प्रतिशोधले पुर्‍यायो कारावास

विनु तिम्सिना

(विराटनगर) — बहुविवाहको मुद्दामा उनी पुर्पक्षका लागि कारागार थिइन् । उमेरले ४० कटेकी तालमुन शाहले गत साउनमा मोरङ जिल्ला कारागारभित्र छोरी जन्माइन् । तालमुनलाई बहुविवाहको मुद्दामा पुर्पक्षका लागि कारागार पठाइएको हो । 

सुनसरी भोक्राहाकी उनी श्रीमान्को छिमेकी अताबुल मियाँकी श्रीमतीसँग प्रेम सम्बन्ध रहेको थाहा पाएर भित्रभित्रै कुण्ठामा थिइन् । माइतीमा आमाबुबा नहुनु, दु:खपीर पर्दा सुनाउन आफन्त पनि नभएकाले रिस उठे पनि उनको जाने ठाउँ थिएन । घरमा भन्दा बाहिर नै धेरै समय बिताउने, आफूलाई बेवास्ता गर्ने श्रीमान्को बानीले उनी आजित थिइन् । १० वर्षकी छोरीको मुख हेरेर रिस खपेर बसेकी उनको जीवनमा प्रतिशोधको ध्येयले नसोचेको स्थिति आइलाग्यो । ‘बूढा अर्कै महिलासँग लागेकाले मलाई रिस उठेको थियो, त्यसैले मैले पनि अर्को बिहे गरें,’ उनी भन्छिन्, ‘झोंकमा चालेको त्यही कदम मेरा लागि आज गलपासो भइदियो ।’

तालमुनजस्तै छटपटी अताबुल मियाँलाई पनि थियो । आफ्नी श्रीमतीको सम्बन्ध तालमुनका श्रीमान्सँग रहेको थाहा पाएर आक्रोशित थिए । उनी श्रीमतीसँग बदला लिने ताकमा थिए । यस्तोमा तालमुन र अताबुलले विवाह गर्ने योजना बनाए । अताबुलले तालमुनलाई भगाएर भारतमा रहेकी आफ्नी दिदीको घर लिएर गए ।

श्रीमान्ले आफ्नै प्रेमीको श्रीमती भगाएपछि अताबुलकी श्रीमती उनीहरूलाई भेट्न उतै पुगिन् । ‘जे भयो भयो अब मिलेर बस्ने’ भन्दै उनले अताबुल र तालमुनलाई फकाएर नेपाल ल्याइन् । आएको केही दिनमै उनले अताबुल र तालमुनविरुद्ध प्रहरीमा बहुविवाहकको उजुरी दर्ता गराइन् । दुवै पक्राउ परे ।

जिल्ला अदालत सुनसरीमा ५० हजार धरौटी तिरेर अताबुल त रिहा भए । तर तालमुनले धरौटी तिर्न नसक्दा गर्भावस्तामै जेल जानुपर्‍यो । पहिलेका श्रीमान् र १० वर्षकी छोरीपछि अब आफ्नो भन्ने उनको अताबुल मात्रै थिए । दोस्रो विवाह गरेपछि पहिलो श्रीमान्ले त बेवास्ता गरे । अताबुलले समेत वास्ता गरेनन् । ‘धरौटीमा छुटाएर लैजान्छु भन्थ्यो,’ उनले भनिन्, ‘८ महिना भयो म यहाँ आएको । भेट्न आएनन्, सम्पर्क नै राख्न छाडे ।’ तालमुनले गत साउनमा कारागारभित्रै छोरी जन्माइन् । उनको मुद्दा अदालतमा विचाराधीन अवस्थामा छ । तालमुनले आफ्नो प्रतिशोधको परिणाम यस्तो आउला भनेर कल्पनासमेत नगरेको बताइन् । धरौटी तिरिदिने आफन्त भएको भए उनले अबोध छोरीसँग जेल जीवन बिताउनु पर्दैनथ्यो । यो सम्झेर उनको मन झन् अमिलो भएर आउँछ ।

श्रीमान्को धोकाका कारण प्रतिशोध साध्न अर्को विवाह गरेकी तालमुन अताबुलको समेत धोकाको सिकार बनिन् । ‘अब धरौटीमा छुट्ने पनि चाहना छैन । छुटेर पनि कहाँ जानू,’ उनी भन्छिन्, ‘अब सजाय पनि लामै होस् । कम्तीमा यहाँ मेरी छोरीले खान त पाएकी छे ।’ नेपालको कानुनले बहुविवाहलाई फौजदारी अपराध मानेको छ । मुलुकी ऐनमा बहुविवाह गर्ने कार्यलाई फौजदारी अपराध मान्दै न्यूनतम एक वर्षदेखि तीन वर्षसम्म कैद सजायको व्यवस्था गरिएको छ । सामान्य लेखपढसमेत गर्न नजान्ने मुस्लिम धर्मावलम्बी तालमुन आफ्नो धर्ममा बहुविवाहलाई सामान्य रूपमा लिइने हुँदा सजायको भागीदार बन्नुपर्ला भनेर कल्पना पनि नगरेको बताउँछिन् ।

जिल्ला प्रहरी कार्यालय मोरङका अनुसार नयाँ मुलुकी संहिता लागू भएपछि बहुविवाहको उजुरीहरू बढ्न थालेको देखिन्छ । आव २०७३/७४ मा १५, २०७४/७५ मा २३ र ०७५/७६ मा ३८ वटा त्यस्ता उजुरी दर्ता भएका छन् । चालु वर्षको असोजसम्ममा १२ वटा बहुविवाहको उजुरी परेका छन् । यी घटनामा धेरैजसो महिलालाई आफूले विवाह गरेको व्यक्ति विवाहित हो भनेर जानकारी नभएको देखिने गरेको डीएसपी घनश्याम श्रेष्ठ बताउँछन् । विभिन्न सामाजिक सञ्जाल साथै छोटो समयमा भएको चिनजानका आधारमा प्रेमविवाह गर्ने र पछि मात्रै विवाहित भएको थाहा पाएका घटना धेरै रहेको उनले बताए ।

प्रकाशित : कार्तिक २०, २०७६ ०९:५६
प्रतिक्रिया
पठाउनुहोस्

विमानस्थल स्तरोन्नति गरिँदै

नेपाल नागरिक उड्डयन प्राधिकरणले उडान अवरुद्ध नहुने गरि स्तरोन्नति गरिरहेको छ 
कान्तिपुर संवाददाता

(ताप्लेजुङ) — सुकेटार विमानस्थल स्तरोन्नतिका क्रममा उडान अवरुद्ध नहुने भएको छ । नेपाल नागरिक उड्डयन प्राधिकरणले उडान अवरुद्ध नहुने गरी स्तरोन्नति गरिरहेको जनाएको छ ।

प्राधिकरणका सुकेटार विमानस्थल प्रमुख रूपेश मुरारकाका अनुसार ढिस्को आधा फुटाउँदा धावनमार्गमा ढुंगा माटो झर्न दिइएको छैन । ‘पहिलोपटक विमानस्थलको काम गरेकाले सुरुमा केही समस्या देखियो,’ मुरारकाले भने, ‘पाँच घण्टा काम रोकेर विमानस्थललाई असर नपर्ने गरीको योजना बनाएर कामको बाटो लगायौं, अब समस्या हुँदैन ।’

८ करोड ९९ लाख ५० हजारमा कामको जिम्मा लिएको कृष्ण बंगलामुखी जेभी कन्ट्रक्सनले विमानस्थलको पूर्वपट्टिको ढिस्को फुटाउने, धावनमार्गको ५० मिटर कालोपत्रेको भाग भत्काएर ग्रेड मिलाउने र थप १ सय ५० मिटर धावनमार्ग कालोपत्रे गर्ने जिम्मेवारीमा उल्लेख छ । यसबाहेक यात्रु प्रतीक्षालय, प्रवेशमार्ग निर्माण, सुरक्षा जाँच कक्ष व्यवस्थापनलगायत काम छन् । अहिले विमानस्थलको धानवमार्ग ७ सय मिटर लम्बाइ कालोपत्रे छ । चौडाइ २० मिटरको छ । स्तरोन्नतिपछि नौ सय मिटर हुनेछ । थप विस्तारपछि जहाज विमानस्थलको उत्तर र दक्षिण दुवैतर्फबाट उडान तथा अवतरण गर्न सकिने विश्वास प्राधिकरणको छ । अहिले दक्षिण दिसाबाट मात्रै अवतरण हुँदै आएको छ । भित्ताको ढिस्कनुमा ठोकिने त्रासका कारण उत्तरबाट मात्रै राखिएको हो । विमानस्थल निर्माणपछि भने परीक्षण उडानमा दुवैतर्फवाट अवतरण गरिएको थियो ।

यो विमानस्थलमा नेपाल वायु सेवा निगमले सातामा तीन दिन सोमबार, बुधबार र शनिबार काठमाडौं–ताप्लेजुङ उडान गर्दै आएको छ । निगमको अलावा समिट, तारा, गोमा एयरले उडान गरेका छन । तर निजी विमान कम्पनीले भने नियमित उडान गरेका छैनन् ।

आधामा ठेक्का
विमानस्थल स्तरोन्नतिका लागि नागरिक उड्डयन प्राधिकरणले १६ करोड विनियोजन गरेपनि आधामा ठेक्का लागेको छ । दुई वर्षमा सक्ने गरी खुलाइएको ठेक्कामा खड्का कृष्णबंगलामुखी जेभी कन्स्ट्रक्सनले ८ करोड ९९ लाख ५० हजार ३ सय ४९ रुपैयाँमा ठेक्का पारेको प्राधिकरणका इन्जिनियर पुष्पराज न्यौपाने जनाए । यो बजेटबाट पूर्वतर्फको ढिस्को भत्काउने, १५० मिटर कालोपत्रे गर्नेलगायतका काम गर्नुपर्छ ।

प्रकाशित : कार्तिक २०, २०७६ ०९:५३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×