प्रदेश १ का आइसोलेसनमा ९ जना र क्वारेन्टाइनमा १०३ जना
मोरङ — कोभिड–१९ को आशंकामा प्रदेश १ स्थित विभिन्न अस्पतालमा रहेका आइसोलेसन वार्डमा ९ जना बिरामीको उपचार भइरहेको छ ।
विराटनगरस्थित कोशी अस्पतालमा ३, झापाको मेची अञ्चल अस्पतालमा १ र वीपी कोइराला स्वास्थ्य विज्ञान प्रतिष्ठान धरानमा ५ जनाको उपचार भइरहेको प्रदेश १ को सामाजिक विकास मन्त्रालयलको तथ्यांकले जनाएको छ ।
यस्तै, कोरोनाको शंकास्पद १ सय ३ जनालाई प्रदेशस्थित विभिन्न क्वारेन्टाइनमा राखिएको सामाजिक विकास मन्त्रालयका जनस्वास्थ्य महाशाखा प्रमुख सुरेश मेहताले बताए । प्रदेशमा हालसम्ममा २ सय ३ जनालाई होम क्वारेन्टाइनमा राखिएको उनले सुनाए । शंकास्पद २० जना बिरामीको स्वाब परीक्षणका लागि पठाइएको मेहताको भनाइ थियो ।
प्रदेशभरमा हालसम्ममा १ हजार ४ सय ६४ शय्याको क्वारेन्टाइन र २ सय ७४ शय्याको आइसोलेसन वार्ड तयार भएको मेहताले बताए ।
लकडाउन उल्लंघन गर्ने ८८ सवारी नियन्त्रणमा
मोरङमा बिहीबार लकडाउन उल्लघंन गरेर चलाइएका ८८ वटा सवारीसाधन प्रहरीले नियन्त्रणमा लिएको छ । मोटरसाइकल ७० र ट्याक्टर २, सिटी रिक्सा र टेम्पो ५, स्कुटर २ र साइकल ९ वटा नियन्त्रणमा लिएको जिल्ला प्रहरी कार्यालय मोरङका सूचना अधिकारी मानबहादुर राईले बताए ।