चन्द समूहका जिल्ला इन्चार्जसहित ५ पक्राउ

आनन्द गौतम

ताप्लेजुङ — नेत्रविक्रम चन्द समूहका ताप्लेजुङ, पाँचथर इन्चार्जसहित पाँच जनालाई प्रहरीले पक्राउ गरेको छ । आइतबार दमकबाट पक्राउ गरिएको झापाका प्रहरी नायव उपरीक्षक महेन्द्रकुमार श्रेष्ठले जानकारी दिए ।

ताप्लेजुङ इन्चार्ज सागर लिम्बु, पाँचथर इन्चार्ज तथा मेची ब्यूरो सदस्य राजु दास, मेची ब्युरो सदस्य तथा ताप्लेजुङ जिल्ला सेक्रेटरी नरपति पौडेल, ताप्लेजुङ जिल्ला सदस्य योगेश लिम्बु र जनमुक्ति मोर्चाको केन्द्रीय सदस्य तथा अखिल (क्रान्तिकारी) मेची, कोसी संयोजक गणेश कार्कीलाई पक्राउ गरिएको श्रेष्ठले जानकारी दिए ।

प्रदेश १ प्रहरी कार्यालय विराटनगर, प्रहरी कार्यालय झापा र इलाका प्रहरी कार्यालय दमकको संयुक्त टोलीले दमक नगरपालिका ६ को न्यु कञ्चन होटेलबाट पक्राउ गरेको हो । जिल्ला प्रहरी कार्यालय झापामा राखिएका उनीहरुमाथि थप अनुसन्धान भइरहेको प्रहरीले जनाएको छ ।

प्रकाशित : भाद्र १, २०७६ १८:५५
प्रतिक्रिया
पठाउनुहोस्
ADVERTISEMENT
ADVERTISEMENT

सडक मर्मत गर्दा ७ घर जोखिममा

आनन्द गौतम

ताप्लेजुङ — सडक मर्मतपछि झरेको पहिरोले फक्ताङलुङ गाउँपालिका ३ लिंखिम थिवाको एक परिवार विस्थापित भएको छ । ७ परिवार जोखिममा छन् ।

६५ वर्षीय मोतीकुमार लिम्बूले छिमेकी माइलाको घरमा बसिरहेको बताए । ६१ वर्षीय श्रीमतीसहित उनको पाँचजनाको परिवार छ ।

तीलप्रसाद लिम्बू, गंगाबहादुर लावुङ, नरेन्द्र लावुङ, खड्गबहादुर लिम्बू, छत्रबहादुर लावुङको घर पहिरोको जोखिममा रहेको छिमेकी दिलकुमार लावुङले बताए । उनीहरूमध्ये अधिकांशको घर पूरै चर्किएको र त्यही चर्किएको घरमा परिवारै बसिरहेको दिलकुमारले बताए । ठाउँ नभएकाले दिगो बसोवासका लागि कहाँ जाने भन्ने विकल्प नभएको मोतीकुमार बताउँछन् ।

विस्थापित परिवारलाई राहत र पुनर्बासका विषयमा सोध्न पनि कोही आएको छैन । ‘अहिलेसम्म कसैले सोधेको पनि छैन,’ मोतीकुमारले भने, ‘परिवारै विस्थापित भएर बसिरहेका छौं ।’ गाउँपालिका अध्यक्ष सरोज एभेङ आफूले शुक्रबार मात्रै थाहा पाएको र त्यो ठाउँको सुरक्षित बासस्थानको विषयमा छलफल सुरु गरेको बताउँछन् । सडकका कारण पहिरो गएकाले त्यहाँ ग्राभेल लगाउने विषयमा सडक कार्यालयसँग छलफल गरेको उनले जनाए ।

‘मैले जिल्ला समन्वय प्रमुख घनेन्द्र मादेनलाई सहयोगका लागि अनुरोध गरें,’ एभेङले भने, ‘उहाँ (जिसस प्रमुख) ले सडकको डिई साबलाई बोलाएर बस्ती सुरक्षाका विषयमा छलफल गरौं भन्नुभएको छ ।’ यहाँको सडकमा जाली राखेर ग्राभेल लगाउँदा बस्ती जोगाउन सकिने निष्कर्ष गाउँपालिकाको छ । पहिल्यै ग्राभेल लगाउने योजना बनाएको भए पनि गाउँलेलेकै असहयोगका कारण लगाउन नसकिएको सडक डिभिजन कार्यालयको बुझाइ छ ।

यहाँको वस्ती सार्ने ठाउँ पनि नभएकाले यसलाई सुरक्षित गर्नुको विकल्प नभएको अध्यक्ष एभेङ बताउँछन् । ‘राहत त सामान्य कुरा हो, गाउँपालिकाले व्यवस्था गर्छ,’ एभेङले भने, ‘बस्ती सुरक्षित गर्ने विषयमा समुदायसँग पनि बसेर छलफल गरेर निष्कर्षमा पुग्छौं ।’

उत्तर दक्षिण लोकमार्ग आयोजनाले निर्माण गरेको सडकले एकै बस्तीमा पाँचवटा घुम्ती बनाएको छ । तर यो आयोजनाको भन्दा समुदायको चाहनाका कारण भएको स्थानीय स्वयं बताउँछन् । यो बस्तीलाई अहिले छिरुवा–सिंवा हुँदै मित्लुङ जोड्ने सडकले पनि छुन्छ । यो सडक बिस्तार गरेर चौडा पार्दा बस्ती झनै जोखिममा पर्ने खतरा रहेको छ ।

प्रकाशित : श्रावण ३२, २०७६ १०:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT