रेडपाण्डा संरक्षणमा पहल

कान्तिपुर संवाददाता

इलाम — लोपोन्मुख मानिएको रेडपाण्डा (हाब्रे) को संरक्षणका लागि बासस्थानको पहल थालिएको छ । रेडपाण्डा नेटवर्कको पहलमा सन् २०१९ भित्र बासस्थानको व्यवस्था हुने भएको हो ।

रेडपाण्डा नेटवर्कको सहकार्यमा उच्च पहाडी संस्थाले संरक्षणका लागि १ सय ८० रोपनी निजी जग्गा खरिद गर्न लागेको हो । इलामको उत्तरी क्षेत्रमा रेडपाण्डा पाइने भएकाले बासस्थानको व्यवस्था गर्न लागिएको हो । नेटवर्कले उच्च पहाडी संस्थाको सहकार्यमा सन् २००७ देखि नै यस क्षेत्रमा काम गर्दै आएको छ ।

संस्थाले रेडपाण्डा बासस्थान रहेको क्षेत्रमा भएको खाली जग्गा खरिद गरेर त्यसमा वृक्षरोपण गर्ने रेडपाण्डा नेटवर्कका परियोजना संयोजक दाबा तेन्जी योल्मोले बताए । ‘प्रयोगमा नआएको निजी जग्गाको खोजी भइरहेको छ,’ उनले भने, ‘वन क्षेत्रसँग जोडिएको यस्तो जग्गामा रेडपाण्डा आकर्षण गर्ने खालका विभिन्न वनस्पती रोपेर संरक्षण गरिनेछ ।

सन्दकपुर गाउँपालिकाको जौवारी क्षेत्रमा पुनःस्थापना केन्द्र खोलिने तयारी भएको हो । डिभिजन वन कार्यालयकै नाममा जग्गा किनेर आफूहरूले संरक्षण गर्न लागेको उनले बताए । निश्चित समयपछि यो क्षेत्रलाई नजिकैको सामुदायिक वनलाई जिम्मा लगाउने संस्थाको योजना छ । ‘यो कार्यक्रमले चोरी सिकारी नियन्त्रणसहित कुकुरलगायत जंगली जनावारले रेडपाण्डालाई गर्ने आक्रमणबाट पनि जोगाउन सकिन्छ,’ यल्मोले भने, ‘रेडपाण्डाको संरक्षणमा समुदाय सचेत भइसकेकाले यसले थप प्रभावकारी बनाउनेछ ।’

रेडपाण्डा पाइने क्षेत्रमा संस्थाले यो पटक ३ वटा ब्लकसमेत थप्ने भएको छ । यसअघि १६ वटा ब्लक रहेको अवस्थामा थप ब्लक बनाएर संरक्षणलाई प्रभावकारी बनाउन खोजिएको हो । खाली जग्गा खरिद गरेर त्यसमा रेडपाण्डाको आहारा लगाउने र रेडपाण्डा बस्नका लागि उपयुक्त प्रजातिका बिरुवा लगाउने योजना बनिसकेको उच्च पहाडी संस्थाका धनप्रसाद खाम्दाकले बताए ।

हाल इलामका १८ सामुदायिक वनमा रेडपान्डा संरक्षण कार्यक्रम चलिरहेको छ । रेडपाण्डाको चोरी–सिकारी नियन्त्रणका लागि अनुगमन, विद्यालयहरूमा क्लब गठन, रेडपाण्डाको अनुगमनका लागि क्यामेराबाट निगरानी गर्ने जस्ता कार्यक्रम संस्थाले चलाउँदै आएको छ ।

प्रकाशित : जेष्ठ ९, २०७६ १०:०५
प्रतिक्रिया
पठाउनुहोस्

खानेपानीमा २० लाख हिनामिना

कान्तिपुर संवाददाता

संखुवासभा — खाँदबारी खानेपानी उपभोक्ता तथा सरसफाई संस्थाले २० लाख ३ हजार हिनामिना गरेको प्रतिवेदन सार्वजनिक गरेको छ । संस्थाले पत्रकार सम्मेलन गरेर प्रतिवेदनमा अनियमितता भएको जानकारी दिएको हो ।

विभिन्न सञ्चार माध्यममा अनियमितताको समाचार प्रकाशन र प्रशारण भएपछि समितिले बुधबार प्रतिवेदन सार्वजनिक गरेको हो ।
सबैभन्दा बढी रकम काउन्टर सहायक सुरेश ढकालले अनियमितता गरेको अध्यक्ष नरेन्द्र राईले जनाए ।

ढकालले १३ लाख ९५ हजार ४७ रुपैयाँ अनियमितता गरेको प्रतिवेदनमा उल्लेख छ । लेखापाल लक्ष्मण पराजुलीले ६२ हजार ६ सय २७ र प्रशासन सहायक जुनिता कार्कीले ५ लाख ४५ हजार अनियमितता गरेको राईले बताए । लेखापाल लक्ष्मण र प्रशासन सहायक जुनिताले अनियमितता गरेको रकम दाखिला गरिसकेको समितिले जनाएको छ ।

काउन्टर सहायक ढकालले पानीको महसुल तर्फबाट उठाउन प्रयोग गरेको रसिदको अर्ध कट्टीमा लुकाएर र अर्ध कट्टीमा रद्ध लेखेर ६ लाख ५६ हजार ४ सय अनियमितता गरेको प्रतिवेदनमा उल्लेख छ । आव ०७५/७६ मा सफ्टवेर प्रणालीको विलमार्फत २ लाख २८ हजार १ सय हिनामिना गरेको उनले बताए ।

त्यसैगरी ढकालकै जिम्मेवारीमा राखिएको ०७४/७५ मा समेत पाँचवटा रसिद बुक गायव बनाएको उनी माथि समितिको आरोप छ । एक बुकमा ५० प्रति रसिद रहेको संस्थाले जनाएको छ ।

अन्य बिलमा उठेको न्यूनतम र अधिकतम रकम अंकलाई आधार मानेर पाँचवटा रसिदबाट ५ लाख ५ हजार अनियमितता भएको हुनसक्ने लेखा प्रतिवेदनमा उल्लेख गरिएको छ । गायब भएका ती रसिदबाट ५ लाख ५ हजार असुल्ने प्रतिवेदनमा सुझाव दिइएको छ ।

प्रकाशित : जेष्ठ ९, २०७६ १०:०४
पूरा पढ्नुहोस्
प्रतिक्रिया
पठाउनुहोस्