बराहक्षेत्रमा अर्धकुम्भ मेला

धार्मिक सर्किट बनाउने प्रदेश सरकारको गुरूयोजना
प्रदीप मेन्याङ्बो

सुनसरी — सुनसरीको चतराधाममा आयोजित अर्धकुम्भ मेलामा श्रद्धालु भक्तजनको भीड बढेको छ । धरानस्थित पिण्डेश्वर बाबाधामबाट रुद्राभिषेक तथा स्तोत्र पाठसहित कुम्भ घडा कलशयात्रा गर्दै शनिबार अर्धकुम्भ मेलाको सुरुवात गरियो ।

बराहक्षेत्रको चतरामा सुरु भएको अर्धकुम्भ मेलामा कुम्भ स्नान गर्दै भक्तजन ।तस्बिर : प्रदीप/कान्तिपुर

कुम्भ मेलालाई हिन्दु धर्मावलम्बीले महान् स्नान पर्वका रूपमा लिन्छन् । सप्तकोसीको किनारमा रहेको चतराधाममा कुम्भस्नान गर्न नेपालका विभिन्न स्थानका साथै र भारतबाट हिन्दु धर्मावलम्बी आउन थालेका छन् ।


भारतमा मात्रै कुम्भ मेला लाग्दै आएकोमा प्राचीन हरिद्वार मानिने बराहक्षेत्रको चतरामा प्रथम पिण्डेश्वर महाकुम्भ मेला ०५९ वैशाख १ गतेदेखि जेठ १ गतेसम्म पहिलो पटक नेपालका प्रथम जगतगुरु बालसन्त मोहनशरण देवाचार्यले सुरु गरेका थिए । यसैको निरन्तरता दि“दै बराहक्षेत्र चतरालाई पूर्वको धार्मिक पर्यटकीय स्थलका रूपमा विकास गर्न फेरि अर्धकुम्भ मेला आयोजना गरिएको हो ।


अर्धकुम्भ मेला वैशाख २६ गतेसम्म जारी रहने छ । मेला अवधिभरि स्वदेश र विदेशबाट करिब १ करोड भक्तजन आउने दाबी गरिएको छ । प्रदेश सरकारले मेला व्यवस्थापनका लागि अस्थायी रूपमा सम्पर्क कार्यालय नै राखेको छ । मेला संयोजकमा प्रदेशका आन्तरिक मामिला तथा कानुन मन्त्री हिक्मत कार्की छन् । कुम्भका लागि प्रदेश सरकारले ५० लाख बजेट विनियोजन गरेको छ ।


हरेक १२ वर्षमा महाकुम्भ मेला लाग्छ । प्रत्येक ६ वर्षमा लाग्ने मेलालाई अर्धकुम्भ मेलाका रूपमा चिनिन्छ । चतराको कुम्भस्थानमा ५९ फुट अग्लो कुम्भस्तम्भ समेत निर्माण गरिएको छ । पौराणिक ग्रन्थअनुसार समुद्र मन्थनपछि उत्पन्न अमृतमय कुम्भघडा आफ्नो बनाउन देवता र दैत्यका बीच विवाद हुँदा जहाँ–जहाँ अमृत खस्यो, त्यहाँ–त्यहाँ कुम्भ लाग्ने भनेर बताइएको छ । भारतको हरिद्वार, तीर्थराज प्रयाग, अवन्तिकापुरी साथै गोदावरी तट गरी चार स्थानमा अमृतका विन्दुहरू झरेका हु“दा यी चार स्थानमा पहिलादेखि नै कुम्भ भनेर विख्यात भएको छ ।


प्राचीन हरिद्वार चतराधाम–धरानको पिण्डेश्वरमा भने अमृतिको थोपा नभएर पिण्ड नै खसेको श्रीमद् स्कन्ध महापुराणको हिमादिखण्ड अध्याय १२ को ३५ देखि ३८ सम्मका श्लोकहरूमा स्पष्टसँग बताइएकाले हिन्दु धर्मावलम्बीको मुख्य कुम्भ चतरा–पिण्डेश्वरधाम भएको जगदगुरु बालसन्तले बताए । धार्मिक पर्यटकीय सर्किट बनाइने प्रदेश १ का मुख्यमन्त्री शेरधन राईले प्राकृतिक रूपमा रमणीय रहेको कोसीको किनारस्थित बराहक्षेत्र चतराधामलाई विशेष धार्मिक पर्यटकीय क्षेत्रका रूपमा विकास गर्न अलग्गै गुरुयोजना बनाउने तयारी भइरहेको बताएका छन् ।


उनले सुनसरीका धार्मिक पर्यटकीय स्थलहरू पिण्डेश्वर बाबाधाम, दन्तकाली शक्तिपीठ, बुढासुब्बा, विष्णुपादुका, सूर्यकुण्ड, रामधुनी, छिन्नमस्तालगायत धार्मिक तीर्थस्थललाई जोडेर धार्मिक सर्किट बनाउने गुरुयोजनाको तयारी भइरहेको बताए । उनले भने, ‘पूर्वको धार्मिक पर्यटनलाई प्रवद्र्धन गर्न बराहक्षेत्रलाई केन्द्रबिन्दु बनाएर प्रदेश सरकारले गुरुयोजना तयार गर्नेछ ।’


उनले महाभारतमा समेत बराहक्षेत्रको महिमा गाएको र कोसी सभ्यताको विकास भएको नेपालको सबैभन्दा पुरानो पवित्र देवस्थल भएकाले विकास गर्न जरुरी रहेको बताए । बराहक्षेत्रको विकासमा स्थानीय, प्रदेश र संघीय सरकारको चासो रहेको उल्लेख गर्दै उनले तिनै तहका सरकार यसको विकासमा लागेको बताए । उनले भने, ‘बराहक्षेत्रबाट सिन्धुपाल्चोकको दोलालघाटसम्म जल पर्यटनको सम्भाव्यता अध्ययनको तयारी भइरहेको छ ।’

प्रकाशित : चैत्र २६, २०७५ ०९:२६
ADVERTISEMENT
प्रतिक्रिया
पठाउनुहोस्
ADVERTISEMENT

सक्रिय बन्दै संसदीय समिति

कान्तिपुर संवाददाता

विराटनगर — प्रदेश संसद्का विषयगत समितिहरू सभापति चयन भएस“गै सक्रिय हुन थालेका छन् । सोमबार सातवटा विषयगत समितिमध्ये तीनवटाको बैठक बसेको थियो ।

‍समितिको सक्रियता बढेसँगै लामो समयसम्म रोकिएका विधेयकहरू पारित गर्न सहज हुने भएको छ । सरकारले गरेका काम कारबाहीप्रति पनि समितिले चासो देखाउन थालेका छन् । उद्योग, पर्यटन तथा वातावरण समिति, सामाजिक विकास समिति र न्याय प्रशासन तथा विधायन समितिका बैठक बसे ।


उद्योग, पर्यटन तथा वातावरण समितिको सोमवार बसेको प्रारम्भीक बैठकले सम्बन्धित मन्त्रालयवाट पाँच दिनभित्रमा हालसम्म भएका कामको विवरण मगाउने निर्णय गरेको छ । मन्त्रालयबाट विवरण मगाउने निर्णय भएको समितिसभापति सीता थेवे जगेबुले वताइन् ।

यसैगरी सामाजिक विकास समितिको बैठकमा ‘प्रदेश खेलकुद खेलकुद सम्बन्धमा व्यवस्था गर्न बनेको विधेयक’ माथि दफावर छलफल भयो । पहिलो बैठकमा ४४ मध्ये १२ वटा दफामाथि छलफल सकिएको थियो । सामाजिक विकास मन्त्री जिवन घिमिरे समेत सहभागि रहेको बैठक समिति सभापति सरीता थापाको सभापतित्वमा बसेको थियो ।

यसैगरी न्याय प्रशासन तथा विधायन समितिको वैठक सोमबारै बसेको थियो । सभापति इन्द्रमणि पराजुलीको सभापतित्वमा भएको बैठकमा ‘प्रदेशसभा सचिवालय सम्बन्धमा व्यवस्था गर्न बनेको विधेयक’ माथिको दफावार छलफल सुरु भएको छ । ६ महिनाअघि समितिमा आएको उक्त विधेयकमाथि कांग्रेसका प्रमुख सचेतक केदार कार्की सहित अगमलाल चौधरी, मोहम्मद ताहिर मियाँ, ज्योति सुब्बा, बिन्दिया कार्की, कल्पना कुमारी सरदार, सूर्यमाराज राई, सन्जाकुमार दनुवार र लीला सुब्बाले संशोधन दर्ता गराएका थिए ।
आर्थिक र प्रशासनिक अधिकारसहित प्रदेश सभामा सचिव नियुक्त गर्न सक्ने अधिकार सहितको व्यवस्था विधेयकमा छ । प्रदेशसभा सचिवालयका सचिवलाई प्रदेशका प्रमुख सचिवकै हैसियत अर्थात् विशिष्ट श्रेणी सरह सेवासुविधासमेत प्रदान गर्ने व्यवस्था विधेयकमा छ । सचिवको सेवा, सुविधा, काम कर्तव्य र अधिकारका विषयमा केन्द्रित भएर संशोधनकर्ताहरूले सूचना दर्ता गराएका छन् ।

निजामती सेवाबाट आएका सचिवसमेत रहने प्रदेशसभा सचिवालयमा छुट्टै नियुक्त भई आउने सचिवका कारण विवाद हुन सक्ने बैठकमा सहभागी प्रतिपक्षी दलका नेता राजीव कोइरालाले धारणा राखेका थिए । सत्तापक्षका सांसद विमल कार्कीले संवैधानिक व्यवस्थाअनुसार नै प्रदेशसभा सचिवालयमा सचिव व्यवस्था गर्न सकिने प्रावधान भएको जिकिर गरे ।

‘प्रदेशसभामा कहिले सचिव आउनुहुन्छ, कहिले जानुहुन्छ हामीलाई समेत थाहा हुन्न । अब प्रदेशसभाले नै सचिव नियुक्त गरेपछि सदनको कामकारबाहीमा समेत सहज हुन्छ,’ उनले भने, ‘यस्तो अवस्थाको अन्त्य आवश्यक छ ।’

आन्तरिक मामिला तथा कानून मन्त्री हिक्मतकुमार कार्कीले प्रदेश लोकसेवा गठनसँगै कर्मचारीको पदपूर्ति भई सहज हुने बताए । बैठकमा संशोधनकर्ताका तर्फबाट सांसद केदार कार्कीले सचिवलाई सेवा सुविधाले मात्र नपुगेर उपचारका लागि विदेशमा लाग्ने खर्च समेत प्रदेश सरकारले ब्यहोर्ने गरी कानुन नबनाउन आग्रह गरे । ‘सांसदहरूलाई समेत विदेशमा उपचार खर्च दिइँदैन,’ उनले भने, ‘हामीले यहाँका अस्पतालको सेवालाई गुणस्तरीय बनाउनुको साटो विदेशमा उपचार गर्न जान प्रोत्साहन गर्नु हुँदैन ।’

प्रकाशित : चैत्र २६, २०७५ ०९:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×