४२ वर्ष मुद्दा लडेपछि बल्ल धनीपुर्जा

२०३४ सालमा सुरु भएको मुद्दा सर्वोच्च अदालतसम्म पुगेको थियो । एकै जग्गामा ५ जनाले पटकपटक मुद्दा चलाएका थिए भने ७ वटा फैसला भएको छ ।
आनन्द गौतम

ताप्लेजुङ — फुङलिङ नगरपालिका ४ की ९३ वर्षीया धनकुमारी भट्टराईले ४२ वर्षपछि न्याय पाएको अनुभव गरिन्  । सदरमुकाम फुङलिङको प्रवेशद्वारका रूपमा रहेको तोक्मेडाँडा क्षेत्रको ६ रोपनी १४ आना जग्गाको धनीपुर्जा उनले हालै मात्र पाइन्  ।

कित्ता नम्बर ६३ देखि ७७ सम्म १५ वटा कित्ता रहेको जग्गाको धनीपुर्जा जिल्ला मालपोत कार्यालयले प्रदान गरेको हो । २०३४ सालमा सुरु भएको मुद्दा सर्वोच्च अदालतसम्म पुगेको थियो । एकै जग्गामा ५ जनाले पटकपटक मुद्दा चलाएका थिए भने ७ वटा फैसला भएको छ ।


पहिलो पटक सर्नबहादुर मादेनले जग्गा आफ्नो भएको दाबी गर्दै जिल्ला अदालतमा रिट निवेदन दिएका थिए । तत्कालीन कानुनमन्त्री विष्णु मादेनका पितासमेत रहेका सर्नबहादुरले धनकुमारीका श्रीमान् दामोदर भट्टराईलाई मुद्दा लगाएका हुन् ।


२०३८ जेठ १४ गते जिल्ला अदालतले मुद्दाको पहिलो फैसला गरेको थियो । फैसला दामोदरको पक्षमा भएपछि सर्नबहादुरले तत्कालीन मेची अञ्चल अदालतमा पुनरावेदन गरेका थिए । पुनरावेदनले समेत २०३९ माघ ९ गते जिल्ला अदालतको फैसला सदर गरेपछि पहिलो चरणको मुद्दा सकिएको थियो । त्यही जग्गामा २०४३ सालमा खड्गबहादुर र ४४ सालमा मानबहादुर एङदेनले फेरि मुद्दा दर्ता गरे । उनीहरूले फैसला बदर, जालसाजी, लुटपाट, जग्गा किचलोलगायत मुद्दा लगाएका थिए । जिल्ला अदालतले २०४८ चैत १८ मा दामोदरको पक्षमा गरेको फैसला पुनरावेदन अदालत इलाम लगियो ।


पुनरावेदनले २०५९ मंसिर २० मा जिल्ला अदालतको फैसला सदर गरेपछि दोहोर्‍याइ पाऊँ भनी सर्वोच्च अदालतमा निवेदन पर्‍यो । सर्वोच्चले २०६१ असार १३ को निवेदनमा २०६२ माघ २५ गतेको आदेश गर्दै मुद्दा किनारा लगाइदियो । तर हर्कबहादुर एङदेनले फेरि जिल्ला अदालतबाट मुद्दाको सुरुवात गरे । त्यही जग्गा उनले आफ्नो भएको भन्दै ६२ चैत २३ गते अदालतमा वादी दिए । २०७० वैशाख ८ मा यो मुद्दाको पनि जिल्लाबाट किनारा लागेको धनकुमारीका छोरा अनन्त भट्टराईले बताए ।

सबै मुद्दा आफूहरूले नै जितेको उनको भनाइ छ । तर वादीले पुनरावेदन गरे । इलामले यसै वर्षको अन्तिम चैत ११ गते जिल्लाको फैसलालाई नै सदर गर्‍यो । तैपनि जग्गा आफ्नो भएन । २०७१ मंसिर ८ गते बुद्धिमान एङदेनले फेरि वादी दिए । जिल्ला अदालतले २०७५ पुस १२ गते धनकुमारीकै पक्षमा फैसला गर्‍यो । वृद्ध आमाका तर्फबाट मुद्दा खेपिरहेका अनन्तले धनीपुर्जाका लागि मालपोत कार्यालयमा पहिल्यै निवेदन दिए पनि आनाकानी गरिरहेको थियो । अदालतले चलानीसमेत दिएपछि मालपोत बाध्य भएको हो । भगीमान मादेन कार्यालय प्रमुख हुँदा धनकुमारीले धनीपुर्जा पाएकी हुन् । हाल विराटनगरमा रहेकी धनकुमारीले लामो समयपछि न्यायको अनुभूति भएको बताइन् । वादी पक्षले भने पछिल्लो फैसलाविरुद्ध पुनरावेदन गरेको बताएका छन् ।


यो जग्गाको केही भागमा अहिले बस र ट्याक्सी पार्क गरिँदै आएको छ । यातायात व्यवस्थापनका लागि तत्कालीन प्रमुख जिल्ला अधिकारी डमरुबल्लभ निरौलाको सक्रियतामा फुङलिङ नगरपालिकाले बसपार्कको व्यवस्थापन गरेको हो । बस र ट्याक्सी भने यसअघिदेखि नै यहाँ राखिएको थियो ।

प्रकाशित : भाद्र २५, २०७६ १३:११
प्रतिक्रिया
पठाउनुहोस्

पर्यटक सवारीसाधनलाई सीधै भारत जान रोक

रूपा गहतराज

नेपालगन्ज — पहाडी जिल्लाबाट सीधै भारतीय सहरमा यात्रु बोक्ने पर्यटक सवारीसाधनलाई स्थानीय प्रशासनले रोक लगाएको छ  । पहाडी जिल्लाबाट नेपालगन्ज हुँदै भारतका विभिन्न सहरमा पुग्ने गरी सीधा यातायात सञ्चालन हुँदै आएको थियो  ।

पर्यटकका नाममा सर्वसाधारणलाई ओसारपसार गर्ने विकृति बढेपछि प्रशासनले रोक लगाएको हो । होटल व्यवसायी संघ नेपालगन्जको पहलमा जिल्ला प्रशासनले सर्वपक्षीय बैठक गरेर रोक्ने निर्णय गरेको संघका अध्यक्ष भीमलाल कँडेलले बताए ।

‘निर्णय भए पनि प्रभावकारी कार्यान्वयनको खाँचो छ,’ उनले भने, ‘नेपालगन्ज मात्र नभएर सीमावर्ती सबै सहरमा यो रोक्नु जरुरी छ ।’ नरोकिए सर्वसाधारणको अवैध ओसारपसार थप बढ्ने उनले बताए । राप्तीका पहाडी जिल्लासँगै दाङ, अर्घाखाँचीलगायतका जिल्लाबाट भैरहवा, कपिलवस्तु, नेपालगन्ज नाका हुँदै भारतका दर्जन बढी सहरबाट पनि सोझै बस सञ्चालन हुने गरेको छ । पर्यटक बसको अस्थायी इजाजत लिंदै स्थानीय बसहरू भारतीय सहर पुग्ने गरेका छन् ।

त्यसको विरोधमा व्यवसायी आन्दोलित भएका थिए । यातायात व्यवसायीले समेत जिल्ला–जिल्लाबाट भारतीय सहरमा सोझै बस सञ्चालन हुँदा सुरक्षा जोखिमदेखि भारतीय व्यवसायीसँग अस्वस्थ प्रतिस्पर्धा हुने गरेको उनीहरूको दाबी छ । ‘सीधा यातायात सञ्चालनले यात्रुलाई सुविधा हुन सक्छ,’ भेरी यातायात व्यवसायी प्रालिका सञ्चालक शोभाखर पौडेलले भने, ‘तर रुकुम, रोल्पा, सल्यान, प्यूठानजस्ता जिल्लाबाट सोझै सिमला, पञ्जाब, दिल्लीजस्ता सहरमा गाडी पुर्‍याउँदा असुरक्षासँगै स्थानीय व्यवसाय पनि धराशायी हुन्छ ।’


यसअघि तत्कालीन प्रमुख जिल्ला अधिकारी मदन भुजेलको अगुवाइमा यस खालका यातायात सञ्चालनमा वैध वा अवैध भएको यकिन गरी कानुनविपरीत कार्य रोक्न बाँके प्रहरीलाई जिम्मा दिइएको थियो तर त्यसतर्फ प्रहरी र यातायात व्यवस्था कार्यालय गम्भीर नहुँदा होटल व्यवसायी संघले त्यस खालका बस रोक्न हस्तक्षेप गर्न थालेको थियो । ‘तीन दिनयता मात्रै दर्जनभन्दा बढी गाडी रोकेका छौं,’ संघका अध्यक्ष कँडेलले भने, ‘प्रशासनको पछिल्लो निर्णय कार्यान्वयन नभए आक्रोशित भीडले गर्ने कारबाहीप्रति संघ जिम्मेवारी हुन सक्दैन ।’


प्रमुख जिल्ला अधिकारी कुमारबहादुर खड्काको अध्यक्षतामा बसेको सर्वपक्षीय बैठकले तीनबुँदे निर्णय गर्दै त्यसबारे यातायात व्यवस्था विभागमा जानकारी गराउने सहमति गरेको छ । नेपाल–भारत मैत्री बसहरूबाहेक अन्य साधन भारत जाँदा जुन प्रयोजनका लागि हो, सोही प्रयोजनमा मात्र सञ्चालन गर्नुपर्ने, नेपालबाट भारततर्फ जाने सवारीसाधनको यात्रु सूची इलाका प्रहरी कार्यालय जमुनाहले राख्ने, फर्कंदा परिचय खुल्ने कागजातसहित यकिन गर्ने निर्णय पनि भएको प्रशासनले जनाएको छ ।


बैठकमा नेपालगन्ज उद्योग वाणिज्य संघका अध्यक्ष नन्दलाल वैश्य, नेपाल उद्योग वाणिज्य महासंघका केन्द्रीय सदस्य कृष्णप्रसाद श्रेष्ठ, वस्तुगत व्यवसायी संघका अध्यक्ष भीमबहादुर रानाभाट, भेरी यातायात प्रालिका अध्यक्ष राजेन्द्र गिरी, बाँके प्रहरी प्रमुख, ट्राफिक प्रमुख, यातायात व्यवस्था कार्यालय बाँकेका प्रमुखलगायतको सहभागिता रहेको थियो ।

प्रकाशित : भाद्र २५, २०७६ १३:०९
पूरा पढ्नुहोस्
प्रतिक्रिया
पठाउनुहोस्