भूकम्पप्रतिरोधी विद्यालय

कान्तिपुर संवाददाता

ओखलढुंगा — भूकम्पले क्षतिग्रस्त सोलुखुम्बुको दुधकुण्ड नगरपालिका ५ स्थित जनजागृति आधारभूत विद्यालयमा नयाँ भवन बनाइएको छ । हिमाली हावापानी सुहाउँदो अत्याधुनिक र भूकम्पप्रतिरोधी दुई कोठे भवन निर्माण भई आइतबार औपचारिक उद्घाटन भएको हो ।

सोलुखुम्बुस्थित जनजागृति आधारभूत विद्यालयको नवनिर्मित अत्याधुनिक भूकम्पप्रतिरोधी भवन । तस्बिर : कुम्भराज राई

सोलु दुधकुण्ड नगरपालिकाकी उपप्रमुख कल्पना राई र अस्ट्रेलियन हिमालयन फाउन्डेशनकी कार्यक्रम प्रमुख छिरिङ लामा ओगरमनले संयुक्त रूपमा उद्घाटन गरे । ३९ लाख १८ हजार ४ सय ४८ रुपैयाँ लागतमा भवन निर्माण सम्पन्न भएको हो । विद्यालय भवन सोलुखुम्बुमा शैक्षिक क्षेत्रमा काम गरिरहेको ग्रामीण शिक्षा तथा वातावरण विकास केन्द्र (रिड नेपाल) ले अस्ट्रेलियन हिमालयन फाउन्डेसनको आर्थिक सहयोगमा निर्माण भएको हो ।

भवन उद्घाटन कार्यक्रममा फाउन्डेसनकी कार्यक्रम प्रमुख ओगरमनले नवनिर्मित विद्यालय भवन अस्ट्रेलियाको उत्कृष्ट डिजाइन भएको र यो हिमाली हावापानी सुहाउँदो भएको बताइन् । उनले यही डिजाइनले अस्ट्रेलियामा उत्कृष्ट डिजाइनको पुरस्कार जितेको समेत बताइन् । आगामी दिनमा पनि नेपालको शैक्षिक क्षेत्रमा सहयोग गर्ने उनले बताइन् ।

रिड नेपालका महाप्रबन्धक उज्जवल अमात्यले २०७२ सालको भूकम्पपछि नेपालमा अस्ट्रेलियन हिमालयन फाउन्डेसनको सहयोगमा ८७ वटा विद्यालय भवन निर्माण गरेको बताए । त्यसमध्ये सोलुखुम्बुमा १३ वटा अस्ट्रेलियन डिजाइनको भवन बनेको जानकारी दिए । प्रत्येक भवनमा दुईदुई वटा कोठा रहेको अमात्यले बताए ।

निर्माण भएका सबै भवनहरू भूकम्प प्रतिरोधी, साउन्ड प्रुफ, हावाहुरी तथा पानी पर्दा समेत पढाइमा बाधा नपुग्ने, जाडो मौसमका लागि समेत उपयोगी भएको रिड नेपालका इन्जिनियर सुमन राईले बताए । रिड नेपालले जन जागृति आधारभूत विद्यालय, सिंहकाली आधारभूत विद्यालय, कालिका आधारभूत विद्यालय, वासाखाली माध्यमिक विद्यालयमा, गार्मा माध्यमिक विद्यालय र चाँगेस्थान माध्यमिक विद्यालय केरुङका गरी जम्मा १३ वटा भवन निर्माण गरेको हो ।

प्रकाशित : श्रावण २२, २०७५ ०९:२९
प्रतिक्रिया
पठाउनुहोस्

स्थानीय तहमा विपत् व्यवस्थापन तयारी

अर्जुन राजवंशी

दमक — सम्भावित विपतलाई ध्यान दिँदै जिल्लाका स्थानीय तहहरूले पूर्वतयारी थालेका छन् । वर्षाका समयमा बाढीबाट हुन सक्ने जनधनको क्षति कम गर्न विपत् व्यवस्थापनको तयारी थालिएको हो ।

जिल्लाका १५ मध्ये बाढीबाट प्रभावित स्थानीय तहहरूले बढी सतर्कता अपनाएका छन् । गौरीगन्ज, कमल, कचनकवल, बाह्रदशी र झापा गाउँपालिका तथा कनकाई र भद्रपुर नगरपालिकाले विपत् व्यवस्थापनका लागि कोष स्थापना तथा आवश्यक सामग्री खरिद गरेका छन् ।

झापा र कमल गाउँपालिकाले ५० लाखका दरले, गौरीगन्ज गाउँपालिकाले ३० लाख तथा बाह्रदशी गाउँपालिकाले १० लाखको विपत् व्यवस्थापन कोष स्थापना गरेको छ । जिल्लामा ५ वर्षयता साउनको अन्तिम साता भारी वर्षा हुने गरेको पाइएको छ । उक्त कुरालाई मध्यनजर गर्दै स्थानीय तहहरूले कोष स्थापना गर्नुकासाथै विपत् व्यवस्थापनमा आवश्यक सामग्रीहरू खरिद गरेका हुन् ।

झापा गाउँपालिकाले विपत् व्यवस्थापन कोषका साथै रबर बोट समेत खरिद गरेको छ । बाढीका कारण डुबानमा परेकाहरूलाई उद्धारका लागि ७ लाख ६ सयका दरले रबर बोट खरिद गरेको गाउँपालिकाका प्रमुख प्रशासकीय अधिकृत चोलाराज दंगालले बताए । उनले रबर बोटमा सवार हुँदा आवश्यक पर्ने हेल्मेट, लाइफ ज्याकेटको समेत व्यवस्था गरेको बताए ।गत वर्ष साउन अन्तिम साता आएको बाढीले जिल्लामा झापा गाउँपालिकामा सबैभन्दा बढी धनजनको क्षति भएको थियो । उक्त गाउँपालिकामा गत वर्ष १० जनाको मृत्यु भएको थियो भने दुई जना बेपत्ता भएका थिए । हजारौं घर डुबान
तथा सयौं बिघा खेती योग्य जमिनमा बाढी पस्दा करोडौं बराबरको क्षति भएको थियो ।

गत वर्षको क्षतिलाई मध्यनजर यस वर्ष पूर्वतयारीमा जुटेको अधिकृत दंगालले बताए । रातको समयमा उद्धार तथा राहतमा सहयोग पुग्ने खालका टाढासम्म देखिने टर्च लाइट तथा केही खाद्य सामग्रीको समेत जोहो गरिएको उनले बताए । विपतमा उद्धार तथा राहत कार्यमा खटिने गरी सशस्त्र प्रहरी बलको सीमा सुरक्षा कार्यालय, जनपथ प्रहरी र स्थानीय संघसंस्थालाई अलर्टमा राखेको समेत उनले बताए । उक्त गाउँपालिकामा कनकाई, विरिङ र सानोमाई खोलाले बढी क्षति पुर्‍याउने गरेको छ ।

स्थानीय कमल खोलाको बाढीले वर्षेनी क्षति बेहोर्दै आएको कमल गाउँपालिकाले कोष स्थापनाका साथै उद्धार तथा राहत सामग्रीको जोहो गरेको छ । गाउँपालिकाले बाढीका समयमा उद्धारमा आवश्यक पर्ने लाइफ ज्याकेटहरू वितरण गरेको छ ।१५ थान लाइफ ज्याकेट केर्खा र क्याम्पा प्रहरी चौकीलाई वितरण गरेको प्रमुख प्रशासकीय अधिकृत युवराज ढकालले बताए । गौरीगन्ज गाउँपालिकाले पनि रबर बोट खरिद गरेको छ । कचनकवल गाउँपालिकाले पनि दुई वटा रबर बोट अर्डर गरेको रेडक्रस जिल्ला सभापति लोकराज ढकालले बताए ।

जिल्लामा साना–ठूला गरी दुई दर्जन खोला/नदी छन् । तीमध्ये ८ वटा ठूला नदीमा आउने बाढीले वर्षेनी ठूलो मात्रामा जनधनको क्षति पुर्‍याउने गरेको छ । ‘विगतको भन्दा यस वर्ष बाढीबाट हुने मानवीय क्षति न्यूनीकरण गर्नका लागि हामीले धेरै काम र योजनाहरू बनाएका छौं,’ ढकालले भने, ‘विपत् व्यवस्थापन गर्नुपर्छ भनेर १५ वटै स्थानीय तहको ध्यानाकर्षण गराएका छौं । पूर्वतयारी र आवश्यक सामग्रीबारे पूर्ण जानकारी दिएका छौं ।’

रेडक्रसले आवश्यक पर्ने स्थानको पहिचान गरी ३ सय ६५ वटा लाइफ ज्याकेट वितरण गरेको उनले बताए । जिल्लाको ८६ स्थानमा सामुदायिक विपत् व्यवस्थापन समिति (सीडीएमसी) गठन गर्नुका साथै विपतको समयमा सहयोग पुग्ने साइरन जडित उपकरण समेत वितरण गरेको ढकालले बताए ।रेडक्रसले १५ वटै स्थानीय तहमा विपत् व्यवस्थापनसम्बन्धी गोष्ठी समेत सञ्चालन गरेको थियो । वर्षेनी करोडौंको क्षति पुर्‍याउने गरे पनि जिल्लास्थित स्थानीय तहहरूले विपत् व्यवस्थापनमा आवश्यक मात्रामा ध्यान नदिएको ढकालले बताए ।

प्रकाशित : श्रावण २२, २०७५ ०९:२८
पूरा पढ्नुहोस्
प्रतिक्रिया
पठाउनुहोस्