एक टोल एक उत्पादन कार्यक्रम सुरु

कान्तिपुर संवाददाता

(तेह्रथुम) — गाउँपालिकाभरका किसानलाई उत्पादन र बजारीकरणसँग जोड्न छथर गाउँपालिकाले ‘एक टोल एक उत्पादन’ कार्यक्रम सुरु गरेको छ । गाउँपालिकाभित्रका सबै किसानसम्म पुग्ने गरी सञ्जाल गठन गरेर गाउँपालिकाले कार्यक्रमको सुरुआत गरेको हो ।

त्यसका लागि चालु आवमा खर्च गर्ने गरी ६० लाख रुपैयाँ बजेट नै व्यवस्था गरिएको गाउँपालिकाका प्रवक्ता राजन नेपालीले बताए । प्रत्येक वडाका प्रत्येक टोलमा हावापानी सुहाउँदो कृषिउपज, पशु र पन्छीपालनका लागि विनियोजित बजेट खर्च गरिने गाउँपालिकाले जनाएको छ ।


कार्यक्रम कार्यान्वयनका लागि माटो परीक्षण, पशुपालनका लागि घाँसको परीक्षण र पन्छी र माछापालनका लागि समेत अध्ययन भैरहेको छ । त्यसका लागि विज्ञसहितको टोलीले टोल बस्तीमै पुगेर अध्ययन गरिरहेको प्रवक्ता नेपालीले जनाए । कुन टोल बस्तीमा कुन कृषिउपज उत्पादन हुन्छ भन्ने विज्ञ समूहले पहिचान गरी गाउँपालिकासमक्ष सिफारिस गरेका छन् । पशुपालनमा गाई, भैंसी र बाख्रापालनलाई प्राथमिकतामा राखिएको छ । माछा, मौरी, कुखुरा, हाँस, टर्की, कालिजलगायतका पन्छीपालनका लागि समेत प्राथिमिकतामा राखेर अध्ययन गरिएको गाउँपालिकाका अध्यक्ष सन्तवीर लिम्बूले बताए । अकबरे खुर्सानीलाई गाउँपालिकाको मुख्य मसलाबाली उत्पादनको रूपमा लिइएको छ । कार्यक्रम कार्यान्वयनका लागि गाउँपालिकाकै सक्रियतामा सबै वडा समेटिने गरी १ सय २७ वटा टोल विकास संस्थासमेत गठन गरिएको छ । कार्यक्रम कार्यान्वनको जिम्मा गाउँपालिका मातहत रहेको कृषि र पशु सेवा शाखामार्फत टोल विकास संस्थालाई दिइएको अध्यक्ष लिम्बूले बताए ।


पहिलो वर्ष टोलस्तरमा उत्पादन हुने मुख्य/मुख्य कृषि उत्पादनको प्रवर्द्धनमा समेत किसानलाई सहयोग गरिने गाउँपालिकाले जनाएको छ । ‘कृषि, पशुपालन र पन्छीको उत्पादन र बजारीकरणमा सहयोग गर्न कार्यक्रम लागु गरेका हौं,’ अध्यक्ष लिम्बूले भने ।


स्थानीय सरकारले कृषि क्षेत्रलाई प्राथमिकतामा राखेर आर्थिक, प्राविधिक र बजारीकरणमा समेत सहयोग गरिदिएपछि व्यावसायिक कृषिमा लागेका किसान हौसिएका छन् । ‘बजारको सुनिश्चित र रोजव्याधी समाधानमा सहयोग हुने भएपछि फार्ममा थप लगानी बढाउने तयारी गरिरहेको छु,’ छथर गाउँपालिका १ हमरजुङमा गाई फार्म सञ्चालन गरिरहेका सबिन भट्टराईले भने ।


अन्न उत्पादनमा विशेषगरेर मकै, कोदो, धान, गहुँ, तोरी र फापरलाई प्राथमिकतामा राखिएको छ । तरकारी उत्पादनमा बन्दा, काउली, रायोको साग, मुला, मटरकोसा, टमाटर र आलुलाई प्राथमिकता दिइएको छ । त्यस्तै खुर्सानी, धनिया, अदुवा, अलैंची, अम्लिसो, विभिन्न प्रजातिका रूख उत्पादनसमेतलाई प्राथमिकतामा राखिएको गाउँपालिकाले जनाएको छ । फलफूलमा स्याउ, सुन्तला, अनार, कागती, जुनार छनोटमा परेका छन् ।


प्रकाशित : कार्तिक २०, २०७६ ०९:५७
प्रतिक्रिया
पठाउनुहोस्

प्रतिशोधले पुर्‍यायो कारावास

विनु तिम्सिना

(विराटनगर) — बहुविवाहको मुद्दामा उनी पुर्पक्षका लागि कारागार थिइन् । उमेरले ४० कटेकी तालमुन शाहले गत साउनमा मोरङ जिल्ला कारागारभित्र छोरी जन्माइन् । तालमुनलाई बहुविवाहको मुद्दामा पुर्पक्षका लागि कारागार पठाइएको हो । 

सुनसरी भोक्राहाकी उनी श्रीमान्को छिमेकी अताबुल मियाँकी श्रीमतीसँग प्रेम सम्बन्ध रहेको थाहा पाएर भित्रभित्रै कुण्ठामा थिइन् । माइतीमा आमाबुबा नहुनु, दु:खपीर पर्दा सुनाउन आफन्त पनि नभएकाले रिस उठे पनि उनको जाने ठाउँ थिएन । घरमा भन्दा बाहिर नै धेरै समय बिताउने, आफूलाई बेवास्ता गर्ने श्रीमान्को बानीले उनी आजित थिइन् । १० वर्षकी छोरीको मुख हेरेर रिस खपेर बसेकी उनको जीवनमा प्रतिशोधको ध्येयले नसोचेको स्थिति आइलाग्यो । ‘बूढा अर्कै महिलासँग लागेकाले मलाई रिस उठेको थियो, त्यसैले मैले पनि अर्को बिहे गरें,’ उनी भन्छिन्, ‘झोंकमा चालेको त्यही कदम मेरा लागि आज गलपासो भइदियो ।’

तालमुनजस्तै छटपटी अताबुल मियाँलाई पनि थियो । आफ्नी श्रीमतीको सम्बन्ध तालमुनका श्रीमान्सँग रहेको थाहा पाएर आक्रोशित थिए । उनी श्रीमतीसँग बदला लिने ताकमा थिए । यस्तोमा तालमुन र अताबुलले विवाह गर्ने योजना बनाए । अताबुलले तालमुनलाई भगाएर भारतमा रहेकी आफ्नी दिदीको घर लिएर गए ।

श्रीमान्ले आफ्नै प्रेमीको श्रीमती भगाएपछि अताबुलकी श्रीमती उनीहरूलाई भेट्न उतै पुगिन् । ‘जे भयो भयो अब मिलेर बस्ने’ भन्दै उनले अताबुल र तालमुनलाई फकाएर नेपाल ल्याइन् । आएको केही दिनमै उनले अताबुल र तालमुनविरुद्ध प्रहरीमा बहुविवाहकको उजुरी दर्ता गराइन् । दुवै पक्राउ परे ।

जिल्ला अदालत सुनसरीमा ५० हजार धरौटी तिरेर अताबुल त रिहा भए । तर तालमुनले धरौटी तिर्न नसक्दा गर्भावस्तामै जेल जानुपर्‍यो । पहिलेका श्रीमान् र १० वर्षकी छोरीपछि अब आफ्नो भन्ने उनको अताबुल मात्रै थिए । दोस्रो विवाह गरेपछि पहिलो श्रीमान्ले त बेवास्ता गरे । अताबुलले समेत वास्ता गरेनन् । ‘धरौटीमा छुटाएर लैजान्छु भन्थ्यो,’ उनले भनिन्, ‘८ महिना भयो म यहाँ आएको । भेट्न आएनन्, सम्पर्क नै राख्न छाडे ।’ तालमुनले गत साउनमा कारागारभित्रै छोरी जन्माइन् । उनको मुद्दा अदालतमा विचाराधीन अवस्थामा छ । तालमुनले आफ्नो प्रतिशोधको परिणाम यस्तो आउला भनेर कल्पनासमेत नगरेको बताइन् । धरौटी तिरिदिने आफन्त भएको भए उनले अबोध छोरीसँग जेल जीवन बिताउनु पर्दैनथ्यो । यो सम्झेर उनको मन झन् अमिलो भएर आउँछ ।

श्रीमान्को धोकाका कारण प्रतिशोध साध्न अर्को विवाह गरेकी तालमुन अताबुलको समेत धोकाको सिकार बनिन् । ‘अब धरौटीमा छुट्ने पनि चाहना छैन । छुटेर पनि कहाँ जानू,’ उनी भन्छिन्, ‘अब सजाय पनि लामै होस् । कम्तीमा यहाँ मेरी छोरीले खान त पाएकी छे ।’ नेपालको कानुनले बहुविवाहलाई फौजदारी अपराध मानेको छ । मुलुकी ऐनमा बहुविवाह गर्ने कार्यलाई फौजदारी अपराध मान्दै न्यूनतम एक वर्षदेखि तीन वर्षसम्म कैद सजायको व्यवस्था गरिएको छ । सामान्य लेखपढसमेत गर्न नजान्ने मुस्लिम धर्मावलम्बी तालमुन आफ्नो धर्ममा बहुविवाहलाई सामान्य रूपमा लिइने हुँदा सजायको भागीदार बन्नुपर्ला भनेर कल्पना पनि नगरेको बताउँछिन् ।

जिल्ला प्रहरी कार्यालय मोरङका अनुसार नयाँ मुलुकी संहिता लागू भएपछि बहुविवाहको उजुरीहरू बढ्न थालेको देखिन्छ । आव २०७३/७४ मा १५, २०७४/७५ मा २३ र ०७५/७६ मा ३८ वटा त्यस्ता उजुरी दर्ता भएका छन् । चालु वर्षको असोजसम्ममा १२ वटा बहुविवाहको उजुरी परेका छन् । यी घटनामा धेरैजसो महिलालाई आफूले विवाह गरेको व्यक्ति विवाहित हो भनेर जानकारी नभएको देखिने गरेको डीएसपी घनश्याम श्रेष्ठ बताउँछन् । विभिन्न सामाजिक सञ्जाल साथै छोटो समयमा भएको चिनजानका आधारमा प्रेमविवाह गर्ने र पछि मात्रै विवाहित भएको थाहा पाएका घटना धेरै रहेको उनले बताए ।

प्रकाशित : कार्तिक २०, २०७६ ०९:५६
पूरा पढ्नुहोस्
प्रतिक्रिया
पठाउनुहोस्
×