प्रहरीलाई ‘केटी मिलाउन’ खोज्दा...

विनु तिम्सिना

(विराटनगर) — भारतसँग सीमा जोडिएको विराटनगर महानगरपालिकाको रानी क्षेत्रमा सञ्चालित होटलमा ‘यौनजन्य क्रियाकलाप’ हुने गरेको गुनासो जिल्ला प्रहरी कार्यालय मोरङमा पटक पटक आइरहेको थियो । गुनासो सँगसँगै त्यस क्षेत्रका स्थानीयहरूले प्रहरीकै मिलेमतोमा होटल सञ्चालकले यौन धन्दा चलाइरहेको भन्ने आरोपले मोरङ प्रहरी हैरान बनेको थियो ।

स्थानीयकै गुनासोका आधारमा प्रहरीले रानी क्षेत्र आसपास र विराटनगरका अन्य शंकास्पद ५७ वटा होटलमा छापा मारेको थियो । त्यस क्रममा जोडी पक्राउ परे पनि व्यावसायिक रूपमा यौन धन्दा नै हो भन्ने पुष्टि नहुँदा उनीहरू छुटेर जान्थे तर स्थानीयको गुनासोमा कमी आएन ।

यौन धन्दा नै चलाइएको हो भन्ने प्रस्ट प्रमाण नहुँदा प्रहरीले होटलबाट पक्राउ गरेका जोडीहरू छुट्ने र स्थानीयको गुनासो आउने क्रम पनि नरोकिएपछि मोरङ प्रहरीले प्रमाणसहित पक्राउ गर्ने नयाँ तरिका अपनायो । अवैध यौनधन्दा चलाउने होटल सञ्चालकलाई प्रमाणसहित पक्राउ गर्न मोरङ प्रहरीले फिल्मी शैली अपनायो । विराटनगर महानगरपालिका १५ रानीस्थित हिमालय गेस्टहाउसमा यौन धन्दा चल्ने गरेको कुरा प्रहरीले निकै दिन सूक्ष्म निगरानी गरेर पत्ता लगाएको थियो ।

प्रमाणसहित पक्राउ गर्न मोरङ प्रहरीले आफ्नै प्रहरी कर्मचारीलाई सोमबार साँझ ग्राहक बनाएर पठायो । सादा पोसाकमा ग्राहक बनेर होटल पुगेका प्रहरी कर्मचारीले होटलका कर्मचारी मोहम्मद रियाजलाई ‘केटी पाइन्छ, पाइँदैन’ भनेर सोधे । रियाजले चाहिएमा फोन गरेर जत्ति पनि बोलाउन सक्ने बताए ।

रियाजको कुरा सुनेपछि सादा पोसाकमा गएका प्रहरी कर्मचारीले केटी बोलाउन भन्दै होटलमा कोठासमेत बुक गरे । रियाजले भारतको फारबिसगन्ज घर भएकी २५ वर्षीया एक युवतीलाई फोन गरेर बोलाए । बोलाएको केही घण्टामै यौन धन्दाका लागि युवती होटल आएपछि प्रहरीले कल गर्लका रूपमा काम गर्ने उनलाई र होटलका कर्मचारी मोहम्मद रियाजलाई प्रमाणसहित पक्राउ गरेको छ ।

पक्राउ परेका रियाज पनि भारतीय नागरिक हुन् । उक्त होटलका सञ्चालकसमेत भारतीय नागरिक हुन् । रियाज र युवती पक्राउ परेपछि होटलका मालिक फरार रहेको र उनको खोजी भइरहेको मोरङ प्रहरीका डीएसपी घनश्याम श्रेष्ठले बताए । भारतको सीमासँग जोडिएको विराटनगरको रानी क्षेत्रमा भारतीय नागरिकले होटल सञ्चालन गरेर भारतीय युवतीलाई यौनकर्ममा लगाउने र भारतीय युवालाई नै ग्राहकका रूपमा प्रयोग गर्ने धन्दा चलाउँदै आएको प्रहरीले जनाएको छ ।

रानी क्षेत्रका अधिकांश होटल तथा गेस्टहाउस भारतीय नागरिकले घर भाडामा लिएर सञ्चालन गर्दै आएको मोरङ प्रहरीका डीएसपी श्रेष्ठले बताए । ‘रानीका अधिकांश होटल र गेस्टहाउसका मालिक भारतीय नागरिक छन्,’ उनले भने, ‘अवैध धन्दा चलाउने र समस्या पर्‍यो कि भाग्न सजिलो हुने भएकाले उनीहरूले सीमा क्षेत्रको नजिकै होटल सञ्चालन गर्ने गरेका छन् ।’

सीमा क्षेत्रका धेरै होटल र गेस्टहाउसमा भारतीय महिलाले कल गर्लका रूपमा काम गर्ने गरेको अनुसन्धानबाट खुलेको उनले बताए । प्रहरीले रियाज र होटल सञ्चालकलाई मानव बेचबिखन तथा ओसारपसार ऐनअन्तर्गत मुद्दा चलाउन म्याद थप गरिसकेको छ । रानी क्षेत्रका होटलमा प्रहरीले नियमित निगरानी बढाउने र अनैतिक क्रियाकलापलाई निरुत्साहित गर्ने डीएसपी श्रेष्ठले बताए । चालु आर्थिक वर्षको चार महिनामा मात्रै प्रहरीले विराटनगर र रानी क्षेत्रका ५७ होटल तथा गेस्टहाउसमा छापा मारेको छ । होटलमा हुने अनैतिक क्रियाकलापलाई रोक्नुका साथै अन्य आपराधिक गतिविधि हुन नदिन प्रहरीले विभिन्न तरिकाबाट होटलको निगरानी र अनुगमन गर्दै आएको उनले बताए ।

केही दिनअघि मात्रै प्रहरीले १३ वर्षीया बालिकालाई जबर्जस्ती यौनजन्य कार्यमा संलग्न गराउँदै आएकी विराटनगर ८ की पूर्णिमा श्रेष्ठ मल्ललाई पक्राउ गरेको छ । कमजोर आर्थिक अवस्थाकी उनी काम खोज्दै झापाबाट विराटनगर आएकी थिइन् ।

काम खोज्ने क्रममा पूर्णिर्माको सम्पर्कमा पुगेकी बालिकालाई श्रेष्ठले केही दिन आफ्नै घरमा काम गर्न लगाएको र केही दिनपछि केटाहरू बोलाएर घुम्न पठाउने र यौनजन्य क्रियाकलापमा लगाउने गरेको बयान बालिकाले दिएको प्रहरीले जनाएको छ । केही समय बालिकालाई यौनजन्य क्रियाकलापमा संलग्न गराएपछि राम्रो कामका लागि भारतको सहरमा लगिदिने भन्दै जोगबनी पुर्‍याएपछि प्रहरीले त्यहींबाट मल्ललाई पक्राउ गरी बालिकाको उद्धार गरेको डीएसपी श्रेष्ठले जानकारी दिए । प्रहरीले मल्लविरुद्ध पनि मानव बेचबिखन तथा ओसारपसार ऐनअन्तर्गत मुद्दा चलाएको छ ।

प्रकाशित : कार्तिक २८, २०७६ १०:२८
प्रतिक्रिया
पठाउनुहोस्

जहाँ पर्दैनन् उजुरी

कान्तिपुर संवाददाता

झापा — झापाका धेरैजसो प्रहरीचौकीमा उजुरीको चाङ लाग्ने गर्छ । बारम्बार दर्ता हुने उजुरीका कारण प्रहरीलाई भ्याइनभ्याइ हुने गर्छ । यही जिल्लामा एउटा यस्तो पनि प्रहरी चौकी छ, जहाँ वर्षौयता एउटै उजुरी दर्ता भएका छैनन् । भद्रपुर– ३ को मेचीपारि प्रहरी चौकीमा स्थापना कालदेखि नै कुनै किसिमको उजुरी दर्ता भएकै छैन । ‘अहिलेसम्म उजुरी दर्ता भएर कुनै मुद्दा लैजानु परेको छैन’, मेचीपारि प्रहरी चौकीका इन्चार्ज असई मदनबहादुर बस्नेतले भने, ‘सानो गाउँ छ, झै झगडा या मुद्दा मामिला गर्ने फुर्सद कसैलाई छैन ।’

मेचीपारि तीनवटा टोल छन् । डोलोबस्ती, भाङबारी र डाँडा गाउँ । तीन टोलमा १ सय ५५ घरधुरीको बसोबास छ । राजवंशी समुदायको बाहुल्य छ । त्यसबाहेक कुर्मी र सन्थालहरू पनि बस्छन् । खेतीकिसानीमै व्यस्त यी गाउँका स्थानीयबीच मेलमिलाप छ । एक अर्काप्रति उनीहरू कहिल्यै आक्रामक छैनन् । भारतसँग साँधसीमा गाँसिएको डोलोबस्तीका अगुवा श्रीप्रसाद महतो भन्छन्, ‘भूमिका लागि हामी एकजुट छां, छिमेकीसँग झैझगडा गर्ने त कुरै हुँदैन ।’

प्रहरीचौकीमा ८ जनाको दरबन्दी भए पनि ७ जना कार्यरत छन् । मुद्दा नपर्दा प्रहरीलाई पनि सहज छ । तैपनि राति मोटरसाइकलमा गस्ती गर्छन् । ‘ड्युटी गर्न धेरै सहज छ’, एक प्रहरी भन्छन्, ‘गाउँमा मेलमिलाप राम्रो हुँदा हामीलाई पनि फाइदा भएको छ ।’
प्रहरीचौकी स्थापना हुनुअघि यो क्षेत्रमा दैनिकजसो डकैती हुन्थ्यो । नजिकै विहारको मियाँगाउँबाट आएर दिउँसै चरनका चौपाया चोरी गरेर लैजान्थे । घरमा पनि डकैती हुन्थ्यो । ‘प्रहरी बसेपछि चोरी, डकैती र तस्करीको त नामनिसानै छैन,’ स्थानीय लक्ष्मण महतो भन्छन्, ‘गाउँले एकजुट छौं, प्रहरीको साथ पनि छ ।’

स्थानीय चिया कारखानामा कार्यरत कर्मचारी दामोदर गौतम २० वर्षदेखि भद्रपुरबाट यो गाउँमा दैनिक धाउँछन् । उनको अनुभवमा अहिलेसम्म यो गाउँमा कुनै अप्रिय घटना भएको छैन । ‘गाउँमा अनौठो मेलमिलाप छ’, उनी भन्छन्, ‘गाउँलेको अधिकांश समय खेतबारीमै बित्छ ।’

प्रकाशित : कार्तिक २८, २०७६ १०:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×