अपांगता भएकाको गला रित्तै

त्यसमा लेखिएको थियो ‘खाना तथा नास्ताको ब्यवस्था छ’ । अपांग बाल आवासगृहमा आयोजना गरिएको कार्यक्रम पत्राचार गरिएअनुसार नै भयो । सहभागीले नास्ताको रूपमा चिया बिस्कुट र मासु–भात खाएर फर्किए । कार्यक्रममा हरेक अतिथिले गलामा सयपत्री फूलको माला लगाए । तर, जसका लागि दिवस मनाइँदै थियो उनीहरूको गला भने रित्तै भयो । अतिथिले लगाएका माला अपांगता भएकाहरूका लागि खोलिएको बाल आवासगृहमा नै तयार पारिएको थियो । आफू माला लगाएर कुर्सीमा बसेका अतिथिले अपांगता भएका बालबालिकाका लागि भने खादासम्म लगाएर सम्मान गर्ने तयारी थिएन ।

२० हजार रुपैयाँ खर्च छुट्याइएको कार्यक्रममा अपांगता भएका बालबालिकाका लागि तातो आलु र म्युजिकल चियर प्रतियोगिता राखिएको थियो । मादलको तालमा नृत्य प्रतियोगिता बालबालिका आफैंले देखाएका थिए । कार्यक्रममा सहभागी नेकपा जिल्ला कमिटी कार्यालय टिमका सदस्य सुरज ओझाले आफूहरू माला लगाएर बसिरहँदा बालबालिकाको गला रित्तो हुनु राम्रो नभएको बताए । ‘सीडीओ साबले यो मालाचाहिं बच्चाहरूलाई लगाइदिऊँ भन्नुभयो तर लगाउनेहरू हजुरहरूका लागि बनाएको भन्दै लिएर आए,’ ओझाले थपे, ‘वास्तवमा उनीहरूको मनोबल बढाउन बालबालिकालाई लगाइदिएर उनीहरूको दिवस भन्ने सन्देशचाहिँ दिनुपर्थ्यो ।’ यो कमजोरी आयोजकको भएको ओझा बताउँछन् ।

आयोजक नगरपालिकाका निमित्त प्रमुख सेन्दाङ ठूला अपांगता भएकाहरूलाइ माला लगाएरै सम्मान गरिएको बताउँछन् । ‘बाहिरवाट ७/१० जना अपांगता भएकाहरू आउनुभएको थियो,’ उनले भने, ‘सानो कार्यक्रम भएकाले बालबालिकालाई खेलकुद गरायौं ।’