विराटनगर — नेपाल राष्ट्रिय मुसहर संघले मुसहर आयोग गठन गर्न माग गरेको छ । संघको विराटनगरमा सम्पन्न भेलाले विभिन्न १० बुँदे मागसहित मुसहर आयोग गठनको माग गरेको हो । नेपालको कुल जनसंख्यामध्ये  १२ लाख मुसहरहरु छन् । सोमबार विराटनगरमा भएको संघको प्रथम जिल्ला अधिवेशनले नयाँ नेतृत्व चयन गरेको छ ।

अधिवेशनले जितेन्द्र ऋषिदेवको अध्यक्षतामा १७ सदस्यीय मोरङ जिल्ला समिति गठन गरेको हो । समितिका सचिव धर्मेन्द्र ऋषिदेवले देशमा ठूल्ठुला क्रान्तिपछि राजनीतिक परिवर्तनहरु भएपनि मुसहरहरुको अवस्थामा सुधार आउन नसकेकाले मुसहर आयोग गठन गरिनुपर्ने आफूहरुको मुख्य माग रहेको बताए । सरकारले समृद्धिको नारा लगाएको भएपनि आफ्नै भोटले जितेका नेताहरु फर्केर गाउँ नआउने, मुसहर समुदायको शिक्षा, स्वास्थ्य, रोजगारी, स्थायी बसोवास लगायतका विषयमा बेवास्था गरेको उनले गुनासो गरे ।

नेपालभरी २२ वटा जिल्लाका १ सय २४ स्थानमा मुसहरहरुको बसोबास छ । यसमध्ये ९८ प्रतिशत मुसहरहरु भूमिहीन रहेको समितिले जनाएको छ । ९९ प्रतिशत मुसहरहरु अझै पनि निरक्षर नै रहेको भन्दै उनले उच्च शिक्षा लिएका १२ हजार युवाहरु अझै शैक्षिक बेरोजगारका रुपमा यत्तिकै बस्न बाध्य रहेको उनले बताए ।