हत्या गरी फरार तीन पक्राउ
खोटाङ — एक युवालाई हत्या गरी फरार तीन जना पक्राउ परेका छन् । गत मंसिर २६ गते राति साढे ८ बजेतिर हलेसी तुवाचुङ नगरपालिका–७ गैरी गुठका २७ वर्षीय रमेश राईको हत्या गरी फरार भएका उनीहरुलाई प्रहरीले शनिबार पक्राउ गरी आइतबार सार्वजनिक गरेको हो ।
हत्यामा संलग्न हलेसी तुवाचुङ नगरपालिका–९ तल्लो चिचिङ्गाका २७ वर्षीय भविन्द्र राई, २१ वर्षीय अशोक राई र २५ वर्षीय बलराम राई ओखलढुङ्गा र उदयपुरको सिमानामा पर्ने घुर्मी आसपासबाट पक्राउ परेका हुन् ।
आरोपी मध्ये भविन्द्र राई सशस्त्र प्रहरी बल हलेसी गुल्म मझुवागढीमा कार्यरत सिपाही हुन् । घटनाकै दिन घर बिदामा गुल्मबाट निस्किएको सशस्त्र प्रहरी बल हलेसी गुल्मका डीएसपी भोला गिरीले बताए ।
उनीहरुलाई पक्राउपछि सात दिनको म्याद थपेर अनुसन्धान सुरु गरिएको प्रहरी नायब उपरीक्षक वामदेव गौतमले बताए ।
प्रकाशित : मंसिर २९, २०७६ १६:१६