सामूहिक बलात्कारमा परेपछि संगिनी सुई !

कान्तिपुर संवाददाता

सुस्त मनस्थितिको भएकाले उनी पटकपटक बलात्कारको सिकार बनेकी छन् । कमजोर अवस्थाको परिवारले केही गर्न सक्दैन । पटकपटकको घटनाबाट आजित बनेका परिवारले उनलाई गर्भनिरोधक संगिनी सुई लगाइदिने गरेका छन् ।


कथा धरानकी २२ वर्षीया युवतीको हो । पछिल्लो पटक उनी दुई दिनअघि इटहरीमा बसभित्रै सामूहिक बलात्कृत भइन् । धरानबाट मोरङको बेलबारी जाने क्रममा गत सोमबार राति उक्त घटना भयो । पीडित युवती सुस्त मनस्थितिकी छन् । यही कारण उनी पटकपटक बलात्कारमा परिरहन्छिन् ।


साँझ ६ बजे धरानबाट विराटनगरका लागि को १ ख ४६२७ नम्बरको खाम्दाके यातायात बस छुटेको थियो । बेलबारी जानुपर्ने भएकाले इटहरीमा ओर्लने क्रममा बसका स्टाफले अर्को बसमा चढाइदिने बताए । युवती विश्वासमा परिन् र सिटमा चुपचाप बसिन् । तर स्टाफले अर्को बसमा चढाउनु साटो इटहरी १० स्थित साथी पेट्रोल पम्पनजिकै बसभित्र युवतीमाथि सामूहिक बलात्कार गरे ।

घटनाबारे स्थानीयले प्रहरीलाई खबर गरेका थिए । घटनामा संलग्न ६ जनालाई तत्काल प्रहरीले पक्राउ गरेको थियो । पक्राउ पर्नेहरूमा मोरङ सुन्दरहरैचा १२ का ३३ वर्षीय विकास कसाई, झापा सुरुङ्गाका २२ वर्षीय सुरज थापा, सिरहा लहान ४ का २६ वर्षीय सुरेन्द्र भुजेल र मोरङ बेलाबार ७ का अशिष कार्की छन् । २५ वर्षीय सुमन मग्राती र मोरङ बेलबारीका २५ वर्षीय नितेश घिमिरे भने फरार रहेको प्रहरीले जानकारी दिएको छ ।


प्रहरीले युवतीको उद्धार गर्दा करिब पौने १० बजेको थियो । गन्तव्यमा उत्रन नदिई युवतीमाथि सामूहिक बलात्कार भएको प्रारम्भिक अनुसन्धानबाट बुझिएको इलाका प्रहरी कार्यालय धरानका डीएसपी धर्मराज भण्डारीले बताए । पीडितको स्वास्थ्य अवस्था सामान्य छ । हाल उनलाई पुनःस्थापना केन्द्रमा राखिएको छ । पक्राउ परेकालाई फौजदारी संहिताअनुसार बलात्कार कसुरमा मुद्दा दर्ता गराएर अनुसन्धान भइरहेको प्रहरीले जनाएको छ । पीडित यसअघि पनि पटकपटक बलात्कारको सिकार भएको बुझिएको छ ।

सुकुम्बासी बस्तीभित्र सानो टिनको घरमा युवती र उनकी आमा मात्र बस्दै आएका छन् । केही वर्षअघि बाबुको मृत्यु भएको थियो । दाजुभाउजू रोजगारीका क्रममा धरान बाहिर छन् । उनकी आमा एक निजी विद्यालयमा सहयोगीका रुपमा काम गर्छिन् । परिवारको रेखदेख गर्ने कोही छैन । घरदेखि बाहिर जथाभावी हिँड्ने गरेका कारण उनी पटकपटक बलात्कारको सिकार बनेकी हुन् । राम्रोसँग रेखदेख गर्न नसकिएका कारण परिवारले उनलाई संगिनी सुईको प्रयोग गरिदिने गरेको छ । राजनीतिक पहुँचका आधारमा पीडिकहरू उम्कने गरेको महिला सञ्जाल धरानकी सचिव कोपीला भट्टराईले बताइन्. ।

‘पीडकको विषयमाथि बोल्दा नेताहरूले संरक्षण गर्ने गरेका छन्,’ उनले भनिन्, ‘महिला अधिकारकर्मीलाई बोल्न डराउनुपर्ने अवस्था छ ।’ महिलाहरू हरेक ठाउँमा असुरक्षित हुनुपरेको उनको भनाइ छ ।नेपालमा कानुन किताबमा मात्र सीमित रहेको अधिवक्ता सबिता राई बताउँछिन् । ‘पीडकको सोचमा पनि परिवर्तन आएको छैन,’ उनले भनिन्, ‘कानुन कार्यान्वयन हुन सकेको छैन ।’

बढे बलात्कारका घटना
असोज ४ गते मोरङको ग्रामथान गाउँपालिकामा १७ वर्षीया किशोरी सामूहिक बलात्कारमा परिन् । बलात्कार आरोपमा प्रहरीले चार जनालाई पक्राउ गरेर अनुसन्धान गरिरहेको छ । ग्रामथान–५ का २० वर्षीय सुरेश थानदार, २५ वर्षीय कमल पुरी, २२ वर्षीय प्रकाशकुमार थारु र बेलबारी ५ का २२ वर्षीय सन्तोषकुमार माझी पक्राउ परेका हुन् । मोरङ सुन्दरहरैचाकी ती किशोरीलाई उनीहरूले राति ९ बजे केराबारीमा लगेर सामूहिक बलात्कार गरेको प्रहरीले जानकारी दिएको छ । पीडित परिवारले राति १ बजे इलाका प्रहरी हरैंचामा जानकारी गराएपछि प्रहरीले चारै जनालाई समातेको हो ।


भदौमा १५ वर्षीया किशोरीलाई सार्वजनिक बसभित्र बन्दी बनाएर सामूहिक बलात्कार प्रयास भयो । धनकुटा घर भएकी उनी मोरङको बेलबारीमा आफन्तकहाँ बस्दै आएकी थिइन् । बेलबारीबाट उनलाई फकाएर बसमा चढाई रंगेली ९ स्थित दोहमनाहाट चोक लगेर बसभित्रै बलात्कार प्रयास गरिएको थियो । किशोरीले प्रतिकार गर्दै चिच्याएपछि स्थानीयले प्रहरीलाई खबर गरेका थिए ।

न्यू सुनकोसी सुपर नामको ना६ख ९३४४ नम्बर बसका चालक मोरङ रंगेली नगरपालिका ३ का ३७ वर्षीय किरण खड्का र सहचालक उर्लाबारी नगरपालिका ४ का १६ वर्षीय एक किशोरलाई इलाका प्रहरी रंगेलीले भदौ २२ गते पक्राउ गरेको हो । पक्राउ परेका चालक किरण खड्का अदालतको आदेशबाट पुर्पक्षका लगि थुना छन् । १६ वर्षीय किशोरलाई भने तारेखमा छाडिएको एसपी अधिकारीले जनाए ।

प्रकाशित : आश्विन १७, २०७६ ११:२६
प्रतिक्रिया
पठाउनुहोस्
ADVERTISEMENT
ADVERTISEMENT

अहिंसाको बाटोमा सत्याकृत

संगीतलाई शक्तिको एक किरण मान्ने सत्याकृत ब्यान्डले अध्यात्मलाई मूल शक्तिको बाटो मान्छ । यस ब्यान्डले दसैंअघि सार्वजनिक गरेको गीत ॅएन्टी बलि...’ चर्चित बनेको छ ।
सुशील पौडेल

 फूलपातीका दिन शनिबार हिन्दु धर्मावलम्बीका घर–घरमा फूलपाती भित्र्याइँदै छ  । यसै दिन गोरखा दरबारबाट बाजागाजासहित ल्याइएको फूलपातीलाई हर्षबढाइँका साथ हनुमानढोकामा भित्र्याएपछि दसैंको खास रौनक सुरु हुन्छ  ।

फूलपातीपछि पशु बलि पनि सुरु हुन्छ । पछिल्लो समय धर्मका आडमा दिइने पशु बलिको विरोध बढ्दै गइरहेको छ । सांगीतिक ब्यान्ड सत्याकृतले पनि दसैंको मुखमा नयाँ गीत ‘एन्टी बलि...’ ल्याएको छ ।
श्री हजुरको रचनामा सत्याकृतले नै संगीत भरेको उक्त गीतलाई सूर साधु र प्रजित लामाले गाएका हुन् । गीतले मठ मन्दिरमा भावको फूल चढाएर पशु बलि हटाउन अनुरोध गरेको छ । गीतले भन्छ,
काम, क्रोध, लोभ, मोह, अहंकार हुन् पञ्च बलि
नमारौं न निर्दोष पशु आफ्नै आत्मा छली
दिव्य जन्म मानव चोला बुझौं है सबैले
हटाऔं हटाऔं बलि हटाऔं
खासगरी आध्यात्मिक शैलीका गीत निकाल्दै आएको सत्याकृत झन्डै चार वर्षअघि विजय गौतमलगायतको पहलमा स्थापना भएको थियो । ब्यान्डमा आधा दर्जन पूर्णकालीन सदस्यसहित थुप्रै स्वतन्त्र संगीतकर्मी आबद्ध छन् । गैरव्यावसायिक ब्यान्डका रूपमा चलिरहेको सत्याकृतमा अन्य काम गरेर फुर्सदको समय संगीतकर्ममा लाग्नेहरू आबद्ध छन् । प्रायः सदस्यहरू गीतमा व्यक्तिगत पहिचान खुलाउन लुकाउँदैनन् ।
रचनाकारका रूपमा राखिएको श्री हजुरलाई पनि ब्यान्डले एउटा शक्तिका रूपमा व्याख्या गर्छ । सत्याकृतका संस्थापक, व्यवस्थापक विजय गौतमले यसो गर्नुमा कुनै व्यक्तिको परिचयमा अल्झिने भन्दा पनि भाव बुझियोस् भन्ने चाह रहेको बताए । सत्याकृत गीत, संगीत क्षेत्रमा केही पृथक् पहिचान बोकेको ब्यान्डभन्दा फरक पर्दैन । यसका सदस्यहरू झट्ट हेर्दै साधुसन्त लाग्छन् । लवाई, खवाई मात्र नभई विचार पनि आध्यात्मिक छन् । जसको प्रतिबिम्ब गीतहरूमा देखिन्छ ।
‘सनातन धर्मलाई सम्मान गर्छौं । प्रत्येकको गुरु, सम्प्रदाय, आस्थालाई पनि उत्तिकै सम्मान गर्छौं,’ गौतमले भने, ‘जुनसुकै भावले ईश्वरलाई मानौं, प्रत्येकभित्रको सकारात्मक चीज बाहिर निस्किनुपर्छ । यही धर्तीबाट अमृत पनि निस्कन्छ र विष पनि । मानवभित्र पनि राम्रा, नराम्रा दुवै कुरा छन् । आफूभित्र भएका राम्रा कुरा निकाल्ने र नराम्रा कुरा चिन्ने अनि त्यसलाई फ्याँक्ने प्रयत्न हो । हाम्रो समाजमा आफ्नो भित्री कुरा भुलेर वा नचिनेर बाहिरी देखावटको जिन्दगी बाँचिरहेको छ ।’
२०७४ मा आयोजित हिट्स एफएम म्युजिक अवार्डमा गणेश भजनले उत्कृष्ट गीतको अवार्ड जितेपछि सत्याकृत सांगीतिक क्षेत्रमा बढी चिनिएको हो । संगीतलाई शक्तिको एक किरण मान्ने यस ब्यान्डले अध्यात्मलाई मूल शक्तिको बाटो मान्छ ।
संगीतमार्फत शान्ति फैलाउने बाटोमा अग्रसर सत्याकृतका संस्थापक गौतमले थपे, ‘हाम्रा शब्द, भाव यसै पोख्नभन्दा संगीतमार्फत व्यक्त गर्दा प्रभावकारी हुन्छ । अध्यात्मिक प्रवचन सुन्न साधारणतया कोही तयार छैनन् । तर शान्ति सबैलाई चाहिएको छ । सत्याकृतले संगीतमार्फत शान्ति दिन खोजिरहेको मात्रै हो ।’ उनले शान्ति प्राप्ति आफ्नै हातमा हुने बताउँदै दृष्टिकोण बदलेर सकारात्मक सोच ल्याउन सके पनि शान्ति मिल्ने तर्क गर्छन् ।
ललितकला क्याम्पसमा संगीतमा बीएफए पढ्दै गर्दा विदुर न्यौपाने सत्याकृतमा गायक, किबोडिस्टका रूपमा आबद्ध भए । लामो कपाल र दाह्री पालेका न्यौपाने संगीत र आध्यात्मलाई एकअर्काका परिपूरक मान्छन् । उनी दुवैबाट आनन्द मिल्ने बताउँछन् । सत्याकृतबाट संगीत र आध्यात्म दुवै पाएकोमा उनी झन् सन्तुष्ट रहेछन् । ब्यान्डमा अमेरिकादेखि भारतसम्मका संगीतकर्मीले काम गरिसकेका छन् । गौतम सत्याकृतलाई एउटा सांगीतिक प्लेटफर्मका रूपमा विकास गर्न चाहन्छन् । भन्छन्, ‘यो खुला प्लेटफर्म त हो । तर यसका आफ्नै परिधि पनि छन् । जससँग ब्यान्डको भाइब्स मिल्छ, ऊ आबद्ध हुन सक्छ ।’
कुनै पनि कुराको अन्तिम सत्य रूप नै सत्याकृत हो । सनातन धर्म मान्ने यस ब्यान्डका सदस्यले गीतमा पनि धर्म, जीवन, दर्शन सबै पक्ष समेटेर गाउन रुचाउँछन् । ‘रूखलाई बाँच्नका लागि हरेक कुरा चाहिन्छ । फल दिन्छ तर त्यो रूख आफैंले खाँदैन । प्रकृतिमा सबैले एक–अर्काको सेवा गरिरहेको छ भने हामी मानव अरूको सेवा गर्ने बुद्ध पुरुष हुन सकिरहेका छैनौं,’ गौतमले जिकिर गरे, ‘हामी कर्म गर्दै कोसिस गरिरहेका छौं । यस्तै भाव भएकाहरूलाई सत्याकृत सांगीतिक प्लेटफर्म हो । तर संगीतको सौख भएर मात्रै हामी यहाँ राख्दैनौं । पहिले ब्यान्डको भाइब्ससँग मिल्नुपर्‍यो । फिल गर्न सक्नुपर्‍यो ।’
सुन्दा बढी नै आध्यात्मिक लागे पनि सत्याकृतले प्रेम, जीवन र जगत्का गीत पनि गाएको छ । लोकदेखि पप, आधुनिक, क्लासिकल र फ्युजन गीतहरू निकाल्दै आएको छ । गौतमले आफूहरू प्रेम, विवाहको विरुद्धमा नभएको र नेपालमा अलगखाले विधाका गीत पनि आओस् भन्ने चाहना राखेर नै काम गरिरहेको बताउँछन् । सत्याकृतकै गीत ‘तिम्रै भक्तिको चन्दन लगाई...’ को हिन्दी भर्सनमा भारतीय गायक कैलाश खेरले समेत गाएका छन् ।
‘एन्टी बलि...’ दसैंको मुखमा ल्याउनुको आशय दसैंमा गरिने क्रियाकलाप र मनाउने ढंगको विरोध गरेको मात्रै नभई वर्षैभरि विभिन्न बहानामा विश्वभर शक्तिपीठ, कुल पूजामा दिइने बलिको विरोध रहेको ब्यान्ड बताउँछ । गीतले पनि धर्मको नाममा गरिने पशु हत्या (बलि) लाई रोक्न अनुरोध गरेको छ ।
आफूलाई १७ वर्षको उमेरमै बुद्धत्वको खोजीमा हिँडेको बताउने गौतम सात्विक आहारले शान्त स्वभावतर्फ लैजाने बताउँछन् । भन्छन्, ‘तामसिक आहारले विकृत खालको शक्तितर्फ लैजान्छ । हामीले मांसहारी नहुनु भनेका हैनौं र हुनु पनि भनेका छैनौं । सकेसम्म त प्राणीको हत्या नगरेकै राम्रो हो । मांसहार मानव शरीर अनुकूल पनि छैन । गीतमार्फत हामीले यो अनुरोध मात्रै गरेका हौं । एन्टी बलि अहिंसा प्रदायक गीत हो ।’ उनले आफ्ना गीत सुनेरै, हेरेरै पनि शाकाहारी बनेका केही उदाहरण सुनाए ।

sushilapaudel2@gmail.com

प्रकाशित : आश्विन १७, २०७६ ११:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT