सिफारिस दस्तुर एक लाखसम्म

कान्तिपुर संवाददाता

सुनसरी — धरान उपमहानगरले सेवाग्राहीबाट लिने विभिन्न सिफारिस र अनुमति शुल्क दस्तुरको दर २० रुपैयाँदेखि १ लाखसम्म तोकेको छ । साउनदेखि नै लागू हुने गरी यस्तो शुल्क तोकिएको हो ।सवैभन्दा कम दस्तुर निवेदन फारामको २० रुपैयाँ छ ।

आर्थिक सम्पन्नले व्यक्तिगत रूपमा नगरक्षेत्र भित्र बोरिङ गरेर पानी प्रयोग गर्नेहरूमध्ये चार इन्च पाइपभन्दा सानोका लागि बोरिङ अनुमति सिफारिस ५० हजार र त्यसभन्दा बढीको अनुमतिका लागि एक लाख रुपैयासम्म दस्तुर तोकिएको छ ।

धरानमा भूमिगत पानी बोरिङ गरेर व्यक्तिगत रूपमा पानी प्रयोग गर्नेहरू आधा दर्जन छन् ।
उपमहानगरले सार्वजनिक गरेको विभिन्न दस्तुरहरूमा बंशजका आधारमा नागरिकता लिने सिफारिसमा सय रुपैयाँ तोकिएको छ । अंगिकृत नागरिकताका लागि भने हजार रुपैयाँ छ । घर नम्बर प्लेट, घरबाटो, प्रतिलिपि व्यवसाय दर्ता, व्यक्तिगत घटना दर्ता प्रतिलिपि प्रमाणिकरण लगायतको २ सय दस्तुर तोकेको छ ।

सर्जमिन, बसोबास, नामथर जन्म मिति संशोधन, जन्म मृत्यु विवाह, व्यवसाय ठाउँसारी, व्यवसाय नाम र किसिम परिवर्तन, धर्मपुत्र वा पुत्री सिफारिस, हकवाला संरक्षण, सेयरसम्बन्धी र व्यक्तिगत घटना दर्ता संशोधन, नाता प्रमाणित सिफारिसलगायतका लागि ५ सय रुपैयाँ कायम गरिएको छ ।

कुकुर दर्ता र नविकरण, संस्था दर्ता, अंग्रेजीमा सिफारिस, अविवाहित रहेको सिफारिस, मोही लागत कट्टा सिफारिस, पेन्सनकार्ड सम्बन्धी सिफारिस, एलानीमा खानेपानी वा विद्युत् जडान र नामसारीका लागि हजार रुपैयाँ दर तोकेको छ । उपमहानगरपालिकाले विटिएस टावर, थ्रीफेज विद्युत् लाइन जडान सिफारिसका लागि ५ हजार दस्तुर तोकेको छ ।

उपमहानगरले आन्तरिक आय वृद्धि गर्ने उद्देश्यले गत असारमा ११ गते बसेको तेस्रो नगरसभाले आर्थिक ऐन २०७५ पारित गरेअनुसार सिफारिस दस्तुर र राजस्वमा केही वृद्धि गरेको थियो । त्यही आधारमा उक्त सिफारिस दस्तुरमा परिवर्तन गरिएको हो ।

प्रशासकीय अधिकृत खगेन्द्र खतिवडाले साविक गाविसहरू पाँचकन्या र विष्णुपादुका समायोजना गरेपछि धरान उपमहानगरको आन्तरिक आय यो वर्ष १६ करोड पुर्‍याउने लक्ष्य राखिएको छ । यसअघिको आन्तरिक आय १० करोड ९० लाख मात्र थियो ।

प्रकाशित : श्रावण २४, २०७५ ०८:२९
प्रतिक्रिया
पठाउनुहोस्

खोटाङका ३ विमानस्थल अवरुद्ध

कान्तिपुर संवाददाता

खोटाङ — जिल्लाका तीनवटै विमानस्थल अवरुद्ध भएपछि यात्रुले सास्ती बेहोर्नुपरेको छ । दुइटा विमानस्थलमा कालोपत्रे र एउटा विमानस्थलमा पहिरोले क्षति पुर्‍याएपछि हवाईसेवा अवरुद्ध हुँदा यात्रुले सास्ती बेहोर्नुपरेको हो ।

जिल्लामा उपचारको राम्रो प्रबन्ध नहुँदा स्वास्थ्य संस्थाबाट रेफर गरिएका बिरामीलाई अन्यत्र पठाउन समस्या भएको छ । रावाबेसी गाउँपालिकाको लामीडाँडा विमानस्थलमा गत २०७४ साल वैशाखदेखि उडान भएको छैन । वि.सं. २०२८ सालबाट सञ्चालनमा आएको यो विमानस्थलको धावनमार्गमा कालोपत्रेको काम थालेपछि अवरुद्ध भएको हो ।

नेपाल नागरिक उड्डयन प्राधिकरणको करिब छ करोड ७६ लाख ९३ हजार आठ सय रुपैयाँ लागतमा कालोपत्रे थालिएको हो । यो विमानस्थलको काम अहिलेसम्म आधा मात्र सम्पन्न भएको स्टेसन मेनेजर रमेश श्रेष्ठले बताए । वर्ष दिनभित्र सम्पन्न गर्ने गरी काम थालिएको थियो । यो विमानस्थलमा अहिले ग्याबिङ वाल भर्ने, धावनमार्गमा ग्राबेलिङ गर्ने र आसपासमा नाली निर्माणको काम मात्र भएको छ । विमानस्थल कालोपत्रेको जिम्मा वाईएनएस, एसएपी र सूर्य कन्स्ट्रक्सन प्रालिले साझेदारीमा लिएको हो ।

जिल्लाको दक्षिणी क्षेत्र खोटेहाङ गाउँपालिकाको थामखर्क विमानस्थल पनि दुई वर्षदेखि अवरुद्ध भएको छ । कालोपत्रेको काम सुरु भएपछि उक्त विमानस्थल अवरुद्ध भएको हो । उडान सुरु भएको १८ वर्षपछि कालोपत्रेको काम थालिएको छ । उक्त विमानस्थल रौता कन्स्ट्रक्सन प्रालिले जिम्मा लिएको छ ।

२०७३ साल माघदेखि सुरु गरेर २०७५ साल असार मसान्तसम्ममा सम्पन्न गर्ने गरी सम्झौता गरिएको विमानस्थलको काम अहिले ७५ प्रतिशत मात्र काम सकिएको नेपाल नागरिक उड्डयन प्राधिकरणका इन्जिनियर रत्न श्रेष्ठले बताए । नेपाल नागरिक उड्डयन प्राधिकरणको ९ करोड ३८ लाख ६८ हजार सात सय रुपैयाँ लागतमा उक्त विमानस्थलको धावनमार्ग कालोपत्रे गर्न सुरु गरिएको हो ।

दिक्तेल रुपाकोट मझुवागढी नगरपालिकाको व्यापारिक केन्द्र दिक्तेल बजारको नजिक पर्ने मनमायाा राई खानीडाँडा विमानस्थल गत जेठबाट अवरुद्ध छ । जेठ १ गते दिउँसो परेको भारी वर्षापछि धावनमार्ग माथिबाट बगेको भलबाढीले पहिरो गएपछि विमानस्थल अवरुद्ध भएको हो । बाढीले विमानस्थलको धावनमार्गमुनिको ढल थुनिएपछि माथिबाट बगेको बाढीले दक्षिणी भाग भत्किएको छ ।

प्रकाशित : श्रावण २४, २०७५ ०८:२८
पूरा पढ्नुहोस्
प्रतिक्रिया
पठाउनुहोस्