अविवाहितले जन्माइन् शिशु

सेफहाउसले युवतीको र उनलाई गर्भवती बनाएर छाड्ने युवकको नाम सार्वजनिक गरेको छैन । विवाह गर्छु भनेर प्रेमको नाटक गर्दै गर्भवती बनाएपछि युवक बेपत्ता भएको युवतीले बताएकी छन् ।

बेपत्ता प्रेमी खोज्दै ती युवती गर्भवती अवस्थामै संखुवासभादेखि इटहरी आइपुगेकी थिइन् । गर्भवती अवस्थामा एक्लै बजारमा हिँडिरहेको देखेपछि स्थानीयले उनलाई सेफ हाउसमा पुर्‍याएका थिए । ती युवतीका अभिभावकलाई खबर गरिसकिएको सेफहाउस इटहरीका प्रतिनिधिले जनाएको छ ।

यौनहिंसा, बलात्कार, अलपत्र परेका, हराएका, जोखिममा परेका, हिंसामा परेका महिलालाई लक्षित गरेर इटहरी उपमहानगरपालिकाले एक वर्षदेखि सेफ हाउस सञ्चालन गर्दै आएको छ । हाउसमा हालसम्ममा ७६ जना महिलाले सेवा लिएको उपप्रमुख लक्ष्मी गौतमले बताइन् ।

उनका अनुसार हाउसमा महिलाहरूलाई अल्पकालीन सेवा प्रदान गरिन्छ । हाउसमा १५ दिनसम्म राख्ने व्यवस्था छ । दुई साताभन्दा बढी राख्न सकिने अवस्था नभएकाले जतिसक्दो चाँडो आफन्त पत्ता लगाएर बुझाउने गरिएको छ ।

घरमा पुग्ने बाटो खर्च पनि उपमहानगरले उपलब्ध गराउने गरेको सञ्चालक समितिले जनाएको छ । दुई सातापछि कोही आफन्त नभए वा आउन नसके घरसम्मै पुरयाउने व्यवस्था गरिएको छ । आफन्त पत्ता नलागेका चार जनालाई मंगला शाहाना पुनःस्थापना केन्द्र काठमाडौं पठाइएको छ । पूर्वका प्रायः सबै जिल्लादेखि पश्चिमका रसुवा, सिन्धुपाल्चोक, ललितपुर र सिन्धुलीका महिलाले पनि सेवा लिएको सेफहाउस सञ्चालक समितिले जनाएको छ ।

जनप्रतिनिधि, प्रहरी र संघ संस्थाहरूको सिफारिसमा समस्यामा परेका महिलालाई सेफहाउसमा राख्ने गरिएको छ । उक्त अवधिमा पीडित महिलाका लागि खाने बस्ने, औषधि उपचार, आत्मविश्वास बढाउने मनोपरामर्श दिने गरिएको छ ।