वृद्ध दम्पतीको पानीमाथि बास

स्थानीय कोपेन्द्र सिंहको जमिनमा दशकदेखि छाप्रो हालेर बस्दै आएका देव दास र उनकी पत्नी पारुदेवी लोहन्द्रा खोलाको बाढी बस्तीमा पसेपछि डुबानमा परेका हुन ।

उनीहरु बस्दै आएको छाप्रोमा शनिबार पनि एक फिट पानी जमेको थियो । छिमेकका कुनै पनि घर ओभाना छैनन् । नजिकको सामुदायिक विद्यालय पनि पानीले डुबेपछि दास दम्पतीलाई ओभाना ठाउँमा सार्न नसकिएको स्थानीयको भनाई छ । ‘भएको जायजेथा पानीमाथिको खाटमै राखेका छौं । यही पकाउने, खाने र बस्ने गरेका छौं,’ दासले भने दुईसाता देखि यी खाट नै संसार झै भएको छ ।’ उनीहरु खानेपानी लिन र शौचालय गर्न जानमात्र दुई सातादेखि खाटबाट उठ्ने गरेको र अन्य समय त्यही बसेर बिताउने गरेको बताउछन् ।

दिनभर गाउँ–बजार डुलेर खाद्यान्न र आर्थिक संकलन गरेर गुजारा चलाउँदै आएका उनीहरु दुईसाता देखि बाहिर ननिस्किएको स्थानीय कोपेन्द्र सिंहले बताए । उनका अनुसार उनीहरुले स्थानीय निकाय र विभिन्न संघसस्थाले वितरण गरेको राहत र भेट्न आएकाले ल्याएको सामाग्रीले गुजरा चलाउँदै आएका छन् ।

भरिएको पानी सुक्न थालेका बेला बिहीबार र शुक्रबारको वर्षाले फेरि लोहन्द्रा खोला बस्तीमा पसेपछि थप डुबानमा परेका हुन् ।

कटहरी गाउँपालिकामा मात्र यसपालीको बाढीले झण्डै एक हजार परिवार डुबानमा परेको गाउँपालिका प्रमुख रामकुमार कामतको भनाई छ । ‘नयाँ बजारको सुकुम्बासी बस्तीका बासिन्दा सबैभन्दा बढी प्रभावित भएका छन्,’ प्रमुख कामतले भने, ‘त्यहाँ झण्डै सय घरमा अझै पनि पानी सुकेको छैन । अधिकांश घरभित्र पानी र लेदो छ ।’ आसपासमा ओभानो ठाउँ नहुँदा सार्न नसकिएको उनले बताए ।