बाढीपहिरो क्षेत्रमा संसदीय टोली

कान्तिपुर संवाददाता

मोरङ — प्रमुख प्रतिपक्षी दल कांग्रेसले जरुरी सार्वजनिक महत्त्वको प्रस्ताव संसदमा ल्याएपछि प्रदेश १ सरकारले बाढी पहिरो र खडेरीग्रस्त क्षेत्रमा अनुगमन गर्ने भएको छ ।

सरकारले खाद्य संकट घोषणा गरिएको खोटाङको हलेसी तुवाचुङ नगरपालिका अनुगमन गर्ने भएको छ । प्रमखु सचिव सुरेश अधिकारीका अनुसार आन्तरिक मामिला तथा कानुनमन्त्री हिक्मत कार्कीको नेतृत्वमा प्रमुख प्रतिपक्षी दललगायतका संसदको टोलीले साउन २८ गते खोटाङको हलेसी तुवाचुङ नगरपालिकामा अनुगमन गर्ने कार्यक्रम तय भएको छ ।

हलेसी तुवाचुङ नगर प्रमुख इवन राईले लामो समयको खडेरीले बाली नउर्मेको र असार २६ गतेबाट सुरु भएको अविरल वर्षापछिको बाढी पहिरोले खेतबाली पुरिएकाले खाद्य संकट भएको बताए । ‘खडेरीले बाली नउम्रिँदा नगर परिषदबाट खाद्य संकट घोषणा गरेका छौं,’ उनले भने, ‘नगरसभाले खाद्य संकट निवारणका लागि १ करोड ४० लाखको बजेट तथा कार्यक्रम पारित गरेका थियौं । तर त्यो कार्यान्वयन गर्न नपाउँदै बाढी पहिरोले खेतबाली नै बगाएपछि झन संकट उत्पन्न भएको छ ।’

पहिरोले मध्यपहाडी राजमार्गअन्तर्गतको हलेसी–जयरामघाट सडकखण्ड क्षतविक्षत भएकाले सडक अवरुद्ध भएको राईले बताए । ‘नगरपालिकाको हैसियतले खेडेरीसँगै आएको बाढीपहिरोको क्षतिको पूर्ति गर्नसक्ने अवस्था छैन,’ उनले भने, ‘त्यसैले सहयोगका लागि संघीय सरकार र प्रदेश सरकालाई गुहारेका छौं ।’

प्रदेश सरकारका प्रवक्ता एवं आन्तरिक मामिला तथा कानुन मन्त्री हिक्मत कार्की र प्रमुख सचिव अधिकारीलाई नगरपालिकामा रहेको खाद्य संकटबारे जानकारी गराउँदै अनुगमन गरी सहयोगको माग गरेको राईले बताए । उनले मन्त्री कार्की र प्रमुख सचिव अधिकारीले साउन २८ गते स्थलगत अनुगमन गरी राहत तथा पुनःस्थापनाको काम अघि बढाउने आश्वासन दिएको सुनाए ।

प्राकृतिक विपदमा प्रदेश सरकार राहत, उद्धार र पनःस्थापनाको काममा चौतर्फी ध्यान पुर्‍याउन नसक्दा असफल भएकाले जरुरी सार्वजनिक महत्त्वको प्रस्ताव प्रदेशसभा सचिवालयमा दर्ता गराएर सदनमा छलफल गराउन सभामुख प्रदीपकुमार भण्डारीलाई आग्रह गरेको प्रमुख प्रतिपक्षी दल कांग्रेसका प्रमुख सचेतक केदार कार्कीले बताए ।

‘सभामुख भण्डारीले आन्तरिक मामिला तथा कानुन मन्त्री कार्कीसँग छलफल गरेर समस्या भएको निष्कर्षमा पुगेर सदनमा प्रस्तावमाथि छलफल गराउनु भयो,’ उनले भने, ‘तर छलफलका क्रममा अधिकांश सत्ता पक्षका सांसदहरूले जनताको समस्यालाई छाडेर सरकारको प्रतिरक्षामा लाग्दा जनताको समस्याको पक्षमा एकजुट हुन सकेनौं ।’

सरकारसँग खडेरी र बाढी पहिरोको एकमुष्ट तथ्यांक अहिलेसम्म संकलन गर्न नसक्नु दुर्भाग्य भएको केदारले बताए । हलेसी तुवाचुङ नगरपालिका प्रमुख राईले स्थानीय सुभाष पोखरेललगायत नेतालाई साथमा लिएर डेलिगेसन आएपछि प्रदेश सरकारलाई यथार्थसँग साक्षात्कार भयो र ढिलै भए पनि अनुगमन गर्ने कार्यक्रम तय गरको केदारको भनाई थियो ।

प्रकाशित : श्रावण २६, २०७६ ०९:४३
प्रतिक्रिया
पठाउनुहोस्

डेढ करोड रकम ठगी

रमेशचन्द्र अधिकारी

धनकुटा — तेह्रथुमको आठराई गाउँपालिका ७ थोक्लुङका एक दम्पतीले करिब १ करोड ५० लाखभन्दा बढी रकम ठगी गरेको खुलेको छ ।भगवती माविका पूर्वशिक्षक उमाकान्त चौलागाईं र उनकी पत्नी लीलाले स्थानीय ६० जनाभन्दा बढी व्यक्तिबाट ५० हजारदेखि १० लाख रुपैयाँसम्म रकम लिएर गाउँबाट अन्यत्रै गएको जनाइएको छ ।

२०७२ सालमा छोरा जापान पठाउने भन्दै स्थानीयसँग ऋण स्वरूप रकम लिएको पीडित बिरिमाया तामाङले बताइन् । उनीसँग चौलागाईंले ६ लाख रुपैयाँ लिएको तर हालसम्म नतिरेको उनले बताइन् ।

उनीहरूले २ प्रतिशत व्याज दिने भन्दै रकम लिएका थिए । चौलागाईंले छोरालाई जापान पठाउने वहानामा उनकी श्रीमती लीला भट्ट चौलागाईंमार्फत करिब १ करोड ५० लाखभन्दा बढी रकम ऋण संकलन गर्न लगाएको तामाङले बताइन् । अधिकांशले गाउँका शिक्षित व्यक्ति भएकाले विश्वासका भरमा रकम दिएको बताएका छन् । ५ वर्ष बित्न लाग्दा पनि नतिरेपछि आफूहरू ठगिएको स्थानीयले बताए ।

सबैभन्दा बढी रकम स्थानीय अमृत तामाङसँग १० लाख रुपैयाँ लिएको बताइएको छ । विश्वासमा परी सामान्य कागजमा टिपोटका भरमा रकम दिएपछि अप्ठेरोमा परेको उनले बताए । चौलागाईंले तामाङसँग पटक–पटक गरेर डेढ लाखदेखि थप रकम ऋण लिएका थिए । रकम माग्दा आलटाल मात्र गर्छन्, उनले भने, लामो समयसम्म रकम फिर्ता नगरेकाले रकम फर्किने आशा हराएको छ ।

चौलागाईं दम्पतीले आठराई ७ थोक्लुङ मानेडाँडाकी बिरिमाया तामाङको ६ लाख, अमृत तामाङ १० लाख ७१ हजार, ऋषिराम दंगालको ८ लाख ७५ हजार र ३ तोला सुन ५ वर्ष बित्न लाग्दा पनि नदिएको बताए । त्यसैगरी आठराई याङ्गखुवाको रंगलाल ढकालको ८ लाख, सोही वडाका केरेपका वीरबहादुर तामाङको २ लाख ९८ हजार, थोक्लुङ भालुखोपका लक्ष्मी श्रेष्ठको १ लाख, थोक्लुङ ढोडेनीका पुन्य चौलागाईंको १ लाख १४ हजार, सुवास तामाङको १ लाख, फिदिमका शुक्रराज तामाङको १ लाख ८० हजार नगद लिएर हालसम्म फिर्ता गरेका छैनन् । त्यसैगरी आठराई थोक्लुङ्गका श्याम कन्दङ्गवाको २० हजार, थोक्लुङ्ग लामा चौताराका सोम सिवाको १ लाख ५५ हजार, सोम लामीछानेको ६२ हजार नगद लिएको पीडितले बताए ।

थोक्लुङ्ग ढलेबरका हरीप्रसाद अधिकारीको २ लाख ३८ हजार, नरप्रसाद अधिकारीको ६५ हजार, पिप्लेका हेमचन्द्र तिम्सिनाको ६० हजार, फाक्चुवाका नारयण थपलियाको ३ लाख, थोक्लुङ्ग भदौरे डाँडाका ज्ञाननाथ रसाईलीको ८५ हजार, ढोडेनीका श्रीकृष्ण चम्लागााईको १ लाख ३० हजार, पिप्ले मानसिंङ तामाङको ४ लाख, चुहाण्डाडा हिलेका मेघनाथ पराजुलीको ३ लाख २० हजार, थोक्लुङ्ग भिरगाउँका भीम श्रेष्ठको ६ लाख, महानन्द भण्डारीको २ लाख, भालुखोपका नयाँघरे श्रेष्ठको ३ लाख, थोक्लुङ भोर्लेका औतारी लामाको २ लाख ९० हजार, लगायतको गरी १ करोड ५० लाखभन्दा बढी रकम विभिन्न वहनामा लिएको स्थानीयले बताए । सोझा सिधा सर्वसाधारणसँग रकम लिएर गाउँलेलाई समेत थाहै नदिई घर छोडेर भागेको थोक्लुङ ढलेबरका हरिप्रसाद अधिकारीले बताए ।

चौलागाईं पत्नी लीलाले ऋण तिर्न आफूहरू गम्भीर रहेको टेलिफोनमा बताइन् । भरपर्दो आधार नभए पनि जग्गा प्लटिङ गरेर भए पनि तिर्ने उनले दाबी गरिन् । चौलागाईं परिवार हाल आठराईको थोक्लुङबाट ०७३ साल फागुण महिनामा बसाई सरेर मोरङको सुन्दर हरैचा नगरपालिका वडा २ मृगौलिया स्थित करैबना टोलमा बस्दै आएको बताइन् ।

प्रकाशित : श्रावण २६, २०७६ ०९:४३
पूरा पढ्नुहोस्
प्रतिक्रिया
पठाउनुहोस्