सुरू भयो बोलबम, साउनभर पिण्डेश्वरको ढोका खोलिने

प्रदीप मेन्याङ्बो

सुनसरी — साउन सुरु हुनासाथ धरानको पिण्डेश्वर मन्दिरमा जल चढाउने भक्तजनको भीड लाग्न थालेको छ । पशुपतिनाथको मन्दिरभन्दा प्राचीन मानिएको पिण्डेश्वर मन्दिर परिसरलाई प्राचीन हरिद्वार शिवालयका प्रतीकका रूपमा मानिँदै आए छ ।

हिन्दु धर्मशास्त्रका अनुसार साउन शिवजीको मन पर्ने महिना हो । यसैबेला बोलबम भक्तजन गेरु वस्त्र धारण गरी गलामा रुद्राक्षको माला पहिरेर खालीखुट्टा शिव मन्दिरमा जल चढाउने गर्छन् । पिण्डेश्वर शिवालयमा बिहानैदेखि हिन्दु नरनारी हातमा जलघडा बोकेर बेलपत्र, धतुरोको फूल र दाना, गाईको दूध, मह, घिउ आदि चढाउनेको घुइँचो लाग्ने गरेको छ ।

धरानमा चारदशक अघि अनुसन्धानकर्मी पथिक कवि लक्ष्मीप्रसाद आचार्यले स्कन्ध पुराण र रुद्राक्षरण्य महात्म्यमा पिण्डेश्वरको बारेमा व्यापक चर्चा भएको पत्ता लगाएपछि पिण्डेश्वरको शिवलिङ भारतमा रहेका शिवलिङहरूभन्दा जेठो रहेको बताएर प्रत्येक साउनमा जल चढाउने चलन सुरु गरेका थिए ।

ऐतिहासिक पुरातात्त्विक महत्त्व बोकेको उक्त पौराणिक स्थलमा प्रदेश १ का सभामुख प्रदीपकुमार भण्डारीले जल चढाएर औपचारिक रूपमा बोलबमको शुभारम्भ गरे । उनले बोलबमको मन्दिरसँगै रहेको सिद्धिविनायक गणेशको प्रतिमा र पिण्डेश्वर बाबाधामको शिवलिङ्गमा जल चढाएर विधिवत रूपमा बोलबम सुरु गरेका थिए ।

त्यस अवसरमा प्रदेश सभामुख भण्डारीले मन्दिर परिसरमा रुद्राक्षको ५ वटा बिरुवा रोपेका थिए । कांग्रेसका प्रदेश सांसद चन्द्रप्रसाद श्रेष्ठ, वडा १४ का अध्यक्ष कृष्णप्रसाद भट्टराई, आन्नद आचार्य र बाबाधाम समितिका अध्यक्ष विकास बनेपालीले पनि वृक्षरोपण गरेर सभामुख भण्डारीलाई साथ दिएका थिए ।

हिन्दु धार्मिक आस्थाअनुसार बराहक्षेत्रस्थित सप्तकोसी र कोकाह नदीको संगमस्थलमा स्नान गरेर त्यहाँको जल पिण्डेश्वर मन्दिरको शिवलिङमा चढाए चिताएको पुग्ने धार्मिक विश्वास छ । साउन महिना लागेपछि सबै देवी, देवता गुप्तबासमा बस्ने भएकाले मठ मन्दिरमा ठूलो पुजापाठ हुन्न । तर शिवजीको प्रिय महिना साउन भएकाले शिवजीको पूजा आराधना निर्वाध चल्ने हिन्दुधर्मका विद्वानहरूको भनाई छ ।

विगत वर्षसम्म पिण्डेश्वरमा साउनको सोमबारमात्र शिवलिङ्गमा चलजढाउने गरिएको थियो । तर, साताको एउटा सोमबार मात्र मन्दिरको ढोका खुला गर्दा एकसाथ आएका हजारौं बोलबम भक्तजनको व्यवस्थापन गर्न गाह्रो हुने, घण्टौं लाममा पालो पर्खिनु पर्ने भएकाले गत वर्षदेखि साउनका सबैबार खुला गरिएको पिण्डेश्वर बाबाधाम सञ्चालन समितिका अध्यक्ष विकास बनेपालीले बताए ।

प्रकाशित : श्रावण २, २०७६ २०:२१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

बीपी प्रतिष्ठानको निमित्त उपकुलपतिमा डा.खनाल नियुक्त

प्रदीप मेन्याङ्बो

(सुनसरी) — एक सातादेखि उपकुलपतिविहीन बनेको वीपी कोइराला स्वास्थ्य विज्ञान प्रतिष्ठानले बुधबार निमित्त उपकुलपति पाएको छ । प्रतिष्ठान उपकुलपतिविहीन भएपछि स्वास्थ्य तथा जनसंख्यामन्त्री उपेन्द्र यादवले प्रतिष्ठानका शिक्षाध्यक्ष प्रा.डा. गुरुप्रसाद खनाललाई निमित्त उपकुलपति पदमा नियुक्त गरेको हो । 

उपकुलपति प्रा.डा. राजकुमार रौनियारलाई घूससहित अख्तियार दुरुपयोग अनुसन्धान आयोगको टोलीले नियन्त्रणमा लिई अनुसन्धान गरिरहेको र अख्तियारको ऐन २०४८ को दफा १७ तथा भ्रष्टचार निवारण ऐन, २०५९ को दफा ३३ अनुसार स्वतः पदवाट निलम्बनमा परेकाले अर्को व्यवस्था नभएसम्मका लागि डा खनाललाई निमित्त उपकुलपतिमा नियुत्त गरिएको प्रतिष्ठानले जनाएको छ । निमित्त उपकुलपति नियुक्त डा खनालले प्रतिष्ठानको विभिन्न विभागीय प्रमुख, प्राध्यापक एवम् शाखा/महाशाखा प्रमुखहरुको बैठक गरी सबैलाई आ-आफ्नो जिम्मेवारी इमान्दारीपूर्वक वहन गर्न आग्रह गरेको प्रतिष्ठानले जनाएको छ ।

यता प्रतिष्ठानकै चार पदाधिकारीमध्ये एक मानिएका रजिष्ट्रार तुलबहादुर श्रेष्ठलाई पनि अख्तियारले भ्रष्टाचार आरोपमा विशेष अदालतमा मुद्दा दायर गरेकाले आर्थिक कारोबारमा समस्या भने ज्युकाँ त्यूँ छ । उनी पनि स्वत: निलम्बनमा परेकाले उक्त पद पनि रिक्त छ ।

यसैगरी लेखा प्रमुख दिनेश दाहाल, डेपुटी म्यानेजर अमित श्रीवास्तवलाई पनि अख्तियारले मुद्दा दायर गरेकाले उनीहरु पनि स्वत: निलम्बनमा परेका छन् ।

प्रकाशित : श्रावण १, २०७६ १९:०२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×