कान्तिपुर वेबसाईट
AdvertisementAdvertisement

सुनसान पूर्वी नाका (फोटोहरु)

पर्वत पोर्तेल

काँकडभिट्टा — केही दिनअघिसम्म व्यस्त थियो मुलुकको पूर्वी नाका । तर, कोरोना संक्रमण रोक्न सरकारले गरेको नाकाबन्दी र लकडाउनका कारण पूर्वको सीमा नाका चकमन्न छ ।

मंगलबारदेखि भारतले पनि लकडाउन गरेपछि नाका सुनसान भएको छ । भारतीय प्रधानमन्त्री नरेन्द्र मोदीले तीन साताको लकडाउन घोषणा गरेका छन् ।


नाकामा सीमित सुरक्षाकर्मी र स्वास्थ्यकर्मीबाहेक कोही पनि छैनन् । सीमा वारपार गर्न प्रतिवन्ध छ । स्थानीयबासी घरमै छन् ।



भारतको पानीट्यांकी नाका पनि बिहानैदेखि ठप्प छ । मंगलबार रातिसम्म भारत र नेपालतिर अलपत्र परेका सर्वसाधारणलाई प्रवेश दिइएको थियो । तर, सरकारले बुधबारदेखि कोही कसैलाई आउजाउ गर्न नदिने निर्णय गरेको थियो ।






प्रकाशित : चैत्र १२, २०७६ १३:२८
प्रतिक्रिया
पठाउनुहोस्

थप एकमा देखियो कोरोना संक्रमण

बुनु थारु, अतुल मिश्र

काठमाडौँ — नेपालमा कोभिड १९ (कोरोना भाइरस) को अर्का एक जना संक्रमित भेटिएका छन् । यससँगै कोरोना संक्रमितको संख्या तीन पुगेको छ ।

बुधबार तेस्रो केस पोजेटिभ भेटिएको इपिडिमियोलोजी तथा रोग नियन्त्रण महाशाखाका एक पदाधिकारीले कान्तिपुरलाई बताए । संक्रमितको अन्य जानकारी भने खुलाइएको छैन । उनको टेकु अस्पतालमा उपचार भइरहेको छ ।

राष्ट्रिय जनस्वास्थ्य प्रयोगशालामा अहिलेसम्म ६८७ जनाको नमुना परीक्षण गरिएकोमा ६८४ को रिपोर्ट नेगेटिभ आएको छ ।

केही समयअघि चीनबाट आएका एक विद्यार्थीमा कोरोना संक्रमण देखिएको थियो । उनी अहिले उपचारपछि निको भइसकेका छन् ।

नेपालमा चैत ४ गते कतारको दोहा हुँदै नेपाल आएकी १९ वर्षीया युवतीमा संक्रमण देखिएको थियो ।

गत डिसेम्बरमा चीनकाे वुहानबाट सुरु भएकाे काेभिड-१९ का कारण अहिलेसम्म १८ हजार ९ सय १२ जनाको मृत्यु भइसकेकाे छ। त्यस्तै ४ लाख २३ हजारभन्दा बढी संक्रमित हुँदा एक लाख ९ हजारभन्दा बढी निको भएका छन्।
सम्बन्धित समाचार

प्रकाशित : चैत्र १२, २०७६ १२:४६
पूरा पढ्नुहोस्
प्रतिक्रिया
पठाउनुहोस्
×