३३ केभी प्रसारणमा समस्या, तीन जिल्लामा स्थानीय उत्पादन

दिपेन्द्र शाक्य

संखुवासभा — ३३ केभी प्रसारण लाइनमा समस्या आएपछि नेपाल विद्युत् प्राधिकरण खाँदबारीले केही दिन यता स्थानीय स्तरमा उत्पादित विद्युत् प्रयोग गरेको छ । जिल्लाका विभिन्न स्थानमा उत्पादित बिजुली केन्द्रीय प्रसारण लाइनमा जोड्ने गरिएको छ । हावाहुरी र लगातारको वर्षात्ले ३३ केभीका विद्युतका पोल भाँचिएका र तार चुँडिएकाले मर्मतमा समस्या छ ।

सभाखोलाबाट उत्पादित ४ र हेवाखोलाबाट उत्पादित ३ मेघावाट बिजुली तीन जिल्लामा बालिएको प्राधिकरण खाँदबारी वितरण केन्द्रका प्रमुख ध्रुव अधिकारीले बताए । ‘फल्ट पत्ता लागे पनि निरन्तरको झरीले मर्मतमा कठिनाइ भएको छ,’ उनले भने, ‘हामीले यहींको बिजुली प्रयोग गरेका छौं ।’ दुई विद्युत् गृहबाट उत्पादन भएको विद्युत् ३ जिल्लामा दिइरहेको उनले बताए । ‘अन्धकारमा बस्नुभन्दा दैनिक बिहान र बेलुकी १२ घण्टासम्म यो बिजुली सञ्चालन गरिएको छ,’ उनले भने, ‘३३ केभी प्रसारण लाइनको समस्या समाधान नभएसम्म यसलाई नै निरन्तरता दिने छौं ।

दिवेश्वरी र हेवाखोला हाइड्रोपावरले उत्पादन गरेको ७ मेघावाटको बिजुली सदरमुकाम खाँदबारी, चैनपुरलगायत भोजपुरको दिङ्ला क्षेत्र र तेह्रथुममा बिजुली बालेको हो । क्षमताभन्दा माग बढी भएकाले बिहान र बेलुकीको समयमा राइस मिल, गृल उद्योग, क्रसर मेसिन बन्द गर्न उनले आग्रह गरे । बिजुली अनियमित भएपछि स्थानीय रेडियोहरूले प्रशारण समय घटाएका छन् ।

जिल्लामै उत्पादित बिजुलीले बल्न थालेपछि राहत मिलेको स्थानीयले बताए । पहिले–पहिले केन्द्रिय प्रशारण अवरुद्ध हुँदा साता दिनसम्म अध्यारोमा बसेको खाँदबारीका उमेश श्रेष्ठले बताए । ‘अहिले स्थानीय स्तरमा उत्पादन भएको बिजुली बाल्न पाएकामा खुसी छौं,’ उनले भने, ‘केन्द्रीय लाइन मर्मत गर्न समस्या पर्दा प्राधिकरणले यहींको बिजुली दिएको छ ।’

सोलारको भरमा स्थानीय तह
भोजपुर– भोजपुरका नौवटा स्थानीय तहमा अहिलेसम्म विद्युत सेवा पुग्न सकेको छैन । केन्द्रीय प्रसारणको विद्युत नहुँदा गाउँपालिकाले प्रदान गर्ने सेवा प्रभावित भएको छ ।

यहाँ स्थानीयस्तरमा उत्पादित विद्युत रातिको समयमा मात्र वितरण गरिन्छ । विद्युत सेवा नहुँदा आमचोक गाउँपालिकाले सोलार सेट राखेर सेवा प्रदान गरे पनि त्यो भरपर्दो हुन सकेको छैन । कार्यालयको प्रिन्टिङ, फोटोकपि, कम्प्युटर, इन्टरनेट, डकुमेन्टेसन जस्ता अत्यावश्यकीय काममा असहज भएको सूचना प्रविधि अधिकृत नवीन श्रेष्ठले बताए ।

केन्द्रीय प्रसारणको विद्युत पुगेको साल्पासिलिछो गाउँपालिकाले अहिलेसम्म लाइन जोडेको छैन । कार्यालयको काम काज सोलारकै भरमा सञ्चालन भइरहेको गापा प्रमुख महेस राईले बताए । भोजपुर नगरपालिकाका दुई बटा वडामा विद्युत विस्तारकै क्रममा छ । त्यसै गरी षडान्नद नगरपालिकाका पाँचवटा वडामा विद्युत विस्तार भएको छैन ।

पौवादुङमा गाउँपालिकाका दुईवटा वडामा विद्युत विस्तार भएको छैन । टेम्केमैयुङ गाउँपालिकाका चारवटा वडामा विद्युत विस्तार हुन बाँकी छ । अरुण गाउँपालिकामा एउटा वडामा विद्युत विस्तार भएको छैन । रामप्रसादराई गाउँपालिकाका दुईवटा वडा बाँकी रहेका छन् । हतुवागढी गाउँपालिकामा दुईवटा वडामा मात्र विद्युत विस्तार भएको छ ।

प्रकाशित : असार २, २०७६ ११:०३
प्रतिक्रिया
पठाउनुहोस्

अत्यधिक गर्मीले जनजीवन प्रभावित

विनु तिम्सिना

विराटनगर — इलामका दिलाराज गोर्खाली विराटनगर आएको एक महिना मात्रै भयो । उनी एक छोरा र श्रीमतीसहित अटो रिक्सा चलाउन विराटनगर झरेका हुन् । तर, पाँच दिनदेखि बढेको गर्मीमा उनले अटो चलाउन सकेका छैनन् ।

अत्याधिक गर्मी भएपछि छहारीमा विश्राम गर्दै रिक्सा चलाक । तस्बिर : विनु/कान्तिपुर

आइतबार पनि गर्मीका कारण उनी दिनभर शीतल छहारीमा बसिरहे । ‘इलाम जस्तो जाडो ठाउँबाट आएको मलाई त विराटनगरको गर्मीले हैरान नै बनायो,’ उनले भने, ‘ठूलो सहर भनेर अटो चलाउन यतै आएको यहाँ त धेरै पो गर्मी हुने रैछ ।’

खर्च कटाएर दैनिक एक हजार आम्दानी गर्ने गोर्खालीले गर्मीले आम्दानी पनि घटेको बताए । यस्तै विराटनगर १५ रानीका जयराम साहले रिक्सा चलाउन थालेको लगभग २० वर्ष भयो । विराटनगरका सिटी रिक्सा र अटोले रिक्सालाई विस्थापित गराउन लागेको अवस्थामा गर्मीले झन काम गर्नै नसक्ने बनाएको साहले बताए ।

दैनिक ५ सय आम्दानी गर्ने उनले दुई दिनदेखि रिक्सा चलाउन नै नसकेको बताए । विराटनगरमा भएका रूख बिरुवा पनि काटेकाले छहारी कतै नभेटिने उनले गुनासो गरे । ‘पहिला पहिला त विराटनगरमा धेरै रूख थिए, सवारीलाई गन्तव्यमा पुर्‍याएर एक छिन छहारीमा शीतल खाएपछि फेरि हिंड्न सकिन्थ्यो,’ उनले भने, ‘अहिले त विराटनगरमा रूख–बिरुवा भेट्टाउनैमुस्किल छ ।’

पूर्वी तराईमा पाँच दिनदेखि बढेको अत्यधिक गर्मीले जनजीवन अस्तव्यस्त भएको छ । वायुमण्डलीय तापक्रममा वृद्धिसँगै हावा नचल्नु र चल्दा पनि तातो हावा आउनुले सर्वसाधारणलाई घरबाहिर निस्किनसमेत समस्या उत्पन्न भएको छ । अत्यधिक गर्मीले बजार, शैक्षिक संस्था, सरकारी कामकाज समेत प्रभावित भएको छ । मजदुर र विद्यार्थी गर्मीका कारण धेरै समस्यामा परेका छन् ।

शुक्रबार विराटनगरको तापक्रम ३८ डिग्री सेल्सियस मापन गरिएको जल तथा मौषम विज्ञान विभाग अन्तर्गत मौसम पूर्वानुमान महाशाखाकी मौशम विद् गंगा नगरकोटीले बताइन् । गर्मी बढदा चिसो पेयसँगै फलफूल जुसको व्यापार बढेको छ । मध्याह्न र अपराह्न सरकारी कार्यालयसहित बजारमा सर्वसधारणको उपस्थिति पातलिएको छ ।

गर्मी छल्न पेयपदार्थ पिउनेसँगै सर्वसाधारणले अन्य उपाय अपनाउँदै आएका छन् । नियमित विद्युत् आपूर्ति नहुँदा र विद्युत्को भोल्टेज कम हुँदा बढदो गर्मीमा सर्वसधारण झनै पिरोलिएका छन् । गर्मीमा छाला ढाक्ने कपडा लगाउन, घाममा हिँडा नियमित अन्तरालमा बसेर शीतल पानीले हात मुख धुने जस्ता सुझाव चिकित्सकको छ ।

नियमित पानी पर्दा वायुमण्डलीय तापक्रम घटाउन सहयोग गर्ने भए पनि पछिल्लो एक सातामा पानी परेको छैन । मनसुनको कतै कुनै अत्तोपत्तो छैन जसले गर्दा गर्मी बढ्ने क्रममा रहँदा सर्वसाधारण अझै बढी छटपटिएका छन् । गर्मीका कारण दही, चिसो पेय पदार्थ, खरबुजा, स्याउ, आइसक्रिम लगायतका सामाग्रीको बिक्री भने बढेको छ ।

विराटनगर स्थित गुद्री बजारमा फलफुलको व्यापार गर्दै आएका दिनेशकुमार साहले तिन चारदिन यता खरवुजाको बिक्री बढेको बताए । अन्य समयमा दैनिक ४०/५० वटा खरबुजा बिक्री हुने गरेकोमा अहिले दैनिक सय वटासम्म बिक्री भइरहेको उनले बताए ।

प्रकाशित : असार २, २०७६ ११:०२
पूरा पढ्नुहोस्
प्रतिक्रिया
पठाउनुहोस्