मन्त्री थपिए, असन्तुष्टि बढ्यो

देवनारायण साह

(मोरङ) — मन्त्री छनोट र लोक सेवा आयोग पदाधिकारी सिफारिस एकलौटी गरिएको भन्दै सत्तारुढ नेकपामा असन्तुष्टि बढेको छ । प्रदेश १ का मुख्यमन्त्री शेरधन राईले पार्टीको सुझाव र एकताको मर्मविरीत मन्त्रीमण्डल बिस्तार र प्रदेश लोक सेवा आयोगमा तीन सदस्यको नाम सिफारिस गरेको तत्कालिन माओवादी नेताहरूको आरोप छ ।

ZenTravel

सरकार गठन भएको २३ महिनापछि आइतबार मुख्यमन्त्रीले मन्त्रीमण्डल बिस्तार गर्दै चारजना राज्यमन्त्री नियुक्त गरिएको थियो । भूमि व्यवस्था, कृषि तथा सहकारी मन्त्रालयमा रामबहादुर मगर, भौतिक पूर्वाधार विकास मन्त्रालयमा अम्बिरबाबु गुरुङ, सामाजिक विकास मन्त्रालयमा जसमाया गजमेर र उद्योग, पर्यटन, वन तथा वातावरण मन्त्रालयमा विजयकुमार विश्वास राज्यमन्त्री नियुक्त भएका छन् ।

Meroghar


राज्यमन्त्रीमा नियुक्ति पाएका प्रदेश कमिटी सदस्य तथा तत्कालिन माओवादीका विश्वासलाई चौथो मर्यादा क्रममा र नेकपा जिल्ला कमिटी सदस्य रहेका अम्बिरबाबु गुरुङलाई दोस्रो मर्यादामा राखेकामा पनि माओवादी पक्ष रुष्ट बनेको छ । तत्कालिन माओवादीले विश्वासलाई भूमि व्यवस्था, कृषि तथा सहकारी मन्त्रालय दिन सुझावका दिएको थियो । ‘तर मुख्यमन्त्री राईले आफ्नो अनुकुल निर्णय लिए’ एक नेताले भने ।

पार्टीको प्रदेश कमिटिले रिक्त रहेको भौतिक पूर्वाधार विकास र भूमि व्यवस्था, कृषि तथा सहकारी मन्त्रालयमा पहिले मन्त्री नियूक्त गर्न दिएको सुझाब विपरीत मुख्यमन्त्री राईले दुबै मन्त्रालय आफ्नै मातहत रहने गरी राज्यमन्त्रीहरू नियूक्त गरेको गुनासो छ । यसअघि भूमि व्यवस्था, कृषि तथा सहकारी मन्त्रालय तत्कालिन माओवादीले पाउने सहमति भएको अबस्थामा उक्त मन्त्रालयमा तत्कालिन एमालेका रामबहादुर मगरलाई राज्यमन्त्री नियुक्ति गरेको प्रति माओवादी पक्षले चित्त बुझाएको छैन ।

मुख्यमन्त्री राईले पार्टी र संसदीय दललाई वेवास्ता गरी प्रदेश लोक सेवा आयोगमा सदस्यको नाम सिफारिस गरेकोप्रति पनि पार्टी पंक्ति र प्रदेशसभा सदस्यहरू असन्तुष्ट छन् ।

आयोगको अध्यक्षमा खोटाङका उत्तमकुमार भट्टराई, सदस्यद्वयमा टीकादत्त राई र सजना दाहालको नाम सिफारिस गरेको छ । नेकपाका प्रदेश १ सचिव सुरेशकुमार राईले पार्टीको एकता प्रक्रियाले पूर्णता नपाएको अबस्थामा प्रदेशमा पार्टी एकतालाई असर पार्ने गरी पार्टीको सुझाबसमेत बेवास्ता गरी मुख्यमन्त्री राईले एकपछि अर्को निर्णय गरेकामा आशंका व्यक्त गरे ।

सहमतिबिपरीत भूमि व्यवस्था, कृषि तथा सहकारी मन्त्रालयमा मन्त्रीको साटो तत्कालिन एमालेबाट राज्यमन्त्री नियूक्ती गर्नु, पार्टीका प्रदेश सदस्य विश्वासलाई चौथो मर्यादामा र पार्टीका जिल्ला सदस्य गुरुङलाई दोस्रो मर्यादामा राख्नु उचित नभएको उनको भनाइ छ । यस्तै प्रदेश लोक सेवा आयोगमा एकलौटी ढंगले नाम सिफारिस गरेको घटनाले आफूहरूलाई गम्भीर बनाएको राईको भनाई छ ।

उनले पार्टीले मुख्यमन्त्रीलाई सरकार गठन भएको केही महिनापछि नै रिक्त मन्त्रालयहरूमा मन्त्री नियुक्ति गरेर प्रभावकारी काम गर्न सुझाव दिए पनि बेवास्ता गर्नुले आशंकाहरू उब्जाएको बताए । यस विषयमा औपचारिक रुपमा मुख्यमन्त्रीसँग बसेर छलफल गरेर गर्ने राईले जनाए ।

संबिधानले महिलाको ३३ प्रतिशत राज्यको हरेक निकायमा सहभागिताको ग्यारेण्टीको अबस्थामा प्रदेश सरकारले १ जना महिला प्रदेशसभा सदस्यलाई मात्रै राज्यमन्त्रीमा नियुक्त गरेकाले महिला प्रदेशसभा सदस्यहरूले समेत असन्तुष्टि जनाएका छन् । मन्त्रीमण्डलमा ११ दशमलव ११ प्रतिशत मात्रै महिलाको प्रतिनिधित्व छ ।

प्रकाशित : माघ ८, २०७६ १०:०७
ADVERTISEMENT
ADVERTISEMENT
प्रतिक्रिया
पठाउनुहोस्

अझै भेटिएनन् बेपत्ता विद्यार्थी

रसुवाको गोसाइँकुण्ड घुमेर हेलम्बु फर्कने क्रममा सिन्धुपाल्चोक हेलम्बु र नुवाकोटबीच हिमक्षेत्र घ्याङफेदीबाट शुक्रबार बेपत्ता दुई विद्यार्थीको चार दिनयता हेलिकप्टरबाट खोजी भइरहेको छ
अनिश तिवारी

(सिन्धुपाल्चोक) — चार दिनदेखि लाङटाङ राष्ट्रिय निकुञ्जमा हराइरहेका दुई विद्यार्थीको खोजी कार्य तीव्र बनाइए पनि भेटिएका छैनन् ।

रसुवाको गोसाइँकुण्ड घुमेर हेलम्बु फर्कन लागेका बौद्धस्थित कुमारी बोर्डिङ स्कुलका विद्यार्थी सिन्धुपाल्चोक हेलम्बु र नुवाकोटको बीच हिमक्षेत्र घ्याङफेदीबाट बेपत्ता भएको प्रहरीले जनाएको छ । हेलम्बु गाउँपालिका १ का १७ वर्षीय वाङ्गेल शेर्पा र काठमाडौं गोकर्णेश्वर नगर ७ का जापान लामा शुक्रबारदेखि एकैसाथ हराएपछि हेलिकप्टरबाट खोजी कार्य थालिएको छ । हेलम्बु गाउँपालिकास्थित मेलम्चीघ्याङ माध्यमिक विद्यालयका प्रधानाध्यापक पूर्ण गौतमकाअनुसार माघ २९ मा उनीहरू हेलम्बु पुगेका थिए । बुधबार गोसाइँकुण्ड गएका दुवै घ्याङफेदीस्थित फेदी लजमा बास बसे ।

हेलम्बुबासी वाङ्गेलले भने शुक्रबार बिहान ७ बजेतिर बाक्लो हिमपात भइरहेको परिवारलाई फोनबाट जानकारी दिएका थिए । ‘परिवारबाट हिमपातमा नहिँड्न भन्दै लजमै बस्न भने पनि उनीहरू बिहान ९ बजेतिर हेलम्बु फर्किएको पाइयो, फेरि दुवैको खबर छैन,’ वाङ्गेलका शिक्षक गौतमले भने । उनीहरू घ्याङफेदीबाट दक्षिण पर्ने तालु गाउँतिर घुम्न हिँडेको खबर पाएको उनले सुनाए । ‘त्यसपछि उनीहरू सम्पर्कविहीन छन्,’ उनले भने । शनिबार बेलुकीसम्म तालु गाउँ आसपास कोही कराइरहेको सुनिएको त्यहाँका स्थानीयले बताए । उनीहरू फसेको अनुमान गरिएको स्थान एकदमै अप्ठ्यारो र बाक्लो हिउँ जमेकाले स्थानीय उद्धारमा निस्कन सकेका छैनन् ।

हेलम्बुको मेलम्चीघ्याङबाट ४ जना उद्धारकर्ता हिँडेर ठाडेपाटी पुगेको र हिउँ जमेर हिँड्न नसकेपछि आफूलाई गुहारेको हेलम्बु गाउँपालिकाका प्रमुख निमा ग्याल्जेन शेर्पाले जानकारी दिए । ‘तत्कालै हेलिकप्टर लिएर ठाडेपाटी पुगे, त्यहाँबाट घोप्टेफेदी पुर्‍याएर उद्धारकर्ता झारिएको छ, सम्पूर्ण तैयारीका साथ घोप्टेफेदीबाट उद्धारको लागि खट्दै छन्,’ उनले भने । गएको शुक्रबारदेखि २ विद्यार्थी बेपत्ता भएको अनुमानित स्थानमा ३ दिनसम्म हेलिकप्टरबाट खोजी प्रयास भए पनि केही प्राप्त हुन नसकेको जिप्रका नुवाकोटका प्रहरी उपरीक्षक अविनारायण काफ्लेले बताए । ‘स्थलगत रूपमा नुवाकोट १०, सिन्धुपाल्चोकबाट ४ र होटलका २ जना गरी १६ जनाले बेपत्ता भएको स्थानमा खोजी जारी राखेका छन्,’ उनले भने ।

प्रकाशित : माघ ८, २०७६ ०९:५९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×