कान्तिपुर वेबसाईट
AdvertisementAdvertisement

सप्तकोसीमा पानीको बहाव बढ्यो, रातो बत्ती बालियो 

वेदराज पौडेल

विराटनगर — पूर्वी पहाडी जिल्लामा भएको वर्षासँगै सप्तकोशीको सहायक नदीहरुमा आएको बाढीका कारण सप्तकोसी नदीको जलस्तर बढेको छ । 

यो सिजनको सबैभन्दा बढी एक लाख ५४ हजार ३ सय ९३ क्यूसेक पुगेको छ । ब्यारेजका ५२ मध्ये २४ ढोका खोलिएका छन् । दुई बजे पानीको सतह एक लाख ५० हजार पाँच सय क्यूसेक थियो । बिहीबार बिहानबाट कोशीको जलस्तर लगातार बढिरहेको छ ।


जिल्ला प्रहरी कार्यालयका डिएसपी नारायणप्रसाद चिमरियाका अनुसार पानीको बहाव एक लाख ५० हजार क्यूसेक नाघेपछि खतराको सूचक रातो बत्ती बालिएको छ ।


ब्यारेजको पूर्व र पश्चिममा दुई वटा रातो झण्डा गाडिएको छ । डिएसपी चिमरियाका अनुसार यो सिजनको सबैभन्दा उच्च पानीको बहाव रेकर्ड भएको हो ।

निर्माण ताका ६४ बर्ष अघि १२ लाख क्यूसेक पानी नियन्त्रण गर्ने क्षमताको कोसी ब्यारेजमा बालुवा भरिएको कारण नदीको सतह माथि आएकाले अहिले ६ लाख क्युसेक भारमात्र बहन गर्ने प्राविधिकहरु बताउँछन् ।


२०६५ साल भदौमा कोसीको पूर्वी तटबन्ध भत्काएर कोसी नदी गाउँ पसेको थियो । जसबाट नेपाल र भारतका हजारौँ मानिस घरबार वीहिन भएका थिए ।


ईनरुवा पश्चिम रहेको सुनसरी खोलामा आएको बाढी गाउँ पस्दा ५० परिवार विस्थापित भएको प्रमुख जिल्ला अधिकारी प्रेम प्रकाश उप्रेतीले बताए ।


इनरुवा नगरपालिकाको दक्षिणी क्षेत्र, भोक्राहा, नरसिंह लगायतका बस्तीमा सुनसरी खोलाको पानी पसेपछि जनजीवन प्रभावित बनेको छ ।

प्रकाशित : असार २१, २०७५ १५:०९
प्रतिक्रिया
पठाउनुहोस्

इटहरी बलात्कार: आरोपी भारतबाट पक्राउ

वेदराज पौडेल

इटहरी — बालिका बलात्कारका आरोपी विराटनगरका मनिष श्रेष्ठलाई प्रहरीले भारतको पश्चिम बंगालबाट पक्राउ गरी शनिबार सुनसरी ल्याएको छ । 

पुस १६ गते भएको बलात्कार घटनामा उनी आरोपी हुन् । चिया बगानमा काम गर्ने आफन्तको घरमा श्रीमतिसहित बसिरहेका उनलाई नेपालबाट गएका प्रहरीले पश्चिमबंगाल प्रहरीको सहयोगमा पक्राउ गरेको हो ।

पक्राउ परेका उनको परिचयपत्र भारतीय प्रहरीले माग गरेपछि भने काकडभिट्टा नाकाबाट नेपाल भित्र्याउन निकै समय लागेको थियो । पछि सुरक्षा उच्च अधिकारीले भारतीय अधिकारीसँग वार्ता गरेपछि मात्र मनिषलाई नेपाल ल्याइएको हो । पक्राउ परेका मनिषलाई अनुसन्धानको लागि जिल्ला अदालत सुनसरीबाट आइतबार म्याद थप गरिने वरिष्ठ प्रहरी उपरीक्षक हरिबहादुर पालले बताए ।

इटहरी २ मा रहेको रोयल रिसोर्ट होटलको कोठा नम्बर ११२ मा १४ वर्षीया किशोरी बलात्कार गरेको आरोपमा प्रहरीले उनलाई खोजी गरेको थियो । उनीविरुद्ध किशोरीले किटानी जाहेरी दिएकी छन् ।

पुस १६ गते घटना भएपनि प्रहरीले आर्थिक लेनदेनमा बलात्कारको घटना दर्ता नगरी मिलापत्र गराई गुपचुप गराएको थियो । प्रहरीले घटना गुपचुप पारेपछि वरिष्ठ प्रहरी उपरीक्षक पालको संयोजकत्वमा पाँच सदस्यीय छानविन समिति गठन भएको थियो । समितिको सिफारिसमा सुनसरी प्रहरी प्रमुख एसपी विद्यानन्द माझी र इलाका प्रहरी कार्यालयका प्रहरी निरीक्षक चिरञ्जीवी दाहाल यसअघि नै निलम्बनमा परेका छन् ।

प्रकाशित : माघ २७, २०७४ १९:०४
पूरा पढ्नुहोस्
प्रतिक्रिया
पठाउनुहोस्
×