खोलामा डुबेर २ बालकको मृत्यु
दमक — रतुवा खोलामा जेसीबीले खनेको खाडलमा डुबेर शनिबार दिउँसो २ बालकको मृत्यु भएको छ ।
झापाको दमक नगरपालिका १ स्थित रतुवा खोलामा पौडी खेल्न गएका बालकहरुको मृत्यु भएको इलाका प्रहरी कार्यालय दमकले जनाएको छ । प्रहरीकाअनुसार दमक १ का ९ वर्षीय आयुष पुर्कुटी र पाँचथर फाल्गुनन्द गाउँपालिका ५ घर भई दमक १ मा बस्दै आएका १२ वर्षीय निश्चल चेम्जोङको खाडलमा डुबेर ज्यान गएको हो ।
रतुवा खोलामा पुल निर्माण चलिरहेकाले जेसीबीले खोला गहिराएको थियो । उक्त खाडलमा साथीहरुसँग पौडी खेल्न गएका दुवै बालकको डुबेर घटनास्थलमै मृत्यु भएको प्रहरी नायव उपरीक्षक विजयकुमार पण्डितले जानकारी दिए । घटनाबारे थप अनुसन्धान भइरहेको पण्डितले बताए ।