भरुवा बन्दुकले लागेर मृत्यु
संखुवासभा — भरुवा बन्दुकले लागेर मादीमा एक जनाको ज्यान गएको छ । आइतबार बेलुका मादी नगरपालिका ८ मावादिन बस्ने २५ वर्षीय हस्तबहादुर तामाङको भरुवा बन्दुक पडकँदा ज्यान गएको हो ।
एक थान भरुवा बन्दुकसहित तामाङको शव मादी नगरपालिका वडा नम्बर.–९ फाबिङमा रहेको जंगलमा सोमबार भेटिएको प्रहरीले जनाएको छ । मृतक हस्तबहादुर जंगलमा सिकार खेल्न गएका थिए ।
हस्तबहादुर सँगै भाइ रत्नबहादुर तामाङ र छिमेकी कृष्णबहादुर तामाङ पनि सिकार खेल्न गएका थिए । उनीहरूलाई प्रहरीले पक्राउ गरेको छ ।
उनीहरूको साथबाट २ थान भरुवा बन्दुक, २ ओटा नाल र भरुवा बन्दुकमा प्रयोग हुने मेटासिटको बट्टामा अन्दाजी ५० ग्राम बारुद, गोलीका रूपमा प्रयोग हुने किटको टुक्रा १० थान, २ थान खुकुरी, टर्चलाइट भेटिएको प्रहरीले जनाएको छ ।
प्रकाशित : भाद्र ४, २०७५ १९:०२प्रतिक्रिया