ज्येष्ठ नागरिक भन्छन्– छुटको साटो गाली

विनु तिम्सिना

(विराटनगर) — मोरङको सुन्दर हरैंचा–८ का ७९ वर्षीय नारायणप्रसाद चुँडालले दुई वर्ष अघि मात्रै जेष्ठ नागरिक परिचयपत्र लिएका छन् । ६० वर्ष उमेर पुगेका ज्येष्ठ नागरिकलाई राज्यले यातायात सेवा र स्वास्थ्य उपचारमा ५० प्रतिशत छुटको व्यवस्था गर्दै परिचयपत्र दिने गरेको छ । 


चुँडालले ७९ वर्ष पुगेपछि ढिलै भए पनि सुविधा पाउने आसमा दुई वर्षअघि परिचयपत्र बनाएका हुन् । तर परिचयपत्रका आधारमा राज्यले व्यवस्था गरेको कुनैपनि प्रकारको सुविधा उनले अहिलेसम्म नपाएको गुनासो गरे ।

परिचयपत्रका आधारमा छुट दिनुको साटो यातायात व्यवसायीले उल्टै दुर्व्यवहार र अपशब्द प्रयोग गर्दै गाली गलौज गर्न थालेपछि परिचयपत्र नै बोक्न छाडेको उनले बताए । जेष्ठ नागरिक चुँडालले यातायात व्यवसायीले प्रदेश–१ मा सगरमाथा यातायातबाहेक अरुले छुट दिनु पर्दैन भन्दै गाली गलौज गर्ने गरेको गुनासो गरे । ‘गाडीमा छुट पाइन्छ भनेर परिचय पत्र बनाको तर खै परिचय पत्र देखाउँदा उल्टै गाली खानुपर्छ,’ उनले भने, ‘बुढाबुढी देख्यो भने गाडी नै रोक्दैनन् त्यहिभएर मैले त परिचय पत्र नै बोक्न छाडिदिए ।’

त्यस्तै विराटनगर महानगरपालिका– ३ का ६४ वर्षिय जिवेन्द्र घिमिरे केहि समय अघि खोटाङजान भनेर बस चढे । सवारी सहचालकले भाडा मागेपछि उनले आफुसंग भएको जेष्ठ नागरिक परिचय पत्र देखाएर ५० प्रतिशत छुट मागे । सहचालकले छुट दिनुको साटो आफुमाथि दुर्व्यवहार गरेको उनले बताए । जेष्ठ नागरिक हातेमालो सेवा समाज विराटनगर–३ का अध्यक्षसमेत रहेका उनले यस विषयमा प्रदेश–१ सामाजिक विकास मन्त्रालयमा सोमबार गुनासो गरे । ‘यातायात मात्रै नभएर स्वास्थ्य क्षेत्रमा पनि छुटको व्यवस्था लागु भएको छैन,’ उनले भने, ‘प्रदेशको राजधानी विराटनगरमा त यो अवस्था छ झन् दुरदराजमा कस्तो होला ?’ ट्राफिक प्रहरी कार्यालय प्रदेश– १ इटहरीका प्रमुख भीम दाहालले सार्वजनिक सवारीमा जेष्ठ नागरिकलाई दुर्व्यवहार भएको गुनासो बढेको जानकारी दिए । असोज महिनामा मात्रै ५ वटा गुनासो आएको उनले बताए । ‘सार्वजनिक बसमा दुर्व्यवहार भयो भनेर धेरै जेष्ठ नागरिकको गुनासो आइरहन्छ,’ उनले भने, ‘जेष्ठ नागरिक, अपांगता भएका र महिलाहरूकालाई छुट दिने व्यवस्था राज्यले बनाएको हो यसको कार्यान्वयन गराउन हामी लागिपरेका छौं ।’

यातायात महासंघ सुनसरीका अध्यक्ष ध्रुवराज घिमिरेले सरकारले आफुहरूसँग भने ढाडसेकिने गरी कर लिने तर आफुहरूले भने छुट दिनु पर्ने भन्दै आक्रोस व्यक्त गरे । सरकारले यातायात व्यवसायीको संगठन भताभुंग पार्दै अरबौंको सम्पत्ति हडपेको र आफुहरूलाई भने जबरजस्ती विभिन्न छुट दिन बाध्य बनाएको उनले बताए । ‘राज्यले हाम्रो सर्वस्व लुटने अनी हामलिे चाहि छुट दिनु पर्ने ?’ घिमिरेले प्रश्न गरे,‘ हामिलाई पनि विभिन्न करमा छुटको व्यवस्था गर्नु पर्छ ।’

ज्येष्ठ नागरिक हातेमालो सेवा समाजको गुनासो आएपछि मंगलबार सामाजिक विकास मन्त्रायले यातायात क्षेत्रमा सम्बद्ध सबै सरोकारवाला निकायका प्रतिनिधिलाई बोलाएर छलफल गरेको थियो । छलफलका क्रममा बोल्दै सामाजिक विकास मन्त्री जिवन घिमिरेले सवारी चालक र सहचालकले आफनो बोल्ने शैली र व्यवहारमा शिष्टता ल्याउनुपर्ने बताए । यसकालागि यातायात व्यावसायीले पनि ध्यान दिन उनले आग्रह गरे । राज्यले व्यवस्था गरेको छुट नदिनुको कुनै विकल्प नभएको बताउँदै उनले व्यवसायीका केहि समस्या भए त्यसको समाधानका लागि केन्द्रसँग समन्वय गर्ने प्रतिबद्धता व्यक्त गरे ।

प्रकाशित : आश्विन २९, २०७६ १०:०६
ADVERTISEMENT
प्रतिक्रिया
पठाउनुहोस्

गौरवका आयोजनासँगै पुल अलपत्र

सगरमाथा लोकमार्गको फोक्सिङटारस्थित सुनकोसीको पुल गत चैतमा सम्पन्न हुनुपर्नेमा हालसम्म आधा मात्रै काम भएको छ
डम्बरसिं राई

(खोटाङ) — सगरमाथा लोकमार्गको फोक्सिङटारस्थित सुनकोसी पुल एक वर्षअघि नै बनिसक्नुपर्ने हो । गौरी पार्वती कन्ट्रक्सनले २०७१ चैतमा चार वर्षभित्र सक्ने गरी करिब १८ करोड लागतमा ठेक्का सकारेको थियो । तर अहिलेसम्म ६० प्रतिशतभन्दा काम हुन सकेको छैन । 

पुलको डिजाइन स्वीकृतिमै समय लागेकाले ढिलो भएको कन्स्ट्रक्सनका अध्यक्ष रामकुमार थापाले बताए । ‘नदेखिने तर महत्वपूर्ण काम सकिएको छ,’ उनले भने, ‘अब आगामी असारसम्म सक्छौं ।’

तोकिएको अवधिमा काम नसकिएर अल्झिएका पुल जिल्लामा अरू पनि थुप्रै छन् । राष्ट्रिय गौरवको आयोजनामा परेका पुलकै प्रगति सन्तोषजनक छैन । आगामी असारमा पूरा हुनुपर्ने उदयपुर र खोटाङ जोड्न धाप्लाङघाटमा निर्माणाधीन पुलमा १३ प्रतिशत मात्र काम भएको छ । करिब २२ करोडको पुलको म्याद २०७७ माघसम्म थप्न पहल भइरहेको स्वच्छन्द निर्माण सेवाका जयराम लामिछानेले बताए ।

मध्यपहाडी सडकको बाझेच्यानडाडाँ–दिक्तेल खण्डमा पर्ने आठ पुलमध्ये चारवटा अलपत्र छन् । भालुखोला, छेपेखोला, मेवाखोला पुलको टेन्डर प्रक्रिया नै बढाइएको छैन । पङुखोलामा टेन्डर भए पनि काम अलपत्र छ । ठेक्का लिएको सिरुवा कन्स्ट्रक्सन ठेक्का लिएपछि बेपत्ता भएको छ । करिब दुई करोड २९ लाख लागतको पुलको काम ४० प्रतिशत मात्र सकिएको मध्यपहाडी डिभिजन प्रमुख विजय चापागाईंले सुनाए ।

यद्यपि आगामी असारभित्र काम सक्ने पहल थालिएको उनले बताए । कालिखोला, साप्सुखोला, लप्सेखोला, दाम्देखोला पुल भने बनिसकेका छन् । यिनको ठेक्का रमण गोल्डेन गुड जेबी कम्पनीले लिएको थियो ।

यही खण्डको भुल्के खोला पुल पनि अलपत्र छ । यहाँको पर्यटकीय र धार्मिक सम्भावनामा असर नपुग्ने गरी बनाउनुपर्ने भएकाले डिजाइन नै भर्खर मात्र सकिएको डिभिजन प्रमुख चापागाईँले सुनाए । उक्त पुलको ठेक्का सगरमाथा घिमिरे निर्माण सेवाले लिएको हो । साकेला गाउँपालिका र दिप्रुङ चुइचुम्मा गाउँपालिकाको बीचमा पर्ने तावाखोलास्थित सडक पुलमा पूर्वाधार विकास विभागको करिब साडे चार करोड लगानी छ । २०७५ वैशाख २१ गते १८ महिनामा सक्ने गरी नेसनल महावीर सिद्धिसाई जेबी कम्पनीलाई ठेक्का दिइएकोमा पूरा हुने अवस्था देखिँदैन । यसबारे सम्वन्धित पक्षको ध्यानाकर्षण गराउँदा समेत अटेरी गरेको साकेला गाउँपालिका अध्यक्ष अर्जुनकुमार खडकाले सुनाए । अब ठेक्का लिने कम्पनीलाई कारबाही प्रक्रियाका लागि सरकारलाई अनुरोध गर्ने उनले बताए ।

पुल निर्माणको पेटी ठेक्का लिएका खोटाङका निर्माण व्यवसायी कर्ण खत्रीले बेलैमा संझौता नहुदा काममा ढिलाई भएको दाबी गरेका छन । पुल नहुँदा जिल्लामा हुने विकास निर्माणका लागि तराईबाट सामग्री ल्याउन समस्या भएको खोटाङ उद्योग वाणिज्य संघका पूर्व अध्यक्ष राजु लयालुले बताए । ठेक्का लिएर योजना अलपत्र छाडिएकाले त्यसले पारेको असरसहित घाटा असुलउपर गर्नुपर्ने उनको भनाइ छ । सडक पुलकै कारण जिल्लाको विकासमा असर परेकाले ठेक्का लिएर काम नगर्नेहरूलाई कारबाही गर्नुपर्ने प्रतिनिधिसभा सदस्य विशाल भट्टराईले बताए ।

प्रकाशित : आश्विन २९, २०७६ १०:०५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×