन्न जिल्लाबाट संकलन गरिएका ९० जनाको नमुना परीक्षण गर्दा ८५ जनामा संक्रमण भेटिएको छैन। अन्यको रिपोर्ट आउन बाँकी छ।

प्रकाशित : चैत्र २५, २०७६ १९:५२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

अग्रिम सुरक्षा भत्ता वितरण

कान्तिपुर संवाददाता

सिन्धुली — कमलामाई  नगरपालिका ६ अँधेरीकी ७० वर्षीया  सुन्तलीमाँया श्रेष्ठ नातिनीको सहारामा नुनथला आइपुगिन । भत्ता लिन नातिनीलाई लिएर आएको उनले बताइन ।

‘कोरोनाले गर्दा भएको लकडाउनमा नगरपालिकाले दुई महिनाको अग्रिम सामााजिक सुरक्षा भत्ता वितरण गरिरहेका सुनेर आएकी हुँ’ उनले भनिन्, ‘ घरमा कमाउने पनि बाहिर निस्कन पाएका छैनन्, यो पैसाले ठूलै गर्जो टर्छ ।’

दैनिक ज्याला मजदुरी गरेर पेट भर्ने सुन्तलीमाँयाको परिवारमा छोरा, बुहारी सहित ७ जना छन् । ‘रोग आयो भन्छन, घर बाहिर निस्कन कोही पनि पाएको हैन्,’ उनले थपिन् । चामल, दाल, भुटुन, किन्नका लागि आफ्नो पैसा प्रयोग हुने र घरका सबै खुसी हुने उनले बताइन् ।

राम्माडीका ७५ वर्षिय रुद्रबहादुर वयलकोटीको त भान्सा नै बसिसकेको थियो । राहतको लागि नाम टिपेर लगे पनि राहत नपाएका उनलाई सामाजिक सुरक्षा भत्ता चुल्हो बाल्ने सहयोग गर्नेछ । ‘घरमा दाल, चामल केही थिएन्, अब यो भत्ताले जोहो गर्छु,’ उनले भने, ‘ राहत पाइएको होइन्, एकदुइ दिन बन्द होला भनेको यो त १५ दिन हुन लागिसक्यो ।’

गाउँमा अन्न उधारोमा बेसाउन जान पनि नपाएको उनले सुनाए । ‘घरमा अहिले नआइज है भन्छन, सबै ढोका लगाए जत्तिकै भएको छ, यो कस्तो रोग हो कोरोना?,’ उनले जिज्ञासा राख्दै भने, ‘यो भत्ता पनि नपाएको भए त भोकै मरिने रहेछ ।’ नगरपालिकाले दुई महिनाको सामाजिक सुरक्षा भत्ता १४ वडामा वितरण सुरु गरेको गरेको छ ।

लकडाउनका कारण विपन्न वर्ग मारमा परेकोले राहत स्वरुप समय अगावै चैत र बैशाख महिनाको सामाजिक सुरक्षा भत्ता वितरण सुरु गरिएको नगरपालिकाले जनाएको छ । यस्तो बेलामा वृद्धवृद्धा तथा अन्य सामाजिक सुरक्षा भत्ता पाउनेहरुलाई अग्रिम दिंदा ठूलो राहत हुने सोचेर वितरण शुरु गरेको नगरप्रमुख खड्गबहादुर खत्रीले बताए ।

कमलामाई नगरपालिकामा सामाजिक सुरक्षा भत्ता लिनेको संख्या दोस्रो चौमासिक सम्ममा सात हजार ६०२ जना रहेका छन् । दुई महिनाको भत्ता स्वरुप तीन करोड ६७ लाख ९९ हजार दुई रुपैयाँ खर्च हुने नगरपालिकाले जनाएको छ । जेष्ठ नागारिक, दलित, एकल महिला, लोपोन्मुख, अपाङ्गता भएका , आंशिक अपाङ्गता भएका लगायतले उक्त भत्ता पाउदै आएका छन् । यसअघि सामाजिक सुरक्षा भत्ता तेस्रो तथा अन्तिम चौमासिक असारमा मात्र वितरण हुदै आएको थियो ।

प्रकाशित : चैत्र २५, २०७६ १९:४५
पूरा पढ्नुहोस्
प्रतिक्रिया
पठाउनुहोस्
×