समाचार संकलनमा अवरोध

रमेशचन्द्र अधिकारी

धनकुटा — स्वास्थ्य सामग्री हस्तान्तरणबारे समाचार संकलनका लागि पुगेका पत्रकारलाई मंगलबार स्थानीय प्रशासनले अवरोध गरेको छ । सूर्यबहादुर थापा प्रतिष्ठानले जिल्लाका स्वास्थ्य संस्थाका लागि पठाएको सामग्री जिल्ला विपत् व्यवस्थापन समितिलाई हस्तान्तरण गर्ने कार्यक्रममा पत्रकारलाई रोक लगाइएको नेपाल पत्रकार महासंघ धनकुटाले जनाएको छ । 

महासंघका जिल्ला उपाध्यक्ष नगेन्द्र राई, द हिमालय टाइम्सका खगेन्द्र घिमिरे, हिमालय टेलिभिजनका कविराज घिमिरे, अन्नपूर्ण पोस्ट् दैनिकका हरिबहादुर लम्जेल र रेडियो भेडेटारका स्टेसन म्यानेजर पूर्णकुमार चौधरीलाई दुर्व्यवहार गरिएको जनाइएको छ ।


प्रतिष्ठानले सामग्री हस्तान्तरण कार्यक्रममा जिल्लास्थित पत्रकारलाई समाचार संकलनको लागि डाकेको थियो । तर जिल्ला प्रशासन कार्यालय पुगेका पत्रकार खगेन्द्र घिमिरे र कविराज घिमिरेलाई कार्यक्रमस्थलबाटै निष्कासन गरिएको थियो । आफूहरूलाई प्रशासन कार्यालय परिसरबाट प्रहरीले अपमानजनक ढंगले निकालिएको उनीहरूले बताए । अन्य चार जनालाई मुख्य मन्त्रीको सम्पर्क कार्यालयबाहिर सडकमा प्रहरीले रोकेका थिए । ‘कार्यक्रममा बोलाएर अपमानजनक व्यवहार गरियो,’ खगेन्द्र घिमिरेले भने, ‘हामी सुरक्षित भएर गएका थियौं, तर समाचार संकलन र तस्बिर खिच्न नदिई दुर्व्यवहार गरियो ।’


बाटोमा रोकिएका पत्रकारलाई पनि प्रहरीले फोटो–भिडियो मेट्न दबाब दिएका थिए ।

घटनापछि महासंघले विज्ञप्तिमा पत्रकारितामार्फत जनताको सुसूचित हुने अधिकार हनन गरिएको भन्दै त्यस्ता कार्य बन्द आग्रह गरेको छ ।

दुर्व्यवहार गरिएको होइन : प्रशासन

प्रमुख जिल्ला अधिकारी केशवप्रसाद विमलीले सूचना संकलनमा अवरोध नगरिने भन्दै पत्रकारलाई अपमानजनक व्यवहार नगरिएको दाबी गरेका छन् । प्रतिष्ठानले पत्रकारलाई निम्ता गरेको जानकारी नहुँदा भिडभाड हुन नदिन पत्रकार र अन्यलाई बाहिर बस्न अनुरोध गरिएको उनको भनाइ छ । त्यसै गरी जिल्ला प्रहरी प्रमुख एसपी सुदर्शन कोइरालाले सामग्री हस्तान्तरण कार्यमा पत्रकारको आवश्यकता नभएको ठानेर रोक लगाइएको बताए ।

प्रकाशित : चैत्र २५, २०७६ १४:०६
प्रतिक्रिया
पठाउनुहोस्
ADVERTISEMENT

लकडाउन उल्लंघन गर्दै बझाङमा भव्य मेला 

तृप्ति शाही

बैतडी — कोरोनाको प्रभावले देश लकडाउनमा रहेको अवस्थामा पनि बझाङको छविसपाथीभेरा गाउँपालिका—३ को बान्‍नीकोटमा धुमधामसंग मेला लागेको छ । वर्षेनी लाग्ने बान्‍नीकी चैतली मेला लकडाउनको समयमा पनि लागेको हो । 

स्थानीयले चैत ११ गते जंगलबाट रुखको काकर काटेर ल्याइ मेलाको सुरुवात गरी अष्टमीको दिन बोकाको बली चढाएर सोमबार मेलाको समापन भव्य रुपमा गरेका हुन् । काकर सेलाउने भनेर मेलाको समापन गर्ने परम्परा अनुसार नागरिक जम्मा भएर मेला लगाएका जयपृथ्वी नगरपालिकाका स्थानीय रिदम सिंहले बताए । मेलामा भकुन्डो प्रतियोगीता पनि गरिने चलन रहेको र त्यो पनि भएको उनले सुनाए ।

११ गते घर बाट सबैले लिंगो बनाएर मेला लगाउने प्रशासनलाई जानकारी भएको र स्थानीयले मनाउने तयारी गरेपनि आफूले रोक्न आदेश दिएको बझाङका प्रमुख जिल्ला अधिकारी उमेश पाण्डेयले बताए ।

‘हामीलाई त पहिले मेला सकिसकेको हो । त्यहाँ कुनै किसिमको मेला पर्वहरु छैनन् भन्ने हिसाबले पनि सुरक्षा केही पठाइएन । थाहा नै भएन,’ पाण्डेयले भने,‘पालिकाका अध्यक्षसंग पनि दैनिक कुराकानी भइरहन्छ । केहि हैन सर खाली परम्परा मात्र धान्ने हो । दुई/चार जनाले मात्र लिंगो चढाएर सेलाउने हो । ठूलो मेलाको कार्यक्रम केहि हैन भन्नुभएको थियो ।’

बझाङको छवीसपाथीभेरा ३ को बान्नीकोटमा लागेको चैतली मेला । तस्बिरः सौजन्य/रिदम सिंह

करिब ३ सय मानिस मेलामा जम्मा भएको खबर आफूलाई आएको पनि उनले सुनाए । विकट पालिका भएकोले घण्टौं हिँडाएर प्रहरी पठाए पनि प्रहरी जाने बेलासम्म मेला सकिसकेको उनले बताए ।

मेला लागेको वडाका नागरिकको मात्र मेलामा सहभागिता भएको प्रजिअ पाण्डेयले दाबी गरे । अन्य वडाका सीमानाकामा प्रहरी भएकोले छिर्न नपाएका उनले बताए ।
लकडाउनको बेलामा मेला आयोजना हुँदा संकट निम्तन सक्ने जिल्ला अस्पताल बैतडीका प्रमुख डा.वसन्तराज जोशीले बताए ।

मेलाको भीडमा जम्मा भएका मध्ये एकजनालाई संक्रमण भएको भए मात्रै गुणात्मक तरिकाले धेरेलाई हुन सक्ने सम्भावना रहेको उनले बताए । यस्ता भेलाले महामारीको रुप लिन सक्ने उनको भनाइ थियो ।

यो महिना सुदूरपश्चिमका बैतडी सहित अन्य पहाडी जिल्लामा मानिसहरु जम्मा भएर विभिन्न मन्दिरमा पूजाआजा र बलिसहित भव्य मेला लाग्ने भएपनि यो वर्ष शक्तिपीठहरु सुनसान बनेका छन् ।

प्रकाशित : चैत्र २५, २०७६ १४:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×