‘सरकार कहाँ छ ?’

हिंसा र आपराधिक घटना नियन्त्रणमा सरकारले बेवास्ता गरेको भन्दै प्रदेशसभाको बैठकमा सांसदद्वारा आलोचना
विराटनगर

काठमाडौँ — सत्तारूढ दल नेकपाका प्रदेश सांसदले अनेक आपराधिक घटना भइरहँदा पनि सरकारले नियन्त्रण गर्न चासो नदेखाएको भन्दै आलोचना गरेका छन् । उनीहरू ‘सरकार कहाँ छ’ भन्दै प्रश्न गर्न थालेका छन् । 

प्रदेश १ सभाको शून्य समयमा बोल्दै सांसदहरूले प्रदेशमा सरकारको उपस्थिति नदेखिएको भन्दै सरकारको खोजी गर्न थालेका हुन् । सत्तापक्ष सांसद कुलप्रसाद शाम्बाले माघमा अज्ञात समूहले गराएको बम बिष्फोटबाट ६ करोड बढी रुपैयाँको क्षति हुँदासम्म सरकारले कुनै चासो नदेखाएपछि सरकार खोज्नुपर्ने अवस्था आएको बताए । किसानचोक–टाँडी सडक निर्माण गर्ने निर्माण कम्पनीको ३ वटा र दमकको महुवा पुल छेउमा २ वटा एक्स्काभेटरमा माघ ५ गते अज्ञात समूहले आगजनी गरेको थियो । यस्तै, माघ १० गते केराबारी गाउँपालिका कार्यालय भवनमा र माघ १२ गते सिंहदेवीस्थित एनसेल टावरमा विस्फोट भएको थियो ।


प्रदेशमा शृङ्खलाबद्ध बिष्फोट र हत्याका घटना भइरहँदासमेत प्रदेशको शान्ति सुरक्षाको अधिकार पाएका प्रदेश सरकार अज्ञात रहेकाले खोजी गर्न बाध्य भएको शाम्बाले बताए । प्रमुख प्रतिपक्षी दल कांग्रेसका उपनेता हिमाल कार्कीले सत्तापक्षकै सांसदले सरकार नदेखिएको, हराएको, अज्ञात रहेको अभिव्यक्ति आएकाले सरकारको खोजी गर्न सभामुख प्रदीपकुमार भण्डारीलाई ध्यानाकर्षण गराए ।


प्रमुख प्रतिपक्षी दल कांग्रेसका प्रमुख सचेतक केदार कार्कीले प्रदेश लोकसेवा आयोगका अध्यक्ष, प्रदेश लगानी बोर्डको कार्यकारी निर्देशकमा अन्य प्रदेशका व्यक्तिलाई नियुक्त गरेर प्रदेशवासीको योग्यतामाथि प्रश्न चिह्न लगाएको आरोप लगाए । काठमाडौंका उत्तमकुमार भट्टराईलाई आयोगको अध्यक्षमा र सिरहाको बस्तीपुरको डा. सरोज कोइरालालाई लगानी बोर्डको कार्यकारी निर्देशकमा नियुक्त गरेर प्रदेशवासीको अपमान गरेको उनको भनाइ थियो ।


यसैबीच, सत्तारूढ दलका सांसद काजीमान कागतेले २० लाखसम्मको गाडी खरिदका लागि भन्सार छुट व्यवस्था गर्न माग गरेका छन् । ‘विभिन्न समितिका सभापति, मन्त्री, मुख्यमन्त्री, सभामुख, उपसभामुखलगायत २२ जना प्रदेश सांसदले प्रदेश सरकारबाट गाडी सुविधा प्राप्त गरेका छन्,’ उनले भने, ‘९३ जना प्रदेश सांसदमध्ये ७१ जना सांसदलाई गाडी सुविधाका लागि भन्सार छुटको व्यवस्था गर्नुपर्छ ।’ त्यसो गर्न नसके आफूहरूका लागि यातायातको व्यवस्था गर्न कागतेले माग गरे । सांसद लीला सुब्बाले प्रदेश सरकारले सहिदलाई विभेद र अपमान गरेको आरोप लगाइन् । पञ्चायतकालमा सहिद भएका २६ सहिदमध्ये छिन्ताङ घटनाका १० जनाका परिवारलाई मात्र प्रदेश सरकारले नगद १० लाख रुपैयाँ दिएको भन्दै उनले कुनै पार्टी र कुनै जातिको नहुने तर्क गरिन् ।


प्रकाशित : फाल्गुन २, २०७६ ०९:३५
प्रतिक्रिया
पठाउनुहोस्

सूर्य नेपाल वेस्टर्न ओपन : धनबहादुरले लिए अग्रता

कान्तिपुर संवाददाता

पोखरा — सूर्य नेपाल वेस्टर्न ओपनको दोस्रो दिन बिहीबार धनबहादुर थापाले ३६ होल टुंगिँदा २ अन्डर १३६ कार्डसहित शीर्षस्थानमा उक्लिएका छन् । पहिलो दिन लेभल पार खेल्दै गतिलो सुरुआत गरेका आर्मीका गल्फर धनले शिवराम श्रेष्ठमाथि चार स्ट्रोकको अग्रता बनाए । 



अन्तिम दिनको प्रतिस्पर्धा बाँकी छ । धनले दोस्रो दिन २ अन्डर ६७ को स्कोर कार्ड बनाउँदै अग्रता लिए । उनी ३ र ८ औं होलमा बर्डी हिर्काउँदै फ्रन्ट नाइन २ अन्डरको स्थितिबाट अगाडि बढे । ब्याक नाइन भने लेभल पारमा टुंग्याए । १२ औं बोगी खेपेका उनले १५ औं होलमा त्यसको क्षतिपूर्ति पूरा गरे । १७ औं मा बर्डी हिर्काउँदै स्ट्रोक जोगाउने लय देखाए पनि अन्तिम होलमा भने बोगीको सामना गरे । १८ औं होलमा बल बंकरमा खसेपछि समस्या हुन पुग्यो । ‘ढिस्कोलाई आधार मानेर हिर्काउँदा ढिस्कोमै ठोकिएर बल बंकरमा झर्‍यो । ढिस्को पार गरेको अवस्थामा ओबी हुन्थ्यो । झन् समस्या आउँथ्यो,’ उनले भने, ‘बंकरबाट हल्का चिप गरें । ग्रिनबाट सहज पट गर्दै थप स्ट्रोक हान्नबाट जोगाएँ ।’

दोस्रो दिन खराब लयमा देखिएका शिवराम दोस्रो स्थानमा झरे । उनले बिहीबार ३ ओभर खेल्न पुग्दा समग्रमा २ ओभर १४० को स्थितिमा रहे । उनको फ्रन्ट नाइन खराब रह्यो । तीन ओभर ३७ को स्थितिबाट ब्याक नाइन सुरु गरेको शिवरामले १ अन्डर खेल्दै ३६ होल पूरा गर्दा १ ओभर १३९ मा छन् । उनले अघिल्लो दिन एक अन्डरसँगै अग्रता लिएका थिए । उनले फ्रन्ट नाइनमा ७, ८ र नवौं होलमा बोगी खेपे । ब्याक नाइनमा १०, १५ र १६ होलमा बर्डी हिर्काउँदै लेभल पारको संघारमा रहे पनि १२ औंमा बोगी खेप्दा केबल एक अन्डरमा झर्न पुगे ।

शुक्र राईले शिवरामसँग टाई खेलेका छन् । पहिलो दिन १ ओभरमा ७० मा टुंग्याएका शुक्रले दोस्रो दिन पनि १ ओभर ७० को कार्ड बनाउँदै लयलाई निरन्तरता दिए । पार फाइभको १० औं होलमा उनले ९ स्ट्रोक हिर्काउँदै तनाव झेल्न पुगे । १३, १४, १५ औं होलमा बर्डी हिर्काउँदै खेलमा फर्किए । यद्यपि ब्याक नाइन एक ओभर ३६ मा टुंग्याउँदा उनको फ्रन्ट नाइनमा हानेको २ अन्डरले उत्साह जोगाइराख्यो । शिवराम र शुक्रसँगै जयराम श्रेष्ठले पनि खेल टुंग्याउँदा २ ओभर १४० को कार्ड बनाए ।

अघिल्लो दिन ३ ओभर ७२ को कार्डबाट सुरु गरेका उनले दोस्रो दिन भने सुधारिएको प्रदर्शन गरे । फ्रन्ट नाइनलाई लेभल पार खेल्दै उत्कृष्ट सुरुआत गर्दा ब्याक नाइन भने अझ प्रभावशाली प्रदर्शन गरे । ब्याक नाइनमा उनले १ अन्डर खेल्दै समग्रमा २ ओभर १४० को कार्डमा रहे । उनले ११ औंमा बोगी खेप्दा १५ र १७ औं होलमा बर्डी हिर्काएका थिए ।

पाँचौं स्थानमा नीरज तामाङ छन् । उनले दोस्रो दिन २ ओभर ७१ को कार्ड खेले । ३६ होलको खेल टुंग्याउँदा ३ ओभर १४१ को स्कोरमा छन् । उनले बिहीबार फ्रन्ट र ब्याक नाइन दुवैमा एक–एक ओभर खेल्दै टुंग्याए । पहिलो दिन उनी एक ओभर ७० को कार्डमा थिए ।

भुवन नगरकोटी, भुवनकुमार रोका र सञ्जय लामा समान ४ ओभरसहित टाइमा छन् । समान २ ओभर ७१ को स्कोर बनाउँदै पहिलो दिनको १८ होलबाट विश्राम लिएका उनीहरू बिहीबार २ ओभर ७१ को कार्डमै खेल्दै टाइमा छन् । भुवन रोकाले फ्रन्ट नाइनलाई १ ओभर ३५ मा टुंग्याउँदा ब्याक नाइन गतिलो सुरुआत गरे पनि १८ औं होलमा डबल बोगी खेपेपछि उनको स्कोर १ अन्डर ३४ मा रहँदै दोस्रो दिन लेभलपार खेले ।

रवि खड्का ६ ओभर १४४ कार्ड सहित नवौं स्थानमा छन् । रविले नवौं र १४ औं होलमा डबल बोगी खेपेपछि दोस्रो दिन खराब नजितासँगै नवौं स्थानमा पुग्दै कट जोगाएका हुन् । रामकृष्ण श्रेष्ठ ७ ओभरसहित १४५ को कार्डमा रहँदै १० औं स्थानमा छन् ।

एमेच्योरतर्फ जितेन्द्र राई १३ ओभर १५१ को कार्डसहित शीर्षस्थानमा यथावत् छन । दोस्रो स्थानमा भने प्रज्ज्वल गुरुङ छन् । उनले १५ ओभर १५३ को कार्डमा खेलिरहेका छन् । दोस्रो दिन खेल टुंगिँदा २४ प्रो कट जोगाउँदै उपाधि यात्रामा छन् । १६ एमेच्योरमध्ये केवल ६ गल्फर मात्रै कट जोगाउँदै उपाधि होडमा छन् ।

प्रकाशित : फाल्गुन २, २०७६ ०९:३३
पूरा पढ्नुहोस्
प्रतिक्रिया
पठाउनुहोस्
×