दुग्ध आयोजनालाई पाउडर बनाउन भ्याइनभ्याइ- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

दुग्ध आयोजनालाई पाउडर बनाउन भ्याइनभ्याइ

देवनारायण साह

मोरङ — लकडाउनले निजी डेरी उद्योगहरु बन्द भएपछि यहाँस्थित दुग्ध विकास संस्थानअन्तर्गतको विराटनगर दूध वितरण आयोजनालाई दूधको पाउडर बनाउन भ्याइनभ्याइ छ । आयोजनाले पूर्व क्षेत्रमा मिल्क होलीडे हुन नदिन निजी डेरी उद्योगको दूधको पनि पाउडर बनाइदिन थालेको छ । 

लकडाउनका कारण कर्मचारी आउन छाडेकाले निजी डेरी उद्योगहरु बन्द भएको विराटनगर दूध बितरण आयोजनाका प्रमुख गणेशकुमार यादवले बताए । ‘निजी डेरी उद्योग बन्द भए पनि किसानको दूध खेर जान नदिनका लागि उत्पादन शुल्क लिएर पाउडर बनाइदिने गरेका छौं,’ उनले भने, ‘अहिले ७२ देखि ७५ हजार लिटर दूधको दैनिक ६ हजार किलो पाउडर उत्पादन भइरहेको छ ।’


परियोजनाले सामान्य अवस्थामा नियमित यस सिजनमा दैनिक संकलन गर्दै आएको दूधको परिमाण २८ हजार लिटरबाट बढेर अहिले ५० हजारभन्दा बढी लिटर संकलन भइरहेको यादवको भनाई छ । आइतबार मात्रै ५० हजार ७३ लिटर दूध संकलन गरेको आयोजनाको तथ्यांक छ ।


‘आयोजनामा नियमित संकलन भइरहेको दूधबाट दैनिक ४२ देखि ४५ हजार लिटर दूधको पाउडर बनाउँ छौं,’ उनले भने, ‘ निजी डेरीको ५ देखि ८ हजार, सप्तरीको महुलीस्थित दुग्ध संस्थाको ४ देखि ८ हजार, बुटबल दुध परियोजनाबाट ६ देखि १० हजार र हेटौडा दूध परियोजनाबाट १२ देखि २० हजार लिटरसम्म पाउडर बनाउनका लागि दैनिक दूध आउने गरेको छ ।’


निजी क्षेत्रको दुधबाट पाउडर बनाउनका लागि आयोजनाले प्रतिकिलो १ सय १५ रुपैयाँ शुल्क लिने गरेको छ । लडकडाउनले पाउडर दूध अत्यधिक उत्पादन हुँदा आयोजनाको गोदाम भरिदै गएकाले गोदामको समेत अभाव भएको यादवले सुनाए । आयोजनाले अहिले दैनिक दुई हजार किलो घ्यू समेत उत्पादन गरिरहेको छ ।


आयोजनाले अहिले दैनिक ५ हजार ५ सय लिटर दूध, १ हजार ५ लिटरको दही, १ हजार ५ सय लिटर दूधको पनिर उत्पादन गरेर विराटनगर, धरान, इटहरी, इनर्बा, विराट चोकसम्म पुर्‍याउने गरेको यादवले बताए । उनले किसानको दूध खरिद गर्दा गाईको दुधमा फ्याट हेरेर सरदर ४०/४२ र भैंसीको दूध ५०/५५ रुपैयाँ प्रतिलिटरको दरमा खरिद गर्दै आएको बताए । आयोजनाले प्रतिलिटर स्ट्यार्ण्ड दूध ६८, क्रिम दूध ९२ र चिया दूध ६४ रुपैयाँ लिटर, दही १ सय १० रुपैयाँ किलो र पनिर प्रतिकिलो ६ सय रुपैयाँ बजारमा बिक्री गर्दै आएको छ ।

सरकारले २५ जनाभन्दा बढी व्यक्तिलाई एक ठाउँ भेला नहुन भनेकाले प्रशासन र लेखा शाखाका २५ जना कर्मचारीलाई आवश्यकता परेको बेला सातामा एक पटक मात्रै कार्यालयमा पालै पालो बोलाएर काममा लगाउने गरेको छ । तर, किसानको दुध खेर जान नदिनका लागि आयोजनाको दूध प्लाण्टमा दैनिक ८० जना कर्मचारीले जोखिम मोलेर भएपनि काम गरिरहेका छन् । आयोजनाको इलाम, पाँचथर, तेह्रथुम र धनकुट्टास्थित चिसियान केन्द्रमा पनि ३० जना कर्मचारीले दैनिक दूध संकलनको काम गर्दै आएको यादवले सुनाए ।


आयोजना सञ्चालनका लागि लकडाउनले दुध तताउनका लागि बोइलर चलाउनका लागि भुसको अभाव भइरहेको प्रमुख यादवको भनाई छ । ‘यसअघि भुस आपुर्तिका ठेक्का पाएका ठेक्केदारले धनुषाको महेन्द्रनगर, सिरहा, सप्तरीस्थित राइस मिलबाट ल्याएर धानको भुस आपुर्ति गर्दै आएको थियो,’ उनले भने, ‘प्रहरीले भुस अत्यावश्यकीय बस्तुमा नपरेको भन्दै ल्याउन अवरोध गरिरहेकाले समस्या भएको छ ।’ प्रदेश १ मा वार्षिक ५ लाख ६१ हजार १ सय ५० टन दूध उत्पादन भइरहेको छ ।

प्रकाशित : चैत्र २४, २०७६ १९:०९
प्रतिक्रिया
पठाउनुहोस्

कोरोना जनसुरक्षा कोषमा ११ करोडभन्दा बढी

माधव घिमिरे

विराटनगर — प्रदेश १ सरकारले स्थापना गरेको कोरोना जनसुरक्षा कोषामा सोमबारसम्म ११ करोड रुपैयाँभन्दा बढी जम्मा भएको छ । कोरोना भाइरस संक्रमण रोकथाम, प्रतिरक्षा र उपचारका लागि सरकारले कोष स्थापना गरेको थियो ।

फाइल फोटो

यसमा हालसम्म ११ करोड ६५ लाख रुपैयाँ जम्मा भइसकेको छ । कोषमा उद्योगी, व्यवसायी, विभिन्न संस्था र दाताहरुबाट सहयोग प्राप्त भएको मुख्यमन्त्री तथा मन्त्रिपरिषद् कार्यालयले जनाएको छ ।

यसैबीच, प्रदेश १ का प्रमुख सोमनाथ अधिकारी प्यासीले प्रदेश सरकारले स्थापना गरेको कोसी अस्पताल कोरोना उपचार केन्द्रको आइतबार अनुगमन गरेका छन् । कोरोना अस्पताल ५० शय्या क्षमताको छ ।

त्यस क्रममा उनले अहिलेको संकटलाई पार लगाउनुको विकल्प नभएको भन्दै विश्वव्यापी महामारीको रुप लिएको कोरोना (कोभिड १) बनावटी विषय नभएकाले सबैलाई सुरक्षित रहन आग्रह गरे ।

जनप्रतिनिधिलाई समुदायसम्म पुगेर उच्च मनोवलका साथ काम गर्न आग्रह गरे । सामाजिक विकास मन्त्री जीवन घिमिरेले स्वास्थ्यकर्मीको मनोबल उच्च पार्न सरकारले काम गरिरहेको बताए ।

कोसी अस्पतालकी मेडिकल सुपरिटेन्डेन्ट डा. संगीता मिश्राले कोरोना अस्पतालका लागि समूह बनाएर कार्य विभाजन गरिएको जानकारी दिइन् ।

कोरोना अस्पतालको जनशक्ति व्यवस्थापनको काम थप व्यवस्थित बनाउने तयारी भइरहेको उनले बताइन् ।

प्रकाशित : चैत्र २४, २०७६ १९:०३
पूरा पढ्नुहोस्
प्रतिक्रिया
पठाउनुहोस्
×