फुटबल क्लबद्वारा स्वास्थ्यकर्मीलाई सुरक्षा पोशाक

सदरमुकाम इलामस्थित जिल्ला अस्पतालमा कार्यरत स्वास्थ्यकर्मीहरुले कमसल मास्क लगाएका भरमा बिरामीको जाँच गरिरहेका छन् । यसबाट जोखिम बढ्ने भएकाले उनीहरुलाई संक्रमणबाट रोक्ने पोशाक ५० सेट उपलब्ध गराइएको क्लबले जनाएको छ ।

इलामका विभिन्न १० वटा स्थानीय तहले २ सय ७४ जनालाई राख्न सकिने क्वारेन्टाइन निर्माण गरेका छन् । सामान्य लक्षण देखिएका ८० जनाभन्दा बढीलाई क्वारेन्टाइनमा राखिएको छ ।

जिल्ला प्रशासन कार्यालय इलामका अनुसार इलाम नगरपालिका ६ जना र रोङ गाउँपालिकामा ८२ जनालाई क्वारेन्टाइनमा राखिएको छ । केही दिनअघि भारतबाट आएका सातजनालाई ज्वरो र रुघाखोकीको लक्षण देखिएपछि विराटनगरस्थित कोसी अस्पताल पठाइएको प्रशासनले जनाएको छ ।

यसैबीच, इलामकै फाकफोकथुम गाउँपालिकाका जनप्रतिनिधिले एक महिनाको तलबभत्ता कोरोना संक्रमण रोकथामका लागि खर्च गर्ने भएका छन् । गाउँपालिकाले सबै वडाहरुमा सेनिटाइजर र साबुन र मास्क वितरण गरेको जनाएको छ ।