पशु स्वास्थ्यमा औषधि अभाव

नगरपालिकाले शाखामा भएका प्राविधिक कर्मचारीलाई उपेक्षा गरी कुनै कार्यक्रम नै नदिएको कर्मचारीको गुनासो छ । केन्द्रबाट प्राप्त बजेट समेत नगरपालिकाले स्वीकृत नगरिदिँदा गत दुई महिनादेखि केन्द्रमा कुनै पनि औषधि किन्न नपाएको पशु स्वास्थ्य प्राविधिक देवनारायण श्रेष्ठले बताए ।

नगरपालिकाले कार्यक्रम सहितको बजेट समयमा स्वीकृत नगरिदिँदा पशुवस्तुमा लाग्ने आन्तरिक तथा बाह्य परजीवी नियन्यत्रणका कुनै पनि औषधि खरिद गर्न नपाएको केन्द्रका कर्मचारीको भनाइ छ । संघीयता कार्यान्वयनमा आउनुअघि किसानलाई नि:शुल्क वितरण गरिँदै आएका जुम्रा, उपियाँ, नाम्ले, जुका लगायतका कुनै पनि औषधि गत साउनयता शाखामा छैन ।

शाखाले किसानलाई नि:शुल्क वितरण गर्दै आएको घाउ खटिरा, चोट पटक लाग्दा सिलाउने धागो, लट्ठ्याउने सुई, दुखाइ कम गर्ने औषधि, ज्वरो, निमोनिया, झाडापखालाको औषधि छैन । गाई, भैंसी तथा भेडा बाख्रा ब्याउन नसकेमा लगाईदिने सुई समेत शाखामा नहुँदा किसानले स्थानीय सरकार माताहत रहेको पशु सेवा शाखाबाट कुनै पनि सेवा सुविधा पाउन नसकेका हुन् ।

केन्द्रमा रहेका दुई जना कर्मचारीले पशुबस्तुको उपचार गर्दा नभइनहुने सामान्य मेसिनरी औजार तथा उपकरण समेत नभएको केन्द्रका पशु स्वास्थ्य प्राविधिक श्रेष्ठले बताए ।