कनकाई बहुमुखी क्याम्पसमा फेरि तालाबन्दी

अर्जुन राजवंशी

बिर्तामोड — विभिन्न ४ सुत्रीय माग राख्दै नेपाल कम्युनिष्ट पार्टी (नेकपा) तथा लिम्बुवान निकट विद्यार्थीहरुले झापाको सुरुङ्गास्थित कनकाई बहुमुखी क्याम्पसमा तालाबन्दी गरेका छन् ।

विद्यार्थीहरुले शुक्रबार बिहान ६ बजेर ४५ मिनेटमा क्याम्पसको प्रशासनिक भवनको मूल गेटमा ताला लगाएका हुन् । नेकपा निकट अनेरास्ववियू, अखिल क्रान्तिकारी र लिम्बुवान विद्यार्थी मञ्चका विद्यार्थीले दोस्रोपटक तालाबन्दी गरेको क्याम्पस प्रमुख विकासप्रसाद उप्रेतीले जानकारी दिए । यसअघि कार्तिक १९ गते पनि विद्यार्थीहरुले क्याम्पस प्रमुखको कार्यकक्षमा तालाबन्दी गरेका थिए । उक्त ताला कार्तिक २३ गते प्रहरीले फुटाएको थियो ।

विद्यार्थीहरुले क्याम्पसमा नियमित पठनपाठन हुनुपर्ने, प्राध्यापक हरि तिम्सिनालाई पुनर्बहाली गर्नुपर्ने, भाडामा ल्याइएका प्राध्यापकहरुलाई फिर्ता पठाउनुपर्ने र ९ जना विद्यार्थीविरुद्ध प्रहरी कार्यालयमा परेको उजुरी फिर्ता लिनुपर्ने माग राखेका छन् ।

आफूहरुको मागप्रति क्याम्पस प्रशासनले बेवास्ता गरेकाले दोस्रो पटक तालाबन्दी गर्नुपरेको अनेरास्ववियू कनकाई नगर इन्चार्ज उत्सव बास्तोलाले बताए । आन्दोलनरत विद्यार्थीहरुले कार्तिक २३ गते क्याम्पस सञ्चालक समिति अध्यक्ष प्रकाश चुडाललाई क्याम्पस हाताभित्र कालोमोसो दलेका थिए । मोसो दल्ने कार्यमा संलग्न रहेको आरोपमा ९ जना विद्यार्थीमाथि कारबाहीको माग गर्दै अध्यक्ष चुडालले इलाका प्रहरी कार्यालय बिर्तामोडमा उजुरी दिएका छन् ।

कनकाई बहुमुखी क्याम्पसमा कार्तिक १४ गतेदेखि पठनपाठन प्रभावित हुँदै आएको छ । क्याम्पस सञ्चालक समितिले करारमा कार्यरत प्राध्यापक हरि तिम्सिनालाई सेवाबाट बर्खास्त गर्ने निर्णय गरेपछि क्याम्पसमा विवाद चुलिएको हो । करार अवधि सकिएकाले सञ्चालक समितिले तिम्सिनालाई बिदा दिने निर्णय गरेको क्याम्पस प्रमुख उप्रेतीले बताए ।

नेकपा निकट प्राध्यापक तथा विद्यार्थीहरुले तिम्सिनालाई विभिन्न झुटा मुद्दा लगाएर सेवाबाट बर्खास्त गरेको आरोप लगाएका छन् । विवाद समाधानका लागि पटकपटक वार्ता भएपनि सहमति जुट्न नसक्दा क्याम्पसमा तीन सातादेखि पठनपाठन प्रभावित बनेको छ ।

प्रकाशित : मंसिर ६, २०७६ ११:३४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

जिल्ला समन्वय प्रमुखको निधन 

जिल्लाका सबै स्थानीय तह र विद्यालय बिदा
माधव अर्याल

पाल्पा — जिल्ला समन्वय समिति पाल्पाका प्रमुख दयाराज बस्यालको ६८ वर्षको उमेरमा निधन भएको छ । नेपाल कम्युनिष्ट पार्टीका प्रदेश सदस्य समेत रहेका बस्यालको हिजो दिउँसो उपचारको क्रममा काठमाडौंमा निधन भएको हो । 


तानसेनको मिशन अस्पतालमा उपचार गराइरहेका बस्यालको फोक्सोमा पानी भरिएको देखिएपछि काठमाडौं लगिएको थियो। बस्याललाई मधुमेह र उच्च रक्तचाप थियो। २००९ साल बगनासकाली गाउँपालिकाको यम्घामा जन्मेका बस्याल कम्युनिष्ट पार्टीको संगठन, शिक्षक आन्दोलन, सामाजिक जागरणको अभियान सक्रिय व्यक्ति हुन्। पञ्चायतले शिक्षण सेवाबाट बर्खास्त गरेपछि २०४३ सालमा जनपक्षीय उम्मेदवार बनेका तत्कालीन जिल्ला पञ्चायतको जनपक्षीय उपसभापति र उपसभापति पदमा रहादा विद्रोह गरेर प्रजातन्त्रको पक्षमा लागेका हुन्।

बस्याललाई श्रद्धाञ्जली दिन प्रदेश ५ का भौतिक योजनामन्त्री बैजनाथ चौधरी, संघीय, प्रदेश सांसद साथै जिल्लास्तरीय सबै राजनीतिक दलका नेताहरु जम्मा भएका थिए। जिल्ला समन्वय समितिको प्राङ्गणबाट नेकपा कार्यालय हुँदै टुँडिखेलमा अन्तिम श्रद्धान्जली दिएपछि कालीगण्डकी नदीको राम्दीघाट लगिएको छ। बस्यालका २ छोरा र २ छोरी छन्।

जिल्ला समन्वय समितिका बहालवाला प्रमुख भएकाले जिल्लाका सबै स्थानीय तह, शिक्षणसंस्था बिदा दिइएको छ। शिक्षा विकास तथा समन्वय इकाईको शिक्षा समितिका अध्यक्ष भएकाले पनि विद्यालय बिदा दिइएको छ। स्थानीय तहका सबै जनप्रतिनिधिले श्रद्धाञ्जली सभा गर्ने र शोक पुस्तिका राखेर एक दिनका लागि बिदा दिइएको छ।

प्रकाशित : मंसिर ६, २०७६ ११:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×