राराको बिसौनी खालीपाटन

स्थानीय दलबहादुर बुढाका अनुसार पछिल्लो समय यो ठाउँ पिकनिक स्पटको रुपमा पनि परिचित छ । डोफाड्ना, बलिफिर, डोरपाटन, झुलारुख पाटन र डाँफे लेकले घेरिएको खालीपाटन प्राकृतिक सौन्दर्यले भरिपूर्ण छ । तत्कालीन राजा वीरेन्द्र जुम्लादेखि घोडा चढेर राराताल जाने क्रममा एक रात बास बसेको ठाउँ भएकाले पनि खाली पाटन नजिकैको मैदानलाई 'राजा चौर' भनिन्छ । यस क्षेत्रमा भुजपत्र, ठिंगो सल्लो र खर्सुका रुखहरु प्रसस्त पाइन्छ । साथै बटुवालाई पानी पिउन ठाउँठाउँमा पानीका मूहान भेटिन्छन् ।

यस क्षेत्रमा सेतो चिमालो लगायत झण्डै ४० भन्दा बढी प्रजातिका फूल फुल्ने गरेका छन् । अतिस, भुल्ते, सतुवा, कटुको, पाँचऔंले, बायोजडी, गन्नाइनो, चुक, तितो लगायतका सागहरु पनि पाटनमै पाइन्छ । यो सिजनमा त ठूलो संख्यामा किसानहरु साग टिप्न पाटनतिरै भेटिन्छन् ।डाँफे, कालीज, बनकुखुरादेखि च्याखुराहरुको बासस्थान मानिने यस क्षेत्र दुर्लभ मानिएको रेड पाण्डाको पकेट क्षेत्र पनि हो । नजिकैको जंगलमा रेडपाण्डाको अनुसन्धान पनि भइरहेको छ ।

जुम्ला सदरमुकामदेखि खाली हुँदै रारा जाने सडक निकै छोटो पर्ने भएकाले पछिल्लो समय पर्यटकहरुको प्रमुख रोजाइ पनि बनेको खाली पाटन । हिउँदमा भने यो ठाउँ ढपक्कै हिउँले पुरिन्छ ।